ଖଜୁରିପଡ଼ା,୧୩।୫ ( ବିଦୁର ବେହେରା): ବାପା ଲଗାଇଥିବା ଲିଚୁ ଏବଂ ଆମ୍ବ ଏବେ ଆମ ପରିବାରକୁ ରୋଜଗାର ଦେଇଛି। ଲିଚୁ ଓ ଆମ୍ବ ବିକ୍ରିକରି ବେଶ୍ ଦୁଇ ପଇସା ଅର୍ଜନ କରି ଆମ ପରିବାର ହସ ଖୁସିରେ ଚାଲିଛି ବୋଲି କୁହନ୍ତି ଖଜୁରିପଡ଼ା ବ୍ଲକ୍ ଅନ୍ତର୍ଗତ ଦଳ ପଡ଼ା ପଞ୍ଚାୟତର ଲମ୍ବା ବାଡ଼ି ଗ୍ରାମର ଲଳିନୀ କାନ୍ତ କହଁର। ବୟସ ୫୨ ବର୍ଷ। ପରିବାର କହିଲେ, ସ୍ତ୍ରୀ ଓ ଝିଅ ପୁଅ ୪ଜଣ ସଦସ୍ୟ। ପୁଅ ଉଦିତ ନାରାୟଣ କହଁର ଏବେ ଗ୍ରାଜୁଏଶନ ପାଠପଢ଼ି ଭୁବନେଶ୍ୱରଠାରେ କମ୍ପ୍ୟୁଟର ପାଠପଢ଼ୁଛି। ଘରକୁ ଆସିଲେ ଚାଷ କାମରେ ସାହାଯ୍ୟ କରନ୍ତି। ଝିଅ ପଢ଼ା ସାରି ଏକ ସଂସ୍ଥାରେ ଚାକିରି କରୁଛନ୍ତି। ଘର କାମରୁ ସମୟ ମିଳିଲେ ସ୍ତ୍ରୀ ଲଳିତା ଚାଷ କାମରେ ସାହାଯ୍ୟ କରନ୍ତି। ଲଳିନୀ କାନ୍ତଙ୍କ କହିବା ଅନୁଯାୟୀ ତାଙ୍କ ବାପା ଚକ୍ରମଣି କହଁର ୨ ଏକର ଜମିରେ ଲିଚୁ ଏବଂ ଆମ୍ବ ଗଛ ଲଗାଇଥିଲେ। ସେହି ଗଛରୁ ଲିଚୁ ଏବଂ ଆମ୍ବ ସଂଗ୍ରହ କରି ଫୁଲବାଣୀ ବଜାରରେ ଲିଚୁ କିଲୋ ୨୦୦ ଟଙ୍କାରେ ଏବଂ ଆମ୍ବ ୫୦ରୁ ୧୦୦ ଟଙ୍କା ଭିତରେ କିଲୋ ବିକ୍ରି କରି ପରିବାରର ଗୁଜୁରାଣ ମେଣ୍ଟାଉଛନ୍ତି। ଧାନ, ମାଣ୍ଡିଆ ସହିତ ପନିପରିବା ଚାଷ କରି ତାହା ମଧ୍ୟ ବଜାରରେ ନେଇ ବିକ୍ରି କରନ୍ତି। ଚାଷୀଙ୍କୁ ଚାଷ କ୍ଷେତ୍ରରେ ଆଗ୍ରହୀ କରିବା ପାଇଁ ସରକାର ବିଭିନ୍ନ ଯୋଜନା ମାଧ୍ୟମରେ ପ୍ରୋତ୍ସାହନ ଯୋଗାଇ ଦେଉଛନ୍ତି। ତେଣୁ ଆଜିର ଯୁବପିଢ଼ି ଚାଷ ପ୍ରତି ଆଗ୍ରହୀ ହୋଇ ଚାଷକଲେ ଭଲ ରୋଜଗାର କରିପାରନ୍ତେ। ସେ ସରକାରଙ୍କୁ ଅନୁରୋଧ କରି କହିଛନ୍ତି ଯେ, କୂପଟିଏ ଯୋଗାଇ ଦେଲେ ଚାଷ କରିବା ସମୟରେ ପାଣି ସମସ୍ୟା ରହନ୍ତା ନାହିଁ। ତାଙ୍କ ବାଡ଼ି ବଗିଚାର ଲିଚୁ ମିଠା ଓ ସୁଆଦିଆ ଥିବାରୁ ଗ୍ରାହକଙ୍କ ଭିଡ ଲାଗିଥାଏ। ଲିଚୁ ଫଳ ତାଙ୍କୁ ଅଞ୍ଚଳରେ ଏକ ସ୍ବତନ୍ତ୍ର ପରିଚୟ ଦେଉଛି ଏବଂ ଭଲ ରୋଜଗାର ବି ଦେଇଛି ।