ରାଞ୍ଚି,୩୦।୬: ଆର୍ଥିକ ସମସ୍ୟା ଯୋଗୁ ଝାଡଖଣ୍ଡର ରାମଗଡ ଜିଲାରେ ପରିବା ବିକୁଛନ୍ତି ଏହି ମହିଳା ଖେଳାଳି। ଏହି ଘଟଣା ସର୍ବସମ୍ମୁଖକୁ ଆସିବା ପରେ ପ୍ରଶାସନ ପକ୍ଷରୁ ସହାୟତାର ହାତ ବଢ଼ିଛି। ସୂଚନାଯୋଗ୍ୟ, ଆଥ୍ଲେଟ୍ ଗୀତା କୁମାରୀଙ୍କ ଆର୍ଥିକ ସ୍ଥିତି ସ୍ବଚ୍ଛଳ ନ ଥିବାରୁ ସହରର ବିଭିନ୍ନ ଗଳିରେ ବାଧ୍ୟ ହୋଇ ସେ ପରିବା ବିକୁଛନ୍ତି। ଏହି ଘଟଣା ସାମ୍ନାକୁ ଆସିବା ପରେ ଏଥିରେ ମୁଖ୍ୟମନ୍ତ୍ରୀ ହସ୍ତକ୍ଷେପ କରିଛନ୍ତି। ଏହାପରେ ରାମଗଡ଼ ଜିଲା ପ୍ରଶାସନ ପକ୍ଷରୁ ସୋମବାର ଗୀତାଙ୍କୁ ୫୦ହଜାର ଟଙ୍କା ଏବଂ ଆଥ୍ଲେଟ୍ରେ ନିଜର କ୍ୟାରିୟର ଗଢ଼ିବା ପାଇଁ ମାସିକ ୩ହଜାର ଟଙ୍କା ସହାୟତା ରାଶି ପ୍ରଦାନ କରାଯାଇଛି। ଏନେଇ ମୁଖ୍ୟମନ୍ତ୍ରୀ ସୋରେନ ଟୁଇଟ କରି ସୂଚନା ଦେଇଛନ୍ତି। ସୂଚନା ମୁତାବକ ଗୀତା ପରିବା ବିକିବା ସହ ହଜାରିବାଗ ଆନନ୍ଦ କଲେଜରେ ବି.ଏ.ର ଅନ୍ତିମ ଛାତ୍ରୀ ରହିଛନ୍ତି। ଏତଦ୍ ବ୍ୟତୀତ ରାଜ୍ୟ ସ୍ତରରେ ହେଉଥିବା ପ୍ରତିଯୋଗୀତାରେ ଗୀତା ୮ଟି ମେଡାଲ ହାସଲ କରିଛନ୍ତି। ଏଥିସହ କୋଲକାତାରେ ଆୟୋଜିତ ହୋଇଥିବା ପ୍ରତିଯୋଗୀତାରେ ଗୀତା ଏକ ସିଲ୍ଭର ଓ ବ୍ରଞ୍ଜ ମେଡାଲ ଜିତିଥିଲେ।
