ଇସଲାମାବାଦ,୧୫।୨: ପାକିସ୍ତାନର ଆର୍ଥିକ ସ୍ଥିତି ଦିନକୁ ଦିନ ବିଗିଡ଼ି ଚାଲିଛି। ଦେଶର ବାସିନ୍ଦା ଏବେ ଖାଦ୍ୟଶସ୍ୟ ଲାଗି ସଂଘର୍ଷ କରୁଛନ୍ତି। ପରିସ୍ଥିତି ଏଭଳି ଯେ କର୍ମଚାରୀଙ୍କୁ ଦରମା ଦେବା ଲାଗି ସରକାରଙ୍କ ପାଖରେ ଟଙ୍କା ନାହିଁ। ଅନେକ ଦିନ ଧରି ଦେଶ ଋଣ ବଳରେ ଚାଲିଥିଲା। ହେଲେ ତାହା ଶେଷ ହେବାକୁ ବସିଲାଣି। ଏପରିକି ପାକିସ୍ତାନ ସହ ଭଲ ସମ୍ପର୍କ ରଖିଥିବା ସମସ୍ତ ଦେଶ ଏବଂ ଅର୍ଥନୈତିକ ସଂଗଠନଗୁଡ଼ିକ ପକ୍ଷରୁ ସହାୟତାର ମାର୍ଗ ମଧ୍ୟ ବନ୍ଦ ହୋଇଯାଇଛି। ଏଥିଲାଗି ସରକାରଙ୍କ ଅସୁବିଧା ବଢ଼ିବାରେ ଲାଗିଛି। ଯଦି ଏଭଳି ସ୍ଥିତି ଲାଗି ରୁହେ ତେବେ ଦେଶର ଅବସ୍ଥା ଶ୍ରୀଲଙ୍କା ଭଳି ହୋଇପାରେ ବୋଲି ବିଶେଷଜ୍ଞମାନେ ଆକଳନ କରୁଛନ୍ତି।
ପାକିସ୍ତାନର ସ୍ଥିତିକୁ ନେଇ ଏବେ ଲୋକମାନେ ଦେଶ ଛାଡ଼ିବା ଆରମ୍ଭ କରି ଦେଇଛନ୍ତି। ଏକ ରିପୋର୍ଟରେ ଦାବି କରାଯାଇଛି ଯେ ପାକିସ୍ତାନରୁ ବିଦେଶ ଯାଉଥିବା ଲୋକଙ୍କ ସଂଖ୍ୟା ହଠାତ ବୃଦ୍ଧି ପାଇଛି। ଦେଶରୁ ଜୀବନ ବଞ୍ଚାଇ ଚାଲିଯିବାକୁ ଧନଶାଳୀ ବ୍ୟକ୍ତି ଚାହୁଁଛନ୍ତି। ୨୦୨୨ରେ ୮ ଲକ୍ଷରୁ ଅଧିକ ଲୋକ ପାକିସ୍ତାନ ଛାଡ଼ିଥିଲେ। ୨୦୨୧ ତୁଳନାରେ ଦେଶ ଛାଡ଼ୁଥିବା ଲୋକଙ୍କ ସଂଖ୍ୟା ୨୦୦% ବୃଦ୍ଧି ପାଇଛି।
