ମୁମ୍ବାଇ,୧୪ା୭: ମହାରାଷ୍ଟ୍ରର ଚନ୍ଦ୍ରପୁର ନିକଟ ଦୁର୍ଗାପୁରରେ ଏକ ପରିବାରର ୬ ଜଣ ସଦସ୍ୟଙ୍କ ମୃତ୍ୟୁ ଘଟିଛି। ବିଦ୍ୟୁତ୍ ଚାଲିଯିବାରୁ ଜେନେରେଟର ଲଗାଇ ପୂରା ପରିବାର ଶୋଇଥିଲେ। ଏହି ସମୟରେ ଜେନେରେଟର ଧୂଆଁରେ ପୂରା କୋଠରି ଛାଇ ଯାଇଥିଲା। ଫଳରେ ୬ ଜଣଙ୍କ ଜୀବନ ଯାଇଥିବା ବେଳେ ଜଣେ ଗୁରୁତର ହୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି। କିଛିଦିନ ତଳେ ଏକ ପରିବାରରେ ବିବାହ ଉତ୍ସବ ସମ୍ପନ୍ନ ହୋଇଥିଲା। ଏହି ଘଟଣାରେ ବରକନ୍ୟାଙ୍କ ମଧ୍ୟ ମୃତ୍ୟୁ ଘଟିଛି।
ଚନ୍ଦ୍ରପୁର ସହରର ଦୁର୍ଗାପୁରର ୩ ନଂ ଓ୍ବାର୍ଡରେ ଏହି ଘଟଣା ଘଟିଛି। ମଙ୍ଗଳବାର ରାତିରେ ବିଜୁଳି ଚାଲିଯିବାରୁ ରମେଶ ଲସ୍କର ନାମକ ଜଣେ ବ୍ୟକ୍ତିଙ୍କ ପରିବାରର ୬ ଜଣଙ୍କ ଜୀବନ ଯାଇଛି। ଗତକାଲି ବର୍ଷା ହୋଇଥିବାରୁ ବିଜୁଳି ଚାଲିଯାଇଥିଲା। ତେଣୁ ପରିବାର ଲୋକେ ଜେନେରେଟର ଲଗାଇ ଶୋଇଥିଲେ। ଜେନେରେଟର ଧୂଆଁ ସମସ୍ତ କୋଠରିରେ ଖେଳେଇ ଯାଇଥିଲା। ଫଳରେ ନିଦରେ ଶୋଇଥିବାରୁ ଏହା ପରିବାର ଲୋକେ ଜାଣିପାରି ନ ଥିଲେ। ଘଟଣା ଜଣା ପଡ଼ିବା ପରେ ଲସ୍କର ପରିବାରର ସମସ୍ତ ସଦସ୍ୟଙ୍କୁ ହସ୍ପିଟାଲ ନିଆଯାଇଥିଲା। ମାତ୍ର ସେଠାରେ ୬ ଜଣଙ୍କର ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଥାଇ ଚିକିତ୍ସିତ ହେଉଛନ୍ତି। ମୃତକମାନେ ହେଲେ ରମେଶ ଲସ୍କର, ଅଜୟ ଲସ୍କର, ଲଖନ ଲସ୍କର, କୃଷ୍ଣା ଲସ୍କର, ପୂଜା ଲସ୍କର, ମାଧୁରୀ ଲସ୍କର। ଗୁରୁତର ଜଣକ ହେଲେ ଦାସୁ ଲସ୍କର।
