ମୁମ୍ବାଇ, ୫।୮: ବୁଧବାର ଲଗାତର ଦ୍ୱିତୀୟ ଦିନ ଲାଗି ଭାରତୀୟ ପୁଞ୍ଜିବଜାରରେ କାରବାର ଉନ୍ନତ ରହିଛି। ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ର ସେନ୍ସେକ୍ସ ପ୍ରଥମ ଥର ଲାଗି ୫୪ ହଜାର ପଏଣ୍ଟ ସ୍ତର ଟପିଛି। ବ୍ୟାଙ୍କିଙ୍ଗ୍ ଏବଂ ଫାଇନାନ୍ସିଆଲ ଷ୍ଟକ୍ କାରବାର ବଢିବା ଯୋଗୁ ସୂଚକାଙ୍କରେ ବୃଦ୍ଧି ଧାରା ଜାରି ରହିଛି। ଲଗାତର ତୃତୀୟ ସେସନ ହେବ ସୂଚକାଙ୍କ ବୃଦ୍ଧି ପାଇଛି। ବୁଧବାର ସେନ୍ସେକ୍ସ ୫୪୬ ପଏଣ୍ଟ(୧.୦୨%) ବୃଦ୍ଧି ହେବା ଯୋଗୁ ୫୪,୩୭୦ ପଏଣ୍ଟରେ ବନ୍ଦ ହୋଇଛି। ସେହିଭଳି ନ୍ୟାଶନାଲ ଷ୍ଟକ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟି କାରବାର ୧୨୮ ପଏଣ୍ଟ (୦.୭୯%) ଊର୍ଦ୍ଧ୍ୱରେ ରହିବା ଯୋଗୁ ୧୬,୨୫୮ ପଏଣ୍ଟ ସ୍ତରରେ ବନ୍ଦ ହୋଇଛି।
ସେନ୍ସେକ୍ସରେ ଭଲ କାରବାର ହାସଲ କରିଥିବା କମ୍ପାନୀ ମଧ୍ୟରେ ଏଚ୍ଡିଏଫ୍ସି, କୋଟାକ ବ୍ୟାଙ୍କ, ଆଇସିଆଇସିଆଇ ବ୍ୟାଙ୍କ, ଏଚ୍ଡିଏଫ୍ସି ବ୍ୟାଙ୍କ, ଆକ୍ସିସ ବ୍ୟାଙ୍କ ରହିଛି। ଏମାନଙ୍କ ଶେୟାର କାରବାର ପ୍ରାୟ ୪.୭୭% ବଢିଛି। ସେହିଭଳି ଟାଇଟାନ, ନେସ୍ଲେ ଇଣ୍ଡିଆ, ଅଲ୍ଟା କେମ୍କୋ, ସନ୍ ଫାର୍ମା, ମାରୁତି, ଭାରତୀ ଏୟାରଟେଲ ଭଳି କମ୍ପାନୀଗୁଡିକର ଶେୟାର ୨.୧୪% ନିମ୍ନରେ ରହିଛି।
ନିଫ୍ଟିର ବ୍ୟାଙ୍କ ଏବଂ ଫାଇନାନ୍ସ ଷ୍ଟକଗୁଡିକର ପ୍ରଦର୍ଶନ ବେଶ୍ ଭଲ ରହିଛି। ଏହା ଯଥାକ୍ରମେ ୨.୩୩% ଏବଂ ୨.୫୯% ବଢିଛି। ସେହିଭଳି କମ୍ପାନୀଗୁଡିକର ତ୍ରୈମାସିକ ଫଳାଫଳ ଉନ୍ନତ ହେବାରୁ ଏହା ବଜାର ଉପରେ ଭଲ ପ୍ରଭାବ ପକାଇଛି। ବିଶ୍ୱ ବଜାରର ସ୍ଥିତିରେ ସୁଧାର, ଘରୋଇ ବଜାରର ସ୍ବାଭାବିକ ସ୍ଥିତିକୁ ଫେରିବା ଏବଂ ଆର୍ବିଆଇ ପଦକ୍ଷେପ ଆଶାରେ ପୁଞ୍ଜି ବଜାର କାରବାର ବେଶ୍ ଉନ୍ନତ ରହିଥିବା ବଜାର ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
