ରାଉରକେଲା ଅଫିସ,୧୪।୪: ରାଉରକେଲା ସହରକୁ ବିଦ୍ୟୁତ୍ ଯୋଗାଣକୁ ସୁଗମ କରିବା ପାଇଁ ବିଭିନ୍ନ ସ୍ଥାନରେ ଟ୍ରାନ୍ସଫର୍ମର ଲାଗିଛି। କିନ୍ତୁ ଏହି ଟ୍ରାନ୍ସଫର୍ମର ଗୁଡିକ ମୁକୁଳା ପଡିଥିବାରୁ ବିପଦ ଆଶଙ୍କା ସୃଷ୍ଟି ହୋଇଛି।
ସୂଚନା ଅନୁସାରେ, ରାଉରକେଲାର ପିସିଆଇ ଛକ ନିକଟବର୍ତ୍ତୀ ଓଭରବ୍ରିଜ ତଳ, ବ୍ରାହ୍ମଣୀସେତୁ ନିକଟ ଓ ବିରଜାପାଲି ନୂତନ ସିଭିଲ କୋର୍ଟ ସମ୍ମୁଖରେ ଥିବା ଟ୍ରାନ୍ସଫର୍ମର ମୁକୁଳା ଅବସ୍ଥାରେ ରହିଛି। ଏହିସବୁ ସ୍ଥାନେରେ ପାଚେରୀ ନ ଥିବାରୁ ଯେକୌଣସି ସମୟରେ ବିପଦର ଆଶଙ୍କା ରହିଛି। ସେହିପରି ଏଡିଏମ୍ ଅଫିସକୁ ଯାଇଥିବା ରାସ୍ତାରେ ବିଦ୍ୟୁତ୍ ଖୁଣ୍ଟ ଢଳିପଡିଛି। ବିଭାଗୀୟ କର୍ତ୍ତୃପକ୍ଷ ଏ ଦିଗରେ ବିହିତ ପଦେକ୍ଷେପ ନେବାକୁ ଦାବି ହେଉଛି। ପିସିଆଇ ଛକ ଓଭରବ୍ରିଜ୍ ନିକଟ ଟ୍ରାନ୍ସଫର୍ମର ଓ ବ୍ରାହ୍ମଣସେତୁ ନିକଟ ବିଦ୍ୟୁତ୍ ଖୁଣ୍ଟ ସମ୍ପର୍କରେ କଲୁଙ୍ଗା ବିଦ୍ୟୁତ୍ ବିଭାଗ ଏସ୍ଡିଓ ଅବିନାଶ ରଥଙ୍କୁ ପଚାରିବାରୁ ବିଭାଗୀୟ ଜେଇଙ୍କୁ ଜଣାଇ ମାଟିତଳେ ପୋତି ହୋଇଥିବା ଟ୍ରାନ୍ସଫର୍ମର ଓ ଢଳି ରହିଥିବା ବିଦ୍ୟୁତ୍ ଖୁଣ୍ଟକୁ ମରାମତି କରାଯିବ ବୋଲି କହିଥିଲେ। ସେହିପରି ଉଦିତନଗର ବିଦ୍ୟୁତ୍ ବିଭାଗ ଏସ୍ଡିଓ ମନୋରଞ୍ଜନ ସାହୁଙ୍କୁ ପଚାରିବାରୁ ସେ କହିଲେ, ବିରଜାପାଲି ଟ୍ରାନ୍ସଫର୍ମର ପୋଲ ଉପରେ ରହିଛି। ଏଣୁ ପାଚେରି ନିର୍ମାଣ କରାଯାଉନାହିଁ। ଯଦି ଏହା ସମସ୍ୟା ସୃଷ୍ଟି କରୁଛି ତେବେ ବିଭାଗୀୟ ଉଚ୍ଚକର୍ତ୍ତୃପକ୍ଷଙ୍କୁ ଜଣାଇ ପାଚେରି ନିର୍ମାଣ ପାଇଁ ବିହିତ ପଦକ୍ଷେପ ନିଆଯିବ ବୋଲି ସାହୁ କହିଥିଲେ।
