ନୂଆଦିଲ୍ଲୀ: ସାରା ଦେଶରେ ଯାନବାହନ ଚଳାଚଳକୁ ବାଧାମୁକ୍ତ କରିବା ଲାଗି ସରକାର ଏକ ବଡ଼ ପଦକ୍ଷେପ ନେବାକୁ ଯାଉଛନ୍ତି। ଆଗାମୀ ୨ ବର୍ଷରେ ସରକାର ସାରା ଦେଶରେ ରହିଥିବା ଟୋଲ୍ ପ୍ଲାଜାଗୁଡିକୁ ଉଠାଇଦେବେ। କେନ୍ଦ୍ର ସଡ଼କ ଏବଂ ପରିବହନ ମନ୍ତ୍ରୀ ନୀତିନ ଗଡ଼କରୀ ଗୁରୁବାର କହିଛନ୍ତି, ଆଗାମୀ ୨ ବର୍ଷରେ ଦେଶକୁ ଟୋ୍ଲ ନାକାମୁକ୍ତ କରାଯିବ। ଏଥିଲାଗି ସରକାର ଗ୍ଲୋବାଲ ପୋଜିଶନିଂ ସିଷ୍ଟମ(ଜିପିଏସ୍)କୁ ବ୍ୟବହାର କରିବା ଲାଗି ନିଷ୍ପତ୍ତି ନେଇଛନ୍ତି। ଆଗାମୀ ୨ ବର୍ଷରେ ଟୋଲ୍ କେବଳ ଲୋକଙ୍କ ଲିଙ୍କ୍ ହୋଇଥିବା ବ୍ୟାଙ୍କଖାତାରୁ ଆପେ ଆପେ କଟିଯିବ। ଆସୋଚାମ ଫାଉଣ୍ଡେଶନ ଓ୍ବିକ୍ କାର୍ଯ୍ୟକ୍ରମକୁ ସମ୍ବୋଧିତ କରି ସେ କହିଲେ, ଜିପିଏସ୍ ସିଷ୍ଟମ ବ୍ୟବହାର ଲାଗି ଶୀଘ୍ର ଚୂଡ଼ାନ୍ତ ନିଷ୍ପତ୍ତି ନିଆଯିବ। ଫଳରେ ସାରା ଦେଶକୁ ଟୋଲ ନାକା ମୁକ୍ତ କରିବାରେ ଏହା ସହାୟକ ହେବ।
ବର୍ତ୍ତମାନ ସବୁ ବାଣିଜି୍ୟକ ଯାନରେ ଭେଇକିଲ ଟ୍ରାକିଂ ସିଷ୍ଟମ ରହିଛି। ସେହିଭଳି ପୁରୁଣା ଯାନଗୁଡ଼ିକରେ ଭେଇକିଲ ଟ୍ରାକିଂ ସିଷ୍ଟମ ସଂଯୋଗ କରିବା ଲାଗି ସରକାର କେତେକ ଯୋଜନା ହାତକୁ ନେବେ ବୋଲି ସେ ସ୍ପଷ୍ଟ କରିଛନ୍ତି। ଜିପିଏସ୍ ଟେକ୍ନୋଲୋଜି ବ୍ୟବହାର ହେଲେ ଆଗାମୀ ୫ ବର୍ଷରେ ଟୋଲ୍ ଟିକସ ବାବଦ ଭାରତୀୟ ଜାତୀୟ ରାଜମାର୍ଗ ପ୍ରାଧିକରଣ(ଏନ୍ଏଚ୍ଏଆଇ) ୧.୩୪ ଲକ୍ଷ କୋଟି ଟଙ୍କାର ଟିକସ ସଂଗ୍ରହ କରିବାକୁ ସକ୍ଷମ ହେବ ବୋଲି ଆକଳନ କରାଯାଇଛି। ଏ ନେଇ ଉଚ୍ଚସ୍ତରୀୟ ଅଧିକାରୀଙ୍କ ବୈଠକ ଅନୁଷ୍ଠିତ ମଧ୍ୟ ହୋଇଯାଇଛି। ଆଗାମୀ ୫ ବର୍ଷରେ ଟୋଲ୍ ସଂଗ୍ରହ ଉନ୍ନତ ହେବା ନେଇ ଗଡ଼କରୀ ଆଶାବାଦୀ ରହିଛନ୍ତି।
ସୂଚନାଯୋଗ୍ୟ, ସରକାର ଗୋଟିଏ ବର୍ଷ ତଳେ ଫାଷ୍ଟାଗ୍କୁ ଅନିବାର୍ଯ୍ୟ କରିଥିଲେ। ଯାନଗୁଡିକୁ ବେଶି ସମୟ ଟୋଲ୍ ପ୍ଲାଜାରେ ଛିଡ଼ା ନ ହେବା ଯୋଗୁ ପ୍ରଦୂଷଣ ମଧ୍ୟ ହ୍ରାସ ପାଇଛି। ଇଲେକ୍ଟ୍ରୋନିକ ଟୋଲ୍ କଲେକ୍ସନ ବ୍ୟବହାର ଦ୍ୱାରା କ୍ୟାଶ୍ଲେସ ନେଣଦେଣକୁ ମଧ୍ୟ ପ୍ରୋତ୍ସାହନ ମିଳିଛି। ଏହାବାଦ ଟୋଲ୍ ସଂଗ୍ରହରେ ମଧ୍ୟ ପାରଦର୍ଶିତା ଦେଖିବାକୁ ମିଳିଛି। ଫାଷ୍ଟାଗ୍ ବ୍ୟବହାର ଗତ କିଛି ମାସ ମଧ୍ୟରେ ଦ୍ରୁତ ହୋଇଛି। ନଭେମ୍ବରରେ ଏନ୍ଏଚ୍ଏଆଇ ଦେଇଥିବା ଏକ ଡାଟା ମୁତାବକ, ମୋଟ ଟୋଲ୍ ସଂଗ୍ରହର ପ୍ରାୟ ଏକଚତୁର୍ଥାଂଶ ଫାଷ୍ଟାଗ୍ରୁ ହେଉଛି।
