ହାଟଡିହୀ,୯l୩(ଡି.ଏନ.ଏ.) :
ଆନନ୍ଦପୁର-ଭଦ୍ରକ ୫୩ନଂ ରାଜ୍ୟ ରାଜପଥର କେନ୍ଦୁଝର ଜିଲା ହାଟଡିହୀ ତହସିଲ ଛକ ନିକଟରେ ମଙ୍ଗଳବାର ଏକ ଘରୋଇ ବସ୍ରେ ହଠାତ୍ ନିଆଁ ଲାଗିଯାଇଥିଲା। ଅପରାହ୍ନ ପ୍ରାୟ ୧ଟାରେ ପାଖାପାଖି ୫୦ ଯାତ୍ରୀ ଧରି ଭଦ୍ରକରୁ ଆନନ୍ଦପୁର ଅଭିମୁଖେ ଶ୍ରୀଲକ୍ଷ୍ମୀ ନାମକ ଏକ ବସ୍ ଆସୁଥିଲା। ହାଟଡିହୀ ତହସିଲ ଛକ ନିକଟରେ ହଠାତ ଧୂଆଁ ବାହାରିବାରୁ ଯାତ୍ରୀ ମାନେ ଭୟଭୀତ ହୋଇ ତଳକୁ ଓହ୍ଲାଇ ପଡିଥିଲେ। ଏହି ଘଟଣାରେ କେହି ଆହତ ହୋଇନାହାନ୍ତି। ଭୟରେ ଡ୍ରାଇଭର, କଣ୍ଡକ୍ଟର, ହେଲପର୍ ଗାଡି ଛାଡି ପଳାଇଥିଲେ। ସ୍ଥାନୀୟ ଲୋକଙ୍କ ସାହାଯ୍ୟରେ ଯାତ୍ରୀମାନେ ବସ୍ରେ ପାଣି ପକାଇ ନିଆଁ ଲିଭାଇଥିଲେ। ତେବେ ଯାନ୍ତ୍ରିକ ତ୍ରୁଟି ଯୋଗୁ ଏଭଳି ଘଟିଥିବା ସନ୍ଦେହ କରାଯାଉଛି।
