ମୁମ୍ବାଇ,୩୦।୮: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ(ଆର୍ବିଆଇ) ଅଗଷ୍ଟ ୩୧ ପରେ ମୋରାଟୋରିୟମ ଅବଧିକୁ ବୃଦ୍ଧି କରି ନ ପାରେ। ଏହା ବଢ଼ାଇବା ଦ୍ୱାରା ବ୍ୟାଙ୍କଗୁଡିକ ଉପରେ ପ୍ରଭାବ ପଡୁଥିବାରୁ ଏପରି ହୋଇ ନ ପାରେ ବୋଲି ଶୁଣାଯାଉଛି। କୋଭିଡ୍-୧୯ ଯୋଗୁ ଘରୋଇ ବଜାର ବର୍ତ୍ତମାନ ବିଭିନ୍ନ ସମସ୍ୟା ଦେଇ ଗତି କରୁଛି। ଋଣ ନେଇଥିବା ବ୍ୟକ୍ତିବିଶେଷ ଋଣ କିସ୍ତି ଶୁଝିବାରେ ସମସ୍ୟା ସାମ୍ନା କରୁଥିବାରୁ ସରକାର ମୋରାଟୋରିୟମ ସୁବିଧା ପ୍ରଦାନ କରିଥିଲେ। ମାତ୍ର ଗତ କିଛି ମାସ ହେବ ଲୋକମାନେ ଋଣ କିସ୍ତି ପ୍ରଦାନ କରୁ ନ ଥିବାରୁ ଏହା ବ୍ୟାଙ୍କଗୁଡିକର କ୍ରେଡିଟ୍ ବିହେବିଅର ବା ଋଣ ପ୍ରଦାନ ଧାରାକୁ ମଧ୍ୟ ପ୍ରଭାବିତ କରୁଥିବା ଜଣାପଡିଛି। ପ୍ରଦାନ କରାଯାଇଥିବା ଋଣକୁ ବ୍ୟବସ୍ଥିତ କରିବା ମଧ୍ୟ ବ୍ୟାଙ୍କଗୁଡିକ ଲାଗି ସମସ୍ୟା ଉପୁଜୁଛି। ଏଭଳି ସ୍ଥିତିରେ ଅବଧି ଆଉ ଅଧିକ ସମୟ ବଢିଲେ ସ୍ଥିତି ଭିନ୍ନ ହେବ ବୋଲି ପ୍ରକ୍ରିୟା ସହ ଜଡିତ ଜଣେ ଅଧିକାରୀ ନିଜ ନାମ ଗୋପନ ରଖି ଏହା କହିଛନ୍ତି।
ମାର୍ଚ୍ଚରେ ରିଜର୍ଭ ବ୍ୟାଙ୍କ ମୋରାଟୋରିୟମ ଘୋଷଣା କରିଥିଲା। ଏହା ୬ ମାସ ଲାଗି ପ୍ରଦାନ କରାଯାଇଛି। କରୋନା ଯୋଗୁ କାରବାର କ୍ଷତି ସହିଥିବା ବ୍ୟକ୍ତି ବିଶେଷ ଏବଂ ବ୍ୟବସାୟୀଙ୍କୁ ଏହା କିଛି ହାରରେ ଆଶ୍ୱସ୍ତି ପ୍ରଦାନ କରିଥିଲା। ଅଗଷ୍ଟ ୩୧ ଯାଏ ଏହି ଅବଧି ରହିଛି। ସୂଚନାଯୋଗ୍ୟ, ଏଚ୍ଡିଏଫ୍ସି ଲିମିଟେଡ୍ ଅଧ୍ୟକ୍ଷ ଦୀପକ ପାରେଖ ଏବଂ କୋଟାକ ମହିନ୍ଦ୍ରା ବ୍ୟାଙ୍କର ଏମ୍ଡି ଉଦୟ କୋଟାକଙ୍କ ସମେତ ଅନ୍ୟ କିଛି ବ୍ୟାଙ୍କର ମୋରାଟୋରିୟମ ସମୟ ନ ବଢାଇବା ଲାଗି ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସଙ୍କୁ ପରାମର୍ଶ ଦେଇଥିଲେ। କିଛି ଲୋକ ଏହି ସୁବିଧାର ଅଯଥା ଲାଭ ଉଠାଉଥିବା ବିଶେଷଜ୍ଞ ମତବ୍ୟକ୍ତ କରିଛନ୍ତି। ଏଭଳି ବିଭିନ୍ନ ପ୍ରସଙ୍ଗକୁ ବିଚାରକରି ନିକଟରେ ରିଜର୍ଭ ବ୍ୟାଙ୍କ ଏକ ସ୍ବତନ୍ତ୍ର ରିଜଲ୍ୟୁସନ ଓ୍ବିଣ୍ଡୋ ସମ୍ପର୍କରେ ଘୋଷଣା କରିଛି।
ବ୍ୟାଙ୍କଗୁଡିକର ଆର୍ଥତ୍କ ସୁରକ୍ଷା ଏବଂ ଜମାକାରୀଙ୍କ ସ୍ବାର୍ଥକୁ ଏହାଦ୍ୱାରା ବିଚାର କରାଯିବ। ଏଭଳି ପଦକ୍ଷେପ ଦ୍ୱାରା ପ୍ରଭାବିତ ହୋଇଥିବା ଅଂଶୀଦାରଙ୍କ ସମସ୍ୟା ଉପରେ ନଜର ରଖାଯିବ ବୋଲି ଅନ୍ୟ ଜଣେ ବରିଷ୍ଠ ଅଧିକାରୀ ମତ ରଖିଛନ୍ତି। ମୋରାଟୋରିୟମ ଏବଂ କିସ୍ତି ପଇଠ କିଭଳି ହେବ ତାକୁ ଅଂଶୀଦାରଙ୍କ ଆୟ ସୂତ୍ର ହିସାବରେ ବିଚାର କରାଯାଇପାରେ ବୋଲି ଅଧିକାରୀ କହିଛନ୍ତି। ଚଳିତ ବର୍ଷ ଡିସେମ୍ବର ଯାଏ ରିଜଲ୍ୟୁଶନ ସୁବିଧା ଲୋକଙ୍କୁ ପ୍ରଦାନ କରାଯିବ। ସେହିଭଳି ନିକଟରେ ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସ କହିଥିଲେ, ଋଣ ଉପରେ ପ୍ରଦାନ କରାଯାଉଥିବା ମୋରାଟୋରିୟମ ସୁବିଧା ଏକ କ୍ଷୟସ୍ଥାୟୀ ସମାଧାନ। ନୂଆ ରିଜୋଲ୍ୟୁଶନ ସୁବିଧା ଲୋକଙ୍କୁ ଲାଭ ପ୍ରଦାନ କରିବା ଦିଗରେ ସହାୟକ ହେବ।
