ଭୁବନେଶ୍ୱର,୫।୪(ବ୍ୟୁରୋ):ଉତ୍କଳ ବିଶ୍ୱବିଦ୍ୟାଳୟର ଚଣ୍ଡିଖୋଲସ୍ଥିତ ଦ୍ୱିତୀୟ କ୍ୟାମ୍ପସରେ ଗତ ୨ବର୍ଷ ହେବ ବିଏସ୍ସି ନର୍ସିଂ କୋର୍ସ ଆରମ୍ଭ ହୋଇଛି। ହେଲେ ଏହାର ପରିଚାଳନା ଓ ପାଠପଢ଼ା ଦାୟିତ୍ୱ ରହିଛି ଏକ ଟ୍ରଷ୍ଟ ହାତରେ। ଫଳରେ ନାନା ସମସ୍ୟା ଉପୁଜୁଥିବାରୁ ପାଠପଢ଼ା ବ୍ୟାହତ ହେଉଥିବା ଅଭିଯୋଗ ଆଣି ଛାତ୍ରୀଛାତ୍ରମାନେ ଆନ୍ଦୋଳନକୁ ଓହ୍ଲାଇଛନ୍ତି। ସୋମବାର ସେମାନେ ବାଣୀବିହାରସ୍ଥିତ ବିଶ୍ୱବିଦ୍ୟାଳୟର ମୁଖ୍ୟ କ୍ୟାମ୍ପସ୍କୁ ଆସି ପ୍ରତିବାଦ ଜଣାଇଥିଲେ। କୁଳପତିଙ୍କ କାର୍ଯ୍ୟାଳୟକୁ ଘେରାଉ କରିବା ସହ ପ୍ରଶାସନିକ ବ୍ଲକ୍ର ମୁଖ୍ୟ ଫାଠକ ବନ୍ଦ କରି ଧାରଣାରେ ବସିଥିଲେ।
ଅଭିଯୋଗ କରିଛନ୍ତି, ବିଏସ୍ସି ନର୍ସିଂ କୋର୍ସ ପରିଚାଳନା ଦାୟିତ୍ୱ ଶ୍ରୁଶୃତମ ଚାରିଟେବଲ୍ ଟ୍ରଷ୍ଟ ନେଇଛି। କୋର୍ସ ବାବଦରେ ପିଲାଙ୍କଠାରୁ ୭୫ହଜାର ଟଙ୍କା ନିଆଯାଉଥିବା ବେଳେ କୌଣସି ସୁବିଧା ସୁଯୋଗ ଦିଆଯାଉ ନାହିଁ। ଦ୍ୱିତୀୟ ବର୍ଷର ପ୍ରତି ପିଲାଙ୍କଠାରୁ ବେଆଇନ ଭାବେ ୮ହଜାର ଟଙ୍କା ନିଆଯାଉଛି। ସେହିପରି ବିଭାଗରେ ମାତ୍ର ୩ ଜଣ ଷ୍ଟାଫ୍ ଥିବାରୁ ନିୟମିତ କ୍ଲାସ ହୋଇପାରୁ ନାହିଁ। ଏହା ବାଦ୍ ଲାବରେଟୋରିରେ ଆବଶ୍ୟକ ଉପକରଣ ନ ଥିବା ବେଳେ ଲାଇବ୍ରେରି, ହଷ୍ଟେଲ ଏବଂ ଖାଇବା ପିଇବା ସମସ୍ୟା ରହୁଥିବା ଛାତ୍ରୀଛାତ୍ରମାନେ ଅଭିଯୋଗ କରିଛନ୍ତି। ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଟ୍ରଷ୍ଟ ହାତରୁ ଉକ୍ତ ଦାୟିତ୍ୱ ବାହାର କରି ନିଜେ ପରିଚାଳନା କରିବାକୁ ସେମାନେ ଦାବି କରିଛନ୍ତି। ସମସ୍ୟାର ସମାଧାନ ନ ହେଲେ ଆନ୍ଦୋଳନରୁ ହଟିବେ ନାହିଁ ବୋଲି ଛାତ୍ରୀଛାତ୍ର କହିଛନ୍ତି। ଏଥିସହ ଏ ସଂକ୍ରାନ୍ତରେ ଛାତ୍ରୀଛାତ୍ରମାନେ କୁଳପତିଙ୍କୁ ଦାବିପତ୍ର ପ୍ରଦାନ କରିଛନ୍ତି। ଯଦି ସେହି ଟ୍ରଷ୍ଟ ହାତରୁ ଦାୟିତ୍ୱ ହଟା ନ ଯାଏ, ତେବେ ଆଗକୁ ବଡ଼ ଧରଣର ରାସ୍ତାରୋକୋ କରାଯିବ ବୋଲି ଚେତାବନୀ ଦେଇଛନ୍ତି। ତେବେ ବିଶ୍ୱବିଦ୍ୟାଳୟର ଓଏସ୍ଡି କବୀର ମୋହନ ସେଠୀ ପିଲାଙ୍କୁ ବୁଝାଶୁଝା କରିବା ସହ ତୁରନ୍ତ ମାମଲାର ସମାଧାନ କରିବା ନେଇ ପ୍ରତିଶ୍ରୁତି ଦେଇଥିଲେ। ଦ୍ୱିତୀୟ କ୍ୟାମ୍ପସରେ ନର୍ସିଂ କୋର୍ସ ଦାୟିତ୍ୱ ଯେଉଁ ଟ୍ରଷ୍ଟ ନେଇଛି, ପୂର୍ବରୁ ଉକ୍ତ ସଂସ୍ଥା ନାଁରେ ବାରମ୍ବାର ଅଭିଯୋଗ ହୋଇଥିଲା। ମଙ୍ଗଳବାର ଏନେଇ ଏକ ଉଚ୍ଚସ୍ତରୀୟ ବୈଠକ କରାଯାଇ ଟ୍ରଷ୍ଟ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କର୍ତ୍ତୃପକ୍ଷ ସୂଚନା ଦେଇଛନ୍ତି।
