ବଡ଼ଗାଁ,୩୦ା୫(ଅଶୋକ ଷଡ଼ଙ୍ଗୀ): ସୁନ୍ଦରଗଡ଼ ଜିଲା ବଡ଼ଗାଁ ବ୍ଲକ ଅନ୍ତର୍ଗତ ତୁଡାଲଗା, ବଡ଼ଗାଁ, ଫୁଲବାରୀ ଓ ଭୋଇପାଲି ପଞ୍ଚାୟତର କେତେକ ଗ୍ରାମ ନିକଟ ଦେଇ ପ୍ରବାହିତ ସଫେଇ ନଦୀ କ୍ରମଶଃ ମୃତ୍ୟୁ ମୁଖକୁ ଚାଲିଯାଉଛି। ୩୦ରୁ ୪୦ ବର୍ଷ ପୂର୍ବେ ଏହି ନଦୀର ଜଳଧାର ବର୍ଷସାରା ପ୍ରବାହିତ ହେଉଥିଲା। କିନ୍ତୁ ନଦୀର ସୁରକ୍ଷା ଅଭାବରୁ ନଦୀଶଯ୍ୟାରେ ମାଟି ପୋତି ହେବା ଯୋଗୁ ନଦୀ ଜଳଧାରଣ କ୍ଷମତା ହରାଇବସିଛି। ଏପରିକି ନଦୀ ଭିତରେ ବୁଦାଳିଆ ଜଙ୍ଗଲ ହେଲାଣି। ଫଳରେ ଏହା ନଦୀ ନା ଜଙ୍ଗଲ ଭ୍ରମ ସୃଷ୍ଟି କରୁଛି। ଏଠାରେ ଉଲ୍ଲେଖଯୋଗ୍ୟ ଯେ, ବର୍ଷାଋତୁ ପରେ ନଦୀର ଜଳଧାର ଛିନ୍ନ ହୋଇ ଠାଏଠାଏ ପାଣି ଜମିରହେ। ନଦୀ ତାର ଜଳ ଧାରଣ କ୍ଷମତା ହରାଇଥିଲାବେଲେ ନଦୀର କେତେକ ସ୍ଥାନରେ ଥିବା ଗଣ୍ଡ ନଦୀଶଯ୍ୟା ରେ ଲୀନ ହୋଇଯାଇଛି। ଫୁଲବାରୀ ନିକଟ ସଫେଇ ନଦୀର ଧୋବାତୁଠ ଗଣ୍ଡି ଆଉ ଦେଖାଯାଉନାହିଁ। ସେଠାରେ ବର୍ତ୍ତମାନ ବିଭିନ୍ନ ଗଛ ଓ ଗୁଳ୍ମ ସହିତ ବାଲୁକା ଶଯ୍ୟାର ବିସ୍ତୀର୍ଣ୍ଣ ଅଞ୍ଚଳରେ ଘାସ ଦେଖାଯାଉଛି। ନଦୀତଟରେ ଇଟା ଭାଟିଗୁଡ଼ିକର ମାଟି ଓ ପାଉଁଶ ନଦୀକୁ ପୋତି ଚାଲିଥିବାବେଳେ ମୃତ୍ତିକା ସଂରକ୍ଷଣ ଓ ନଦୀ ର ସୁରକ୍ଷା ପାଇଁ ନଦୀ ଖଣ୍ଡିରେ ଲଗାଯାଉଥିବା ଗୁଳ୍ମ ଦୀର୍ଘବର୍ଷ ହେଲା ଲଗାଯାଉନାହି। ରକ୍ଷଣାବେକ୍ଷଣ ଅଭାବରୁ ନଦୀରେ ମାଟି ପଶି ନଦୀକୁ ମତ୍ୟୁମୁହଁକୁ ଠେଲି ନେଉଛି। ଅଞ୍ଚଳର ଗୁରୁତ୍ୱପୂର୍ଣ୍ଣ ଜଳଉତ୍ସ ସଫେଇ ନଦୀର ସୁରକ୍ଷା ପ୍ରତି ସରକାରଙ୍କ ଦୃଷ୍ଟି ପଡୁନାହିଁ। ନଦୀଜଳକୁ ସେଚିତ କରିବା ଓ ପାନୀୟ ବ୍ୟବହାର ପାଇଁ ନଦୀରେ ପ୍ରକଳ୍ପ ତିଆରି ହେଉଥିଲେ ମଧ୍ୟ ନଦୀର ସୁରକ୍ଷା ପ୍ରତି ଗୁରୁତ୍ୱ ଦିଆଯାଉନାହିଁ। ଫଳସ୍ବରୁପ କ୍ରମେ ନାଳରେ ପରିଣତ ହେଇଥିବା ଏହି ନଦୀ କେବଳ ଏକ ଛୋଟ ଜଳଧାର ହୋଇ ରହିଯିବ ଆଶଙ୍କାକୁ ଏଡ଼ାଯାଇ ନ ପାରେ। ବିଭାଗୀୟ କର୍ତ୍ତୃପକ୍ଷ ଦୃଷ୍ଟି ଦେବାକୁ ଦାବି ହେଉଛି।
