ବାସୁଦେବପୁର, ୧୦ା୮(ଡି.ଏନ୍.ଏ.)-ଭଦ୍ରକ ଜିଲା ବାସୁଦେବପୁର-ଧାମରା ରାସ୍ତା ପ୍ରଶସ୍ତୀକରଣ ବେଳେ ହାଇସ୍କୁଲ ଛକରେ ଥିବା କବି ତଥା ସ୍ବାଧୀନତା ସଂଗ୍ରାମୀ ବାଞ୍ଛାନିଧି ମହାନ୍ତିଙ୍କ ପ୍ରତିମୂର୍ତ୍ତିକୁ ପ୍ରଶାସନ ଭାଙ୍ଗି ଦେଇଥିବା ବେଳେ ଶହୀଦ ତୀର୍ଥ ଯାତ୍ରୀ ସଂଘ ପକ୍ଷରୁ କବିଙ୍କର ଏହି ଭଗ୍ନ ପ୍ରତିମୂର୍ତ୍ତିକୁ ରବିବାର ନଅଣ ପୋଖରୀରେ ବିସର୍ଜନ କରାଯାଇଛି। ପୂର୍ବାହ୍ନରେ ହାଇସ୍କୁଲ ଛକ ଠାରୁ ଏହି ଭଗ୍ନ ପ୍ରତିମୂର୍ତ୍ତିକୁ ସୁସଜ୍ଜିତ କରାଯାଇ ବାସୁଦେବପୁରରୁ ରକ୍ତତୀର୍ଥ ଇରମକୁ ନିଆଯାଇଥିଲା। ଇରମ ଗୁଳିକାଣ୍ଡର ମୁକସାକ୍ଷୀ ପାଲଟିଥିବା ଇରମ ମେଳଣ ପଡ଼ିଆ ସ୍ଥିତ ନଅଣ ପୋଖରୀରେ କବି ବାଞ୍ଛାନିଧିଙ୍କ ପ୍ରତିମୂର୍ତ୍ତିକୁ ବିସର୍ଜନ କରାଯାଇଛି। ପୂର୍ବାହ୍ନରେ ବାସୁଦେବପୁର ଠାରେ ଶହୀଦ ତୀର୍ଥଯାତ୍ରୀ ସଭାପତି ବୈଲୋଚନ ଜେନା, ସମ୍ପାଦକ ଅଧ୍ୟାପକ ବସନ୍ତ ଦାଶ, ଆଇନଜୀବୀ ବିକ୍ରମ ମହାନ୍ତି, ନାରାୟଣ ନାୟକ, ବିଜୟ ରାୟ, ବରିଷ୍ଠ ଖବରଦାତା କିଶୋର କୁମାର ମହାପାତ୍ର, ଉଦୟ ଜେନା, କବି ବନମାଳୀ ବାରିକ, ପୂର୍ବତନ ପ୍ରଧାନଶିକ୍ଷକ ଦୁଃଶାସନ ରାଉତ, ତହସିଲଦାର ସୌମ୍ୟଶ୍ରୀ ପାଣିଗ୍ରାହୀ, ବିଧାୟକଙ୍କ ପ୍ରତିନିଧି ଅସିତ ଦାଶଙ୍କ ସମେତ ବିଭିନ୍ନ ବର୍ଗର ଲୋକମାନେ ଉପସ୍ଥିତ ରହି କବି ବାଞ୍ଛାନିଧିଙ୍କ ଭଗ୍ନ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଦେଇଥିଲେ। ଇରମର ନଅଣ ପୋଖରୀ ଠାରେ ବିସର୍ଜନ କାର୍ଯ୍ୟକ୍ରମରେ ଶହୀଦ ସ୍ମୃତି କମିଟିର କର୍ମକର୍ତ୍ତା, ଇରମ ସରପଞ୍ଚ ପ୍ରଫୁଲ୍ଲ ବିଶ୍ୱାଳ, ଯୁବ ସାମାଜିକ କର୍ମୀ ଉଦୟ ନାରାୟଣ ମଲ୍ଲିକ ପ୍ରମୁଖ ଯୋଗଦାନ କରିଥିଲେ।
