ବରଗଡ଼,୩୦ା୩(ପ୍ରେମାନନ୍ଦ ଖମାରୀ): ସମାଜ ଓ ମାନବ ଜୀବନର ଯଥାର୍ଥ ପ୍ରତିଲିପି ହେଉଛି କଥା ସାହିତ୍ୟ । ଏହା ଆଧୁନିକ ସାହିତ୍ୟର ଏକ ସର୍ବୋକୃଷ୍ଟ ଲୋକପ୍ରିୟ କଳା। ଉପଯୁକ୍ତ କୌଶଳ ଏବଂ ଦକ୍ଷତା ବଳରେ କଥାକାର ଏହି କଳାର ସଫଳ ରୂପାୟନ କରେ। କଥାବସ୍ତୁ, ଚରିତ୍ର, ପରିବେଶ, ଭାଷାଶୈଳୀ ଏବଂ ମର୍ମବାଣୀର ପରିମିତ ପ୍ରୟୋଗରେ ସଫଳ ହୁଏ କଥାସୃଷ୍ଟି । ଆନନ୍ଦ ଦାନ ଓ ଶିକ୍ଷା ପ୍ରଦାନର ଏକ ମହତ୍ତର ବିଭାଗ କଥା ସାହିତ୍ୟ ବୋଲି ପଞ୍ଚାୟତ ମହାବିଦ୍ୟାଳୟ ଓଡ଼ିଆ ଭାଷା ଓ ସାହିତ୍ୟ ବିଭାଗ ଆନୁକୂଲ୍ୟରେ ଆୟୋଜିତ ଆଲୋଚନାଚକ୍ରରେ ବକ୍ତାମାନେ କହିଛନ୍ତି। ସମ୍ପାନଟିରେ ମୁଖ୍ୟଅତିଥି ଭାବେ ମହାବିଦ୍ୟାଳୟର ଅଧ୍ୟକ୍ଷ ଡଃନକୁଳ ସେଠ ଯୋଗଦାନ କରି ମା ବାଗଦେବୀ ସରସ୍ବତୀ ଓ ସଭାବକବି ଗଙ୍ଗାଧର ମେହେରଙ୍କ ଫଟୋଚିତ୍ରରେ ପୁଷ୍ପ ମାଲ୍ୟାର୍ପଣ ଓ ଦୀପ ପ୍ରଜ୍ବଳନ କରି ଉଦ୍ଘାଟନ କରିଥିଲେ। ଓଡ଼ିଆ ବିଭାଗର ମୁଖ୍ୟ ଡଃ ଶେଷନ ବିଶିଙ୍କ ସଭାପତିତ୍ୱରେ ଅନୁଷ୍ଠିତ ଏହି ଆଲୋଚନାଚକ୍ରର ଶୀର୍ଷକ ଥିଲା କଥା ସାହିତ୍ୟର କଳା ଓ କାରିଗରୀ। ବରପାଲି ମହାବିଦ୍ୟାଳୟର ଓଡ଼ିଆ ବିଭାଗର ଅଧ୍ୟାପକ ଡଃ ବିଶନାଥ ସାହୁ ବିଷୟ ବିଶେଷଜ୍ଞ ଭାବେ ଯୋଗଦାନ କରି ଓଡ଼ିଆ କଥା ସାହିତ୍ୟର କଳା ଓ କାରିଗରୀ ଉପରେ ଏକ ସାରଗର୍ଭକ ବକ୍ତବ୍ୟ ପ୍ରଦାନ କରିଥିଲେ। ଏହି ଅବସରରେ ସ୍ନାତକୋତ୍ତର ଚତୁର୍ଥ ପର୍ଯ୍ୟାୟର ଛାତ୍ରୀ ପୂଜା ମେହେର ଇତିହାସର ଜୀର୍ଣ୍ଣ କଙ୍କାଳ ମଧ୍ୟରେ ଜାତୀୟତାର ମୃଦୁ ର୍ନିଝର: ଦୟାନିଧି ମିଶ୍ରଙ୍କ କ୍ଷୁଦ୍ରଗଳ୍ପ, ଛାତ୍ରୀ ନେହା ମାହାଣା ଗାଳ୍ପିକା ଗାୟତ୍ରୀ ସରାଫଙ୍କ ଗଳ୍ପରେ ଦାଦନଙ୍କ ଅନ୍ତର୍ବେଦନାର ସ୍ବର ଏବଂ ଛାତ୍ର ସନ୍ତୋଷ କାଲସାଏ ଓଡ଼ିଶାର ଦୁଇଶହ ବର୍ଷର ଇତିହାସ ‘ଫକୀରମୋହନଙ୍କ ଉପନ୍ୟାସ ନାମଧେୟ ତିନୋଟି ଭିତ୍ତି ପ୍ରବନ୍ଧ ପାଠ କରିଥିଲେ। ସଭାପତି ଡ. ଶେଷନ ବିଶି ଭଲ ଗଳ୍ପ ଓ ଉପନ୍ୟାସ ରଚନା କରିବାର କୌଶଳ ଓ ବିଭିନ୍ନ ମାର୍ଗ ସମ୍ପର୍କରେ ଆଲୋଚନା କରି ଛାତ୍ରଛାତ୍ରୀଙ୍କୁ ଉଦ୍ବୋଧିତ କରିଥିଲେ। ଡଃ ସ୍ମିତା ପାଣିଗ୍ରାହୀ ଆଲୋଚନାଚକ୍ରର ଉଦ୍ଦେଶ୍ୟ ଜ୍ଞାପନ କରିଥିବାବେଳେ ପ୍ରାରମ୍ଭିକ ସଙ୍ଗୀତ ଗାନ କରିଥିଲେ ଚିରନ୍ତନ ଦାଶ। ଅତିଥିଙ୍କ ପରିଚୟ ଜ୍ଞାପନ କରିଥିଲେ ଡଃ ଅନନ୍ତ ମେହେର। ଆଲୋଚନାଚକ୍ର ସମ୍ପର୍କିତ ଏକ ପ୍ରଶ୍ନୋତ୍ତର କାର୍ଯ୍ୟକ୍ରମ ସମ୍ପାନର ସମ୍ମାନ ବୃଦ୍ଧି କରିଥିବାବେଳେ ଆନୁଷ୍ଠାନିକ ଧନ୍ୟବାଦ ଅର୍ପଣ କରିଥିଲେ ପାଠଚକ୍ର ସହ- ସମ୍ପାଦିକା କସ୍ତୁରୀ ସାହୁ। ଆଲୋଚନାଚକ୍ରରେ ଅଧ୍ୟାପିକା ଡଃ ସୁନୀତା ବେହେରା, ଛନ୍ଦାରାଣୀ ବେସେନ, ନିରୂପମା ଭୁଏ, ଡ. ସୁରେଶ ମାଝୀ ସକ୍ରିୟ ଭୂମିକା ନିର୍ବାହ କରିଥିବାବେଳେ ସ୍ନାତକ ଓ ସ୍ନାତକୋତ୍ତର ବିଭାଗର ଶତାଧିକ ଛାତ୍ରୀଛାତ୍ର ଉପସ୍ଥିତ ଥିଲେ ।
