ପୁରୀ ଅଫିସ,୬ା୧୧: ଶେଷରେ ଶ୍ରୀକ୍ଷେତ୍ରର ପବିତ୍ର ମାଟିରେ ହୋଇଛି ମହାମିଳନ। ୧୦ ବର୍ଷ ପରେ ହଜିଲା ପରିବାରକୁ ଫେରିପାଇଛନ୍ତି ପଶ୍ଚିମବଙ୍ଗ ଶାନ୍ତିନିକେତନର ତାରା ଭଗତ। ଗୁରୁବାର ପଶ୍ଚିମବଙ୍ଗରୁ ତାରାଙ୍କ ସ୍ବାମୀ ଓ ପୁଅ ଆସି ତାଙ୍କୁ ସାଥୀରେ ନେଇଯାଇଛନ୍ତି। ମହାପ୍ରଭୁଙ୍କ ଯୋଗୁ ଆଜି ସେ ତାଙ୍କ ସ୍ତ୍ରୀଙ୍କୁ ଫେରିପାଇଲେ ବୋଲି ଭାବବିହ୍ବଳ କଣ୍ଠରେ ଶଙ୍କର ଭଗତ କହିଥିଲେ। ଏହି ମିଳନର ମାଧ୍ୟମ ସାଜିଥିଲା ସ୍ବେଚ୍ଛାସେବୀ ସଙ୍ଗଠନ ହୋପ୍ ଇଜ୍ ଲାଇଫ୍।
ପଶ୍ଚିମବଙ୍ଗ ବୀରଭୂମ୍ ଜିଲା ଶାନ୍ତିନିକେତନସ୍ଥିତ ବୋଲପୁରଠାରେ ତାରା ଭଗତଙ୍କ ପରିବାର ରହନ୍ତି। ସ୍ବାମୀ, ଦୁଇପୁଅ ଓ ଗୋଟିଏ ଝିଅକୁ ନେଇ ବେଶ୍ ଖୁସିଥିଲେ ତାରା। ମାତ୍ର ତାଙ୍କର ସାମାନ୍ୟ ମାନସିକ ଅସୁସ୍ଥତା ରହିଥିଲା। ଦିନେ ଔଷଧ କିଣିବା ପାଇଁ ଘରୁ ବାହାରି ଟ୍ରେନ୍ରେ ବସି ପୁରୀରେ ପହଞ୍ଚତ୍ଥିଲେ। ଏଠାରେ ପହଞ୍ଚତ୍ବା ପରେ ଅସହାୟ ତାରା ଜଣେ ବ୍ୟକ୍ତିଙ୍କ ଘରେ କାମ କଲେ। ୫ ବର୍ଷ ପରେ କାମ କରିବାର ଶକ୍ତିସାମର୍ଥ୍ୟ ହରାଇବାରୁ ସମ୍ପୃକ୍ତ ବ୍ୟକ୍ତି ତାଙ୍କୁ ବୃଦ୍ଧାଶ୍ରମରେ ରହିବାକୁ କହିଥିଲେ। ସେ ଏକ ଆଶ୍ରମ ଓ ପରେ ହୋପ୍ ଇଜ୍ ଲାଇଫ୍ର ବୃଦ୍ଧାଶ୍ରମରେ ରହୁଥିଲେ। ଅନୁଷ୍ଠାନର କର୍ମକର୍ତ୍ତା ତାଙ୍କ ଫଟୋ ଓ ବିବରଣୀ ସହ ସୋସିଆଲ ମିଡିଆରେ ପୋଷ୍ଟ କରିଥିଲେ। ଶେଷରେ ତାରାଙ୍କ ପରିବାର ସହ ଯୋଗାଯୋଗ ହୋଇପାରିଥିଲା। ଏକ ଗାଡ଼ିରେ ଆସି ଗୁରୁବାର ତାରାଙ୍କ ସ୍ବାମୀ ଶଙ୍କର ଏବଂ ପୁଅ ପୁରୀରେ ପହଞ୍ଚତ୍ଥିଲେ। ତାରାଙ୍କୁ ଦେଖି ତାଙ୍କ ପୁଅ କାନ୍ଦି ପକାଇ କୁଣ୍ଢାଇ ପ୍ରଣାମ କରିଥିଲେ। ଶଙ୍କରଙ୍କ ଆଖିରୁ ବି ଝରିପଡ଼ିିଥିଲା ଆନନ୍ଦାଶ୍ରୁ। ତାରା ବି ସ୍ବାମୀ ଓ ପୁଅକୁ ଦେଖି କୋହ ସମ୍ଭରଣ କରିପାରି ନ ଥିଲେ। ମହାପ୍ରଭୁଙ୍କ ଯୋଗୁ ପୂଣ୍ୟ ଶ୍ରୀକ୍ଷେତ୍ର ମାଟିରେ ଏହି ମିଳନ ହୋଇପାରିଛି ବୋଲି ତାରା କହିଥିଲେ। ସେ ହୋପ୍ ଇଜ୍ ଲାଇଫ୍ର ସଭାପତି ସୁରେଶ ନନ୍ଦ, ସମ୍ପାଦକ ଦୀନଭଞ୍ଜନ ପଣ୍ଡାଙ୍କ ସମେତ ସମସ୍ତ ସଦସ୍ୟଙ୍କୁ ଧନ୍ୟବାଦ ଜଣାଇଥିଲେ। ଅନ୍ୟପକ୍ଷରେ ତାରାଙ୍କ ଘରବାହୁଡ଼ା ଯୋଗୁ ଅନ୍ତେବାସୀ ମନ ଦୁଃଖ କରିଥିଲେ ବି ପରିବାର ସହ ମିଳନ ହୋଇଥିବାରୁ ଖୁସି ହୋଇଥିଲେ।
