କେନ୍ଦୁଝର,୨୫ା୯(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ପାଟଣା ଥାନା ଅନ୍ତର୍ଗତ କୁଣ୍ଡୁଳା ଗ୍ରାମର ଗୁରୁବା ମୁଣ୍ଡାଙ୍କ ଝିଅ ୨୦୧୯ରୁ ନିଖୋଜ ଥିବା ବେଳେ ସୋମବାର ଶିଶୁମଙ୍ଗଳ ସମିତିର ହସ୍ତକ୍ଷେପ ପରେ ପରିବାର ନିକଟକୁ ଫେରିଛନ୍ତି। ଫଳରେ ପରିବାରରେ ଖୁସିର ଲହରି ଖେଳିଯାଇଛି।
ପ୍ରକାଶ ଯେ, ଗୁରୁବା ଜଣେ ଗରିବ ଆଦବାସୀ। ତାଙ୍କର ୫ ଝିଅ ଏବଂ ଗୋଟିଏ ପୁଅ ଅଛନ୍ତି। ୨୦୧୯ରେ ତାଙ୍କର ଦ୍ୱିତୀୟ କନ୍ୟା ଶିବାନୀ (ଏବେ ୧୨ ବର୍ଷ) ତାଙ୍କ ପିଉସା ରାଜୁ ମୁଣ୍ଡା ସହିତ ଭଦ୍ରକ ବୁଲି ଯାଇଥିଲେ। ସେଠାକୁ ଯାଇ ଆଉ ସେ ଘରକୁ ଫେରି ନ ଥିଲେ। ଅନିଶ୍ଚିତତା ମଧ୍ୟରେ ତାଙ୍କ ପରିବାର ଲୋକେ ଖୋଜାଖୋଜି କରିଥିଲେ ହେଁ ପାଇ ନ ଥିଲେ। ପିଉସାଙ୍କୁ ପଚାରିବାରୁ ସେ ବାଲେଶ୍ୱର ଯାଇଥିବା ବେଳେ ଝିଅ କେଉଁଆଡ଼େ ପଳାଇଲା ବୋଲି କହିଥିଲେ। ଏନେଇ ଗୁରୁବାଙ୍କ ସ୍ତ୍ରୀ ବୈଶାଖୀ ଥାନାରେ ଅଭିଯୋଗ କରିଥିଲେ। ପିଉସା ନେଇ ତାଙ୍କ ବଡ଼ଭାଇଙ୍କ ଘରେ ଛାଡ଼ିଥିଲେ। ତାଙ୍କ ପିଲାଙ୍କ ଦେଖାଶୁଣା କରିବା ପାଇଁ। ଛୁଆ କାନ୍ଦିଲେ ମୋତେ ମାଡ ମାରନ୍ତି। ଏଣୁ ଦିନେ ଘରୁ ବାହାରି ପଳାଇ ଯାଇଥିଲେ ବୋଲି କୁନି ଝିଅଟି କହିଛନ୍ତି। ତାପରେ ପୋଲିସ ଉଦ୍ଧାର କରି ଏକ ସଂସ୍ଥାରେ ରଖିଥିଲା। ସେଠାରେ ପଢୁଥିଲି। ଘର କଥା ବହୁତ ମନେ ପଡ଼ିଲା ଏବଂ କାନ୍ଦୁଥିଲି। ଏବେ ବାପା ଓ ମା’ ପାଖକୁ ଆସି ବହୁତ ଖୁସି ଲାଗୁଛି। ଘରେ ରହିବି ଓ ପଢ଼ାପଢ଼ି ଜାରି ରଖିବି ବୋଲି କହିଛନ୍ତି ଶିବାନୀ।
କେନ୍ଦୁଝର ଶିଶୁ ମଙ୍ଗଳ ସମିତିର ଅଧ୍ୟକ୍ଷ ବିଭୂତି ଦାଶ କହିଛନ୍ତି, ଆଜି ଶିଶୁଟିକୁ ଉଦ୍ଧାର କରି ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ତା’ର ପଢିବା ପାଇଁ ପାଖ ବିଦ୍ୟାଳୟରେ ବ୍ୟବସ୍ଥା କରାଯିବା ସହ ସୁବିଧା ଯୋଗାଇ ଦିଆଯିବ। ଏହି ହସ୍ତାନ୍ତର ବେଳେ କେନ୍ଦୁଝର ଶିଶୁ ମଙ୍ଗଳ ସମିତିର ସଦସ୍ୟା ସୋନାଲି ଦାଶ, ରାଜଶ୍ରୀ ଉପାଧ୍ୟାୟ ଓ ସଦସ୍ୟ କୃଷ୍ଣଚନ୍ଦ୍ର ବାରିକ ଏବଂ ବାଲେଶ୍ୱର ଚାଇଲ୍ଡ ଲାଇନ୍ର ଜଣେ ସଦସ୍ୟା ଉପସ୍ଥିତ ଥିଲେ।
