ପୁରୀ ଅଫିସ,୧୮।୩:ନ୍ୟାଶନାଲ ସିକ୍ୟୁରିଟି ଗାର୍ଡ (ଏନ୍ଏସ୍ଜି)ର ୩ ଜଣିଆ ଟିମ୍ ବୁଧବାର ପୁରୀରେ ପହଞ୍ଚି ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା ଅନୁଧ୍ୟାନ କରିଛି। ଏହି ଟିମ୍ର ସଦସ୍ୟମାନେ ପ୍ରଥମେ ଉତ୍ତର ଦ୍ୱାର ଓ ପରେ ଶ୍ରୀମନ୍ଦିର ଚାରିପାଖ ବୁଲି ସ୍ଥିତି ସମୀକ୍ଷା କରିଛନ୍ତି। ଏଥିସହ ଶ୍ରୀମନ୍ଦିର ନକ୍ସା ଦେଖିଛନ୍ତି। ଆସିଷ୍ଟାଣ୍ଟ କମାଣ୍ଡର କୌଶିକ ନାୟକ ଏହି ଟିମ୍ର ସଦସ୍ୟମାନଙ୍କୁ ଶ୍ରୀମନ୍ଦିର ଚାରିପାଖ ବୁଲାଇ ଦେଖାଇଥିଲେ। ପରେ ସେମାନେ ଶ୍ରୀମନ୍ଦିର ବ୍ୟାରିକେଡ୍ ଓ ଦକ୍ଷିଣ ଦ୍ୱାରକୁ ଯାଇ ସୁରକ୍ଷା ବ୍ୟବସ୍ଥା ଯାଞ୍ଚ କରିଥିଲେ। ୭୫ ମିଟର ସ୍ବତନ୍ତ୍ର କରିଡର ବୁଲିବା ପରେ ଏନ୍ଏସ୍ଜି ଟିମ୍ ଫେରିଯାଇଛି। ଏହି ଯାଞ୍ଚ ଅବସରରେ ଏସ୍ପି କନୱର ବିଶାଲ ସିଂ ଉପସ୍ଥିତ ଥିଲେ। ଏ ନେଇ ଜିଲାପାଳ ସମର୍ଥ ବର୍ମା କହିଛନ୍ତି, ଏନ୍ଏସ୍ଜି ଟିମ୍ ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା ଅନୁଧ୍ୟାନ କରିଛି। ଏ ସଂକ୍ରାନ୍ତ ଇଣ୍ଟରନାଲ୍ ରିପୋର୍ଟ ଗୃହ ବିଭାଗକୁ ଦେବ। ସୁରକ୍ଷା ବ୍ୟବସ୍ଥାରେ କୌଣସି ସମସ୍ୟା ଥିବା କେନ୍ଦ୍ର ସରକାରଙ୍କ ପକ୍ଷରୁ ସୂଚନା ମିଳିଲେ ଜିଲା ପ୍ରଶାସନ ଆବଶ୍ୟକ ପଦକ୍ଷେପ ନେବ। ଏଥିଲାଗି ଆମେ ସର୍ବଦା ସଜାଗ ଓ ପ୍ରସ୍ତୁତ ରହିଛୁ ବୋଲି ଜିଲାପାଳ ପ୍ରକାଶ କରିଛନ୍ତି।
