ବରଗଡ଼,୨୪।୧୨(ପ୍ରେମାନନ୍ଦ ଖମାରୀ):ବରଗଡ଼ର ସ୍ବେଚ୍ଛାସେବୀ ସଙ୍ଗଠନ ନିଷ୍ଠା ପରିବାର ପକ୍ଷରୁ ୨୦୨୫ ଜାନୁୟାରୀ ୧ତାରିଖରୁ ଫେବୃୟାରୀ ୨ତାରିଖ ପର୍ଯ୍ୟନ୍ତ ୩୩ ଦିନ ଧରି ରେଡ୍ ଡ୍ରପ୍ ମାରାଥନ୍ କରାଯିବ। ଜିଲାର ବିଭିନ୍ନ ସ୍ଥାନରେ ଶିବିର କରାଯାଇ ରକ୍ତ ସଂଗ୍ରହ କରାଯିବ ବୋଲି ସୋମବାର ବରଗଡ଼ ସାମ୍ବାଦିକ ସଂଘ ସଭାକକ୍ଷରେ ଅନୁଷ୍ଠିତ ଖବରଦାତା ସମ୍ମିଳନୀରେ ସଙ୍ଗଠନର କର୍ମକର୍ତ୍ତାମାନେ ସୂଚନା ଦେଇଛନ୍ତି। ଖବରଦାତା ସମ୍ମିଳନୀରେ ଉକ୍ତ ସଙ୍ଗଠନର ଉପଦେଷ୍ଟା ଅଶ୍ୱିନୀ ତ୍ରିପାଠୀ ସୂଚନା ଦେଇ କହିଥିଲେ, ନିଷ୍ଠା ପରିବାର ସବୁବେଳେ ଅସହାୟ, ଦୁଃଖୀ, ନିରାଶ୍ରୟ ରୋଗୀଙ୍କ ସେବା ସହିତ ସ୍ବାସ୍ଥ୍ୟ ଶିବିର, ରକ୍ତଦାନ ଶିବିର, ଚକ୍ଷୁ ଚିକିତ୍ସା ଶିବିର, ନିଷ୍ଠା ଜୀବନ ରେଖା ଆମ୍ବୁଲାନ୍ସ ସେବା ଯୋଗାଇ ଆସୁଥିବାବେଳେ କରୋନା କାଳରେ ମଧ୍ୟ ଲୋକଙ୍କୁ ଯଥାସମ୍ଭବ ସେବା ଯୋଗାଇଥିଲା। ତେବେ ଆସନ୍ତା ନବବର୍ଷ ପହିଲାରୁ ନିଷ୍ଠା ପରିବାର ଅଭିନବ ରକ୍ତ ସଂଗ୍ରହ ଅଭିଯାନ ରେଡ୍ ଡ୍ରପ୍ ମାରାଥନ୍ କାର୍ଯ୍ୟକ୍ରମ ଆରମ୍ଭ କରିବ ଏବଂ ଆଗାମୀ ୨୫ତାରିଖ ବରଗଡ଼ ବିଜୁ ପଟ୍ଟନାୟକ ଟାଉନ ହଲରେ ଉକ୍ତ କାର୍ଯ୍ୟକ୍ରମର ଉଦ୍ଘାଟନୀ ସମାରୋହ ଅନୁଷ୍ଠିତ ହେବ। ସଙ୍ଗଠନ ସଭାପତି ରକ୍ଷପାଳ ସାହୁ କହିଥିଲେ, ୨୦୧୦ ଜୁନ ୧୪ତାରିଖରୁ ନିଷ୍ଠା ପରିବାର ଲୋକଙ୍କୁ ସେବା ଯୋଗାଇ ଆସୁଛି। ବିଭିନ୍ନ ପର୍ବପର୍ବାଣୀ, ଜନ୍ମଦିନ, ଶ୍ରାଦ୍ଧବାର୍ଷିକୀ ଆଦି କାର୍ଯ୍ୟକ୍ରମରେ ରକ୍ତଦାନ ଶିବିର କରାଯାଉଛି। ଏଭଳି କାର୍ଯ୍ୟକ୍ରମରେ ଦିନକୁ ଦିନ ରକ୍ତଦାନ ପାଇଁ ଲୋକଙ୍କ ଆଗ୍ରହ ବଢ଼ି ଚାଲିଛି। ତେବେ ରେଡ୍ ଡ୍ରପ୍ ମାରାଥନ୍ କାର୍ଯ୍ୟକ୍ରମ ଲୋକଙ୍କ ସେଭଳି ଆଗ୍ରହକୁ ଆହୁରି ଦ୍ୱିଗୁଣିତ କରିବ। ୩୩ଦିନର ରେଡ୍ ଡ୍ରପ୍ ମାରାଥନ କାର୍ଯ୍ୟକ୍ରମରେ ୮ଦିନ ବରଗଡ଼ ଧନୁଯାତ୍ରା ମହୋତ୍ସବରେ ଏବଂ ଅନ୍ୟଦିନ ଗୁଡ଼ିକରେ ଜିଲାର ବିଭିନ୍ନ ଗ୍ରାମରେ ରକ୍ତଦାନ ଶିବିର ହେବ। ବରଗଡ଼, ବୁର୍ଲା, ପଦ୍ମପୁର ଏବଂ ସମ୍ବଲପୁର ରକ୍ତଭଣ୍ଡାର କର୍ମଚାରୀମାନେ ରକ୍ତ ସଂଗ୍ରହ କରିବେ ବୋଲି ସଭାପତି ସାହୁ ସୂଚନା ଦେଇଥିଲେ। ଖବରଦାତା ସମ୍ମିଳନୀରେ ସଙ୍ଗଠନର ଅନ୍ୟତମ ଉପଦେଷ୍ଟା ସଚି ପଣ୍ଡା, ସମ୍ପାଦକ ଲୋକନାଥ ସାହୁ, କ୍ଷୀରୋଦ୍ର ସାହୁ, ମଦନ ମୋହନ ଦାଶ ପ୍ରମୁଖ ଉପସ୍ଥିତ ଥିଲେ।
