ନୂଆଦିଲ୍ଲୀ,୨୬।୪: କରୋନା ମହାମାରୀର ୨ୟ ଲହର ଯୋଗୁ ଦେଶରେ ସଂକ୍ରମଣ ସଂଖ୍ୟା ଦ୍ରୁତଗତିରେ ବୃଦ୍ଧି ପାଉଛି। ଫଳରେ ଅଚାନକ ରୋଗୀ ସଂଖ୍ୟା ବୃଦ୍ଧି ଯୋଗୁ ଦେଶରେ ଏକ ପ୍ରକାରର ମେଡିକାଲ ସ୍ତରରେ ଅସ୍ଥିରତା ଦେଖାଦେଇଛି। ଗୋଟିଏ ପଟରେ ରୋଗୀ ସଂଖ୍ୟା ବୃଦ୍ଧି ଅନ୍ୟପକ୍ଷରେ ମେଡିକାଲଗୁଡିକରେ ଲିକୁଇଡ ମେଡିକାଲ ଅକ୍ସିଜେନ ବା ତରଳ ମେଡିକାଲ ଅମ୍ଳଜାନ (ଏଲଏମଓ)ର ଅଭାବ ପରିଲକ୍ଷିତ ହୋଇଛି। ସବୁଠାରୁ ବଡକଥା ମେଡିକାଲଗୁଡିକରେ ଆବଶ୍ୟକ ପରିମାଣରେ ଅମ୍ଲଜାନ ନ ଥିବାରୁ ବାହାର ରାଜ୍ୟ ଗୁଡିକରୁ ଉକ୍ତ ରାଜ୍ୟର ସରକାର ଅମ୍ଳଜାନ ଆଣିବାକୁ ବାଧ୍ୟ ହେଉଛନ୍ତି। ଏଭଳି ପରିସ୍ଥିତିରେ ପରିବହନ ଏକ ଗୁରୁତ୍ୱପୂର୍ଣ୍ଣ ବିଷୟ ହୋଇଥିବାରୁ ଭାରତୀୟ ରେଲଓ୍ବେ ଏହାକୁ ଚ୍ୟାଲେଞ୍ଜ ଭାବେ ଗ୍ରହଶ କରିଛି।
ସରକାର ମଧ୍ୟ ରେଳପଥକୁ ଗ୍ରିନ କରିଡର ଘୋଷଣା କରିଛନ୍ତି। ଆଗାମୀ ୨୪ ଘଣ୍ଟା ମଧ୍ୟରେ ଭାରତୀୟ ରେଲଓ୍ବେ ୧୪୦ ମେଟ୍ରିକ ଟନରୁ ଊର୍ଦ୍ଧ୍ୱ ପରିମାଣର ଏଲ୍ଏମ୍ଓ ପରିବହନ କରିବାକୁ ଯାଉଛି। ବର୍ତ୍ତମାନ ସମୟରେ ୯ଟି ଟ୍ୟାଙ୍କର ବୋକାରୋ ପ୍ଲାଣ୍ଟରୁ ଆବଶ୍ୟକୀୟ ପରିମାଣର ଅମ୍ଳଜାନ ଧରି ଯାତ୍ରା କରିସାରିଛି। ସେଥିମଧ୍ୟରୁ ୫ଟି ଗାଡି ରାତି ସୁଦ୍ଧା ୟୁପିର ଲକ୍ଷ୍ନୌରେ ଏବଂ ବାକି ୪ଟି ଆସନ୍ତାକାଲି ସକାଳ ସୁଦ୍ଧା ଲକ୍ଷ୍ନୌରେ ପହଞ୍ଚତ୍ୟିବ ବୋଲି ରେଲଓ୍ବେ ପକ୍ଷରୁ କୁହାଯାଇଛି। ସେହିଭଳି ରେଲଓ୍ବେର ୧୦ଟି ଗାଡି ପ୍ରାୟ ୧୫୦ ଟନ ଏଲ୍ଏମ୍ଓ ନେଇ ମୁମ୍ବାଇରୁ ଭାଇଜାଗ ଭାୟା ନାଗପୁର ଏବଂ ନାସିକ ଓ ଲକ୍ଷ୍ନୌରୁ ବୋକାରୋରୁ ଯାଉଥିବା ଜଣାପଡିଛି।
