ମହାକାଳପଡ଼ା,୨୨ା୧(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ ଆର୍ସେଲର ମିତ୍ତଲ ଶିଳ୍ପ ପ୍ରତିଷ୍ଠା ପାଇଁ ଏକ ଟିମ୍ ପକ୍ଷରୁ ଜଙ୍ଗଲ ପାଶର୍ବ ସୀମା ଜମି ସର୍ଭେ ଆରମ୍ଭ ହୋଇଛି । ବୁଧବାର ଅପରାହ୍ନରେ ଏହି ଟିମ୍ରେ ରାଜନଗର ବନ ଖଣ୍ଡ ଅଧିକାରୀ ଭରଦ୍ୱାଜ ଗାଁଓକରଙ୍କ ସମେତ ଆର୍ସେଲର କମ୍ପାନୀର ୪ ଜଣିଆ ପ୍ରତିନିଧି ମହାକାଳପଡ଼ା ରେଞ୍ଜ ଅଧିକାରୀ ଶାନ୍ତନୁ କୁମାର ଦଳାଇ ଓ ରାଜସ୍ବ ନିରୀକ୍ଷକ ବିଜୟ କୁମାର ବେହେରାଙ୍କ ସହ ଜଙ୍ଗଲ ବିଭାଗ କର୍ମଚାରୀ ପ୍ରମୁଖ ସର୍ଭେରେ ସାମିଲ ହୋଇଥିଲେ। ଟିମ୍ ରାମନଗର ପଞ୍ଚାୟତ ମହାନଦୀ କୂଳ ସଂଲଗ୍ନ ବନବିହାରୀପୁର, ବରଜ-ବାହାକୁଦ ମୌଜାର କାଜୁ ଜଙ୍ଗଲ ଜମିଗୁଡିକରେ ଥିବା ସୀମା ଚିହ୍ନଟ ଖୁଣ୍ଟି ଦେଖି ସାଟେଲାଇଟ୍ ଓ ଜିପିଏସ୍ ମାଧ୍ୟମରେ ନକ୍ସା ପରଖି ଥିଲେ। ସର୍ଭେ କାର୍ଯ୍ୟ ଚାଲିଥିବା ବେଳେ ସନ୍ଧ୍ୟା ହେବାରୁ ଟିମ୍ ବାଟ ନ ପାଇ ବାହାକୁଦ କାଜୁ ଜଙ୍ଗଲରେ ଫସି ଯାଇଥିଲେ। ମୋବାଇଲ ଫୋନରେ ଯୋଗାଯୋଗ ହୋଇଥିଲେ ମଧ୍ୟ ଅନ୍ଧାର ଯୋଗୁ କେଉଁ ଦିଗରେ ସେମାନେ ଥିଲେ ତାହା ଜଣାପଡ଼ି ନ ଥିଲା। ଏକ ଘଣ୍ଟା ପରେ ଗ୍ରାମର କିଛି ଦୂରରେ ଏକ ବିବାହ ସାଉଣ୍ଡ ଓ ଲାଇଟ୍ ଦେଖି ଘଞ୍ଚ ଜଙ୍ଗଲରୁ ଅନ୍ଧାର ରାତିରେ ଟିମ୍ ଗାଁ ନିକଟରେ ପହଞ୍ଚିଥିଲେ। ଅନ୍ଧାର ରାତିରେ ବାଟ ପାଇବା ସମ୍ଭବ ହୋଇ ନ ଥିଲା। କାରଣ ଜଙ୍ଗଲରେ ବାର୍ହାଙ୍କ ଉପଦ୍ରବ ଥିବା ସ୍ଥାନୀୟ ଲୋକମାନେ କହିଥିବା ସେମାନେ କହିଥିଲେ। ଖରିନାସି ଓ ବତିଘର ପଞ୍ଚାୟତ ସର୍ଭେ ହେବାର କାର୍ଯ୍ୟକ୍ରମ ରହିଛି ବୋଲି ବିଭାଗ ପକ୍ଷରୁ କୁହାଯାଇଛି।