ଭବାନୀପାଟଣା: ୨୭ା୧୨ (ଉତ୍ତମ କୁମାର ଦାଶ): ଦୁଇଦିନର ଲଗାଣ ବର୍ଷା ଚାଷୀଙ୍କ ସମସ୍ତ ସ୍ବପ୍ନ ଓ ସମ୍ଭାବନାକୁ ଧୋଇନେଇଛି। ଆର୍ଥିକ ଅବସ୍ଥା ସ୍ବଚ୍ଛଳ ନ ଥିବା ଚାଷୀ ମୁଣ୍ଡରେ ହାତଦେଇ ବସିଛି। ଗୁରୁବାର ସକାଳେ ବର୍ଷା ଛାଡିଥିଲେ ମଧ୍ୟ ଚାଷୀଙ୍କ ଦୁର୍ଦ୍ଦଶା ବଢିଛି। କ୍ଷେତରେ ଥିବା ଧାନ ପାଣିରେ ବୁଡିରହିଛି। ସେହିପରି ଖଳା ଓ ମଣ୍ଡିରେ ଥିବା ଧାନ ମଧ୍ୟ ଭିଜିଯାଇଛି।
ଚଳିତ ଖରିଫ ଋତୁରେ ସରକାର କଳାହାଣ୍ଡି ଜିଲା ପାଇଁ ଧାନ କ୍ରୟ ଲାଗି ୫୦ ଲକ୍ଷ କୁଇଣ୍ଟାଲର ଟାର୍ଗେଟ ଦେଇଛନ୍ତି। ମଙ୍ଗଳବାର ସୁଦ୍ଧା ୨୫ ହଜାର ଚାଷୀଙ୍କ ୧୧ ଲକ୍ଷ ୭୩ ହଜାର କୁଇଣ୍ଟାଲ ସଂଗ୍ରହ ହୋଇପାରିଛି। ବର୍ତ୍ତମାନ ବି ହଜାର ହଜାର ଚାଷୀଙ୍କ ଧାନ ମଣ୍ଡିରେ ତ ଆଉ କେତେକ ଖଳାରେ ରହିଛି। ଗତ କିଛିଦିନ ଧରି ଭବାନୀପାଟଣା ସଦର ବିଧାୟକ ସାଗର ଚରଣ ଦାସ ନିଜ ନିର୍ବାଚନ ମଣ୍ଡଳୀର ବିଭିନ୍ନ ମଣ୍ଡିକୁ ଯାଇ ସ୍ଥିତିକୁ ଅତି ନିକଟରୁ ଦେଖିଥିଲେ। ଚାଷୀ ସବୁପ୍ରକାର ସମସ୍ୟାର ଶିକାର ହେଉଥିବା ହୃଦବୋଧ କରିଥିଲେ। ସେ କହିଥିଲେ, ସରକାର ପୂର୍ବରୁ ଜିରୋ କଟିଂ ଓ ଦଲାଲ ମୁକ୍ତ ମଣ୍ଡି ଘୋଷଣା କରିଥିଲେ। ସମୟକ୍ରମେ କୌଣସି ଘୋଷଣା କାର୍ଯ୍ୟକାରୀ ହେଲାନାହିଁ। ଚାଷୀ ସେମିତି ଶୋଷଣର ଶିକାର ହେବା ସାର ହେଲା। ତେଣୁ ଆସନ୍ତା ୨୮ରେ ସମଗ୍ର ଭବାନୀପାଟଣା ନିର୍ବାଚନ ମଣ୍ଡଳୀରେ ବନ୍ଦ ଡାକରା ଦିଆଯାଇଛି। ମଣ୍ଡିରେ ଅବ୍ୟବସ୍ଥା ହିଁ ବନ୍ଦ ଡାକରାର ମୁଖ୍ୟ ଉଦ୍ଦେଶ୍ୟ ବୋଲି ବିଧାୟକ ଦାସ ପ୍ରକାଶ କରିଛନ୍ତି।
କଳାହାଣ୍ଡି ଜିଲାପାଳ ମଧ୍ୟ ଧାନ ସଂଗ୍ରହ ଯେପରି ବ୍ୟବସ୍ଥିତ ଢଙ୍ଗରେ ହୋଇପାରିବ ସେ ନେଇ ବାରମ୍ବାର ବୈଠକ କରିଥିଲେ। ଚଳିତ ୨୦୨୪-୨୫ ବର୍ଷ ଖରିଫ ଫସଲ ପାଇଁ ଜିଲାରେ ୧୧୪୭୫୮ଜଣ ଚାଷୀ ନାମ ପଞ୍ଜୀକୃତ କରିଥିବା ବୈଠକରେ କୁହାଯାଇଥିବାବେଳେ ଏବେ ମାତ୍ର ୨୫ପ୍ରତିଶତ ଚାଷୀ ଧାନ କ୍ରୟରେ ଅଂଶଗ୍ରହଣ କରିଛନ୍ତି। କୁଇଣ୍ଟାଲ ପିଛା ଧାନର ଏମ୍ଏସ୍ପି ମୂଲ୍ୟ ୨୩ଶହ ଟଙ୍କା ସହିତ ଇନ୍ପୁଟ ସହାୟତା ରାଶି ୮ଶହ ଟଙ୍କା ମିଶି ୩୧ଶହ ଟଙ୍କା ଚାଷୀଙ୍କୁ ଦିଆଯିବାକୁ ସରକାର ନିଷ୍ପତ୍ତି ନେଇଛନ୍ତି। ତେବେ ଧାନର ମାନ ନିର୍ଦ୍ଧାରଣ ବ୍ୟବସ୍ଥାରେ ଚାଷୀ ଅସନ୍ତୁଷ୍ଟ ରହୁଛି କାହିଁକି ସେ କଥା କେହି ବୁଝିବା ଅବସ୍ଥାରେ ନ ଥିବା ଲକ୍ଷ୍ୟ କରାଯାଇଛି। ତେଣୁ ଚାଷୀ ମଣ୍ଡିକୁ ଗଲେ କଟ୍ନିର ଭୟ। ଉଚିତ ପ୍ରାପ୍ୟ ମିଳିବା କଷ୍ଟ। ଟୋକନ ଅନୁସାରେ ଧାନ କିଣାବିକା ହେବା ବେଳକୁ ଧାନକୁ ସୁରକ୍ଷିତ ରହିବା କାଠିକର ବିଷୟ ବୋଲି ଚାଷୀ କହିଛନ୍ତି। ସରକାର ତୁରନ୍ତ ପଦକ୍ଷେପ ଗ୍ରହଣ କରିବାକୁ ଚାଷୀମାନେ ଦାବି କରିଛନ୍ତି।
