ଅନୁଗୋଳ ଅଫିସ, ୨୨ା୯: ମା’ଙ୍କ ମୂର୍ତ୍ତି ଗଢ଼ା ପାଇଁ ରାଧାଷ୍ଟମୀ ଦିନ ଉଠାଯାଇଥିଲା ମାଟି। ସେବେଠୁ ଆରମ୍ଭ ହୋଇଥିବା ଅମଲାପଡ଼ା ଦୁର୍ଗା ପୂଜା ସମିତିର ପୂଜା ପ୍ରସ୍ତୁତି ଏବେ ଶେଷ ପର୍ଯ୍ୟାୟରେ। ଅନୁଗୋଳ ସହରର ସର୍ବ ପୁରାତନ ପୂଜା ଅନୁଷ୍ଠାନ ଭାବେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ଅମଲାପଡ଼ା ଦୁର୍ଗାପୂଜା ସମିତି ଏଥର ୯୬ ବର୍ଷରେ ପାଦ ଥାପିବାକୁ ଯାଉଛି। ଗତ ୨ ବର୍ଷ ନିରାଡ଼ମ୍ବରରେ ପୂଜା ଆୟୋଜନକୁ ଛାଡ଼ିଦେଲେ ପୂର୍ବରୁ କେବେ ଏଠାକାର ମଣ୍ଡପକୁ ଆବଦ୍ଧ କରାଯାଇ ନ ଥିଲା। ୧୯୨୬ରେ ତାଳ ବରଡ଼ା ଛପର ଓ ବାଉଁଶ ଖୁଣ୍ଟିରେ ମା’ଙ୍କ ପାଇଁ ମଣ୍ଡପ ନିର୍ମାଣ କରିଥିବା ଏହି ସମିତି ଚଳିତବର୍ଷ ଧୁମ୍ଧାମରେ କରୁଛି ପୂଜା ଆୟୋଜନ।
ଅମଲାପଡ଼ା ମଣ୍ଡପରେ ବଙ୍ଗୀୟ ଲୋକମାନେ ପ୍ରଥମେ ଦୁର୍ଗାପୂଜା ଆରମ୍ଭ କରିଥିଲେ। ତେଣୁ ଏଠାରେ ବଙ୍ଗୀୟ ରୀତିନୀତିରେ ପ୍ରତିବର୍ଷ ପୂଜା ପାଳନ କରାଯାଉଛି। ବିଶେଷକରି ମା’ଙ୍କୁ ମେଲାଣି ଦିଆଯିବା ସମୟରେ ଅଞ୍ଚଳର ମହିଳାମାନେ ସିନ୍ଦୂର ଖେଳିବା ଏଠାକାର ପ୍ରମୁଖ ବିଶେଷତ୍ୱ। ଏଥିସହ ସପ୍ତମୀ ଦିନରୁ ଦଶମୀ ପର୍ଯ୍ୟନ୍ତ ମା’ଙ୍କ ସନ୍ଧ୍ୟା ଆଳତି ଅନ୍ୟତମ ମୁଖ୍ୟ ଆକର୍ଷଣ। ଏଥର ମଧ୍ୟାହ୍ନରେ ପ୍ରସାଦ ସେବନ ବ୍ୟବସ୍ଥା ସହ ସନ୍ଧ୍ୟା ଆଳତି ପରେ ଭକ୍ତଙ୍କ ପାଇଁ ଖିରି ଓ କାକରା ବ୍ୟବସ୍ଥା କରାଯାଇଛି। ପରମ୍ପରା ଅନୁଯାୟୀ ଷଷ୍ଠୀରେ ବେଲବରଣ କରାଯିବ। ଏହାପରେ ସପ୍ତମୀରେ କଳସଯାତ୍ରା ଓ ଚକ୍ଷୁଦାନ ସହ ପ୍ରାଣ ପ୍ରତିଷ୍ଠା ହେବ। ଅଷ୍ଟମୀରେ ମା’ଙ୍କ ମହାଷ୍ଟମୀ ପୂଜା ସହ ରାତିରେ ତାରିଣୀ ପୂଜା ଓ ସନ୍ଧିପୂଜା ସମ୍ପନ୍ନ କରାଯିବ। ନବମୀରେ ଶାନ୍ତିପୂଜା ପାଇଁ ହୋମ ଓ ଦଶମୀରେ ବିସର୍ଜନ ନୀତି କରାଯିବ। ତେବେ ପୂଜାରେ ଯେପରି କୌଣସି ବିଘ୍ନ ନ ଘଟେ ସେଥିପାଇଁ ଅଞ୍ଚଳର ବରିଷ୍ଠ ନାଗରିକମାନେ ଏହାର ତଦାରଖ ଦାୟିତ୍ୱରେ ଅଛନ୍ତି। ପ୍ରତ୍ୟେକ ସନ୍ଧ୍ୟାରେ ଅନୁଗୋଳର କୁନି କୁନି କଳାକାରଙ୍କୁ ନେଇ ସାଂସ୍କୃତିକ କାର୍ଯ୍ୟକ୍ରମ କରାଯିବାର ବ୍ୟବସ୍ଥା କରାଯାଇଛି। ସେହିପରି ଦଶହରାରେ କଟକର ମ୍ୟୁଜିକ୍ ମାଷ୍ଟର ନାସିରଙ୍କ ଟିମ୍ ଅଞ୍ଚଳବାସୀଙ୍କୁ ମେଲୋଡିରେ ଝୁମାଇବ ବୋଲି ସମିତି ପକ୍ଷରୁ କୁହାଯାଇଛି।
