ଭୋଗରାଇ, ୨୬।୯ (ଡି.ଏନ.ଏ.)-ପୂର୍ବ-ମଧ୍ୟୀୟ ବଙ୍ଗୋପସାଗରରେ ସୃଷ୍ଟ ଲଘୁଚାପ ଘନୀଭୂତ ହୋଇ ଅବପାତ ରୂପ ନେବା ପରେ ଗାଙ୍ଗେୟ ସମତଳ ଅଞ୍ଚଳରେ ଶନିବାର ମଧ୍ୟାହ୍ନରୁ ପାଗର ଅବନତି ହୋଇଛି। ବାଲେଶ୍ୱର ଜିଲାର ଭୋଗରାଇ ବ୍ଲକ ଓ ଏହାର ଆଖପାଖ ଅଞ୍ଚଳରେ ବିକ୍ଷିପ୍ତ ବର୍ଷା ହୋଇଛି। ଏହି ଲଘୁଚାପ କ୍ରମଶଃ ବାତ୍ୟାରେ ପରିଣତ ହେଉଥିବା କେତେକ ପାଣିପାଗ ବିଜ୍ଞାନୀ ସୂଚନା ଦେଇଛନ୍ତି। ସୁବର୍ଣ୍ଣରେଖା ଓ ଜଳକା ନଦୀରେ ଘନ ଘନ ବନ୍ୟା ସାଙ୍ଗକୁ ଅବିଶ୍ରାନ୍ତ ବର୍ଷା ଜନଜୀବନକୁ ଦୁର୍ବିଷହ କରିଥିଲା ବେଳେ ପୁଣି ଏକ ଲଘୁଚାପଜନିତ ଝଡ଼ବର୍ଷା ଉତ୍ତର ବାଲେଶ୍ୱରବାସୀଙ୍କୁ ଚିନ୍ତାରେ ପକାଇଛି।
ସୁବର୍ଣ୍ଣରେଖା ଓ ଜଳକା ନଦୀର ବନ୍ୟା ଜଳ ହ୍ରାସ ପାଉଥିବା ବେଳେ ବନ୍ୟାବିପନ୍ନଙ୍କ ଦୁର୍ଦ୍ଦଶା ଦୟନୀୟ ହୋଇପଡିଛି। ଏବେବି ବହୁ ବିପନ୍ନ ପାଣିଘେରରେ ପିଲାଛୁଆ ଧରି ଭାଗ୍ୟକୁ ଆଦରି କଚ୍ଚାମାଟି ଘରେ ବିପଦପୂର୍ଣ୍ଣ ଅବସ୍ଥାରେ ଜୀବନ ବିତାଉଛନ୍ତି। ଚୁଲିରେ ପାଣି ଜମି ରହିଥିବାରୁ ପେଟକୁ ଦାନା ଯୋଗାଡ଼ କରିବା ସମ୍ଭବ ହୋଇପାରୁନାହିଁ। ଧୋୟା ଅଞ୍ଚଳରେ ବେକାର ଯୁବତୀଯୁବକ କାମଧନ୍ଦା ନ ପାଇ ଘରେ ବସିଛନ୍ତି। ଏଭଳି ସ୍ଥିତିରେ ଶନିବାରଠାରୁ ପାଗର ଅବନତି ଘଟି ବର୍ଷା ଆରମ୍ଭ ହୋଇଛି। ଶନିବାରଠାରୁ ସୋମବାର ପର୍ଯ୍ୟନ୍ତ ଲଘୁଚାପ ଘନୀଭୂତ ହୋଇ ପ୍ରବଳ ବର୍ଷିବା ସହିତ ବତାଶର ବେଗ ୪୦ରୁ ୬୦କି.ମି. ପର୍ଯ୍ୟନ୍ତ ବହିବ ବୋଲି ପାଣିପାଗ ବିଭାଗ ପକ୍ଷରୁ ଜଣାପଡିଛି। ସମୁଦ୍ର ଅଶାନ୍ତ ରହୁଥିବାରୁ ଗଭୀର ସମୁଦ୍ରକୁ ମାଛ ଧରିବାକୁ ଯାଇଥିବା ଟ୍ରଲର ଓ ଡ଼ଙ୍ଗାଗୁଡ଼ିକୁ ୨୫ତାରିଖ ସନ୍ଧ୍ୟା ସୁଦ୍ଧା ଫେରି ଆସିବାକୁ ପ୍ରଶାସନ ମତ୍ସ୍ୟ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି। ସମୁଦ୍ର ଉତ୍ତାଳ ହେବାରୁ ଦୀର୍ଘ ଉଦୟପୁର ତାଳସାରୀ ଡଗରା ଆଦି ବେଳାଭୂମିରେ ପର୍ଯ୍ୟଟକଙ୍କୁ ସମୁଦ୍ର ମନା କରାଯାଇଛି।