ନବରଙ୍ଗପୁର,୧୫।୧୨(ସଦାଶିବ ପ୍ରହରାଜ): ନବରଙ୍ଗପୁର ଜିଲାସ୍ତରୀୟ ଲୋକ ମହୋତ୍ସବ ମଣ୍ଡେଇ -୨୦୨୫ ରବିବାର ଉଦ୍ଯାପିତ ହୋଇଛି। ଏଥିରେ ମୁଖ୍ୟ ଅତିଥି ଭାବେ ପଞ୍ଚାୟତିରାଜ, ପାନୀୟଜଳ ଓ ଗ୍ରାମ୍ୟ ଉନ୍ନୟନ ବିଭାଗ ମନ୍ତ୍ରୀ ରବି ନାରାୟଣ ନାଏକ ଯୋଗଦେଇ ୧୯୪୨ ଅଗଷ୍ଟ ୨୪ ତାରିଖରେ ଇଂରେଜ ଗୁଳିକାଣ୍ଡରେ ପ୍ରାଣ ହରାଇଥିବା ସହିଦ ଓ ସଂଗ୍ରାମୀଙ୍କୁ ସ୍ମରଣ କରିଥିଲେ । ଯେଉଁଦିନ ଗରିବ ଖଟିଖିଆଙ୍କ ବିକାଶ ହୋଇପାରିବ ସେଦିନ ସରକାରଙ୍କ ସ୍ବପ୍ନ ପୁରଣ ହୋଇପାରିବ ବୋଲି ମନ୍ତ୍ରୀ ନାଏକ କହିଥିଲେ। ବରେଣ୍ୟ ଅତିଥି ଭାବେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଯୋଗଦେଇ କହିଥିଲେ, କଳା ସଂସ୍କୃତିର ଉତ୍ସବ ମଣ୍ଡେଇ । ଲୋକକଥା, ଲୋକ ସଙ୍ଗୀତ, ସାହିତ୍ୟ ଆମକୁ ପରିଚୟ ଦେଇଆସିଛ। ୨୫ ବର୍ଷର ସରକାର ସଶକ୍ତିକରଣ କଥା କହିଥିଲେ, ହେଲେ ୧୭ ମାସର ଭାଜପା ସରକାର ୧ କୋଟି ମହିଳା ୧୫ ହଜାର ଟଙ୍କା ଲେଖାଏଁ ପାଇ ସାରିଛନ୍ତି । ଚାଷୀଙ୍କଠାରୁ କ୍ୱିଣ୍ଟାଲ ପିଛା ଧାନ ୩୧ଶହ ଟଙ୍କାରେ ଧାନ କିଣାଯାଇଛି। ନବରଙ୍ଗପୁରଠାରେ ମେଡିକାଲ କଲେଜ ହେବ, ମଣ୍ଡେଇ ପଡିଆର ଉନ୍ନତି ପାଇଁ ୬ କୋଟି ଟଙ୍କା ଖର୍ଚ୍ଚ ହେବ ବୋଲି କହିଛନ୍ତି। ଭାଜପା ସରକାର ଯୋଗୁ ରାଇଘର, ଉମରକୋଟ, ଡାବୁଗାଁଠାରେ ଏକଲବ୍ୟ ଆଦର୍ଶ ବିଦ୍ୟାଳୟ ହୋଇପାରିଛି ବୋଲି କହିଥିଲେ। ବିଧାୟକ ମନୋହର ରନ୍ଧାରିଙ୍କ କଥାକୁ କାଉଣ୍ଟର କରି ମନ୍ତ୍ରୀ ଗଣ୍ଡ କହିଥିଲେ, ଏଠାରେ କିଏ ବାଘ ହେଲେ ଅନ୍ୟମାନେ ବି ବାଘଠାରୁ କମ୍ ନୁହନ୍ତି । ସମ୍ମାନିତ ଅତିଥି ଏମ୍ପି ବଳଭଦ୍ର ମାଝୀ କହିଥିଲେ, କଳା ସଂସ୍କୃତିକୁ ଆଗକୁ ବଢ଼ାଇବା ପାଇଁ ମଣ୍ଡେଇ ଏକ ମାଧ୍ୟମ । ଡାବୁଗାଁ ବିଧାୟକ ମନୋହର ରନ୍ଧରି କହିଥିଲେ, ଏକତା, ଭାଇଚାରା, ପ୍ରଶାସନ ଓ ଜନସାଧାରଣଙ୍କ ମଧ୍ୟରେ ସମନ୍ବୟ ରଖିବା ପାଇଁ ମଣ୍ଡେଇ୨୦୦୨ରୁ ହେଉଛି । ବିକାଶର ଧାରା, କଳା ସାହିତ୍ୟ, ସଂସ୍କୃତିର ନିଦର୍ଶନ ହୋଇଛି ମଣ୍ଡେଇ । ବିମାନ ବନ୍ଦର, ରେଳଲାଇନ ଏହି ଜିଲାରେ ନାହିଁ । ଏଥିପ୍ରତି ସରକାର ଦୃଷ୍ଟି ଦିଅନ୍ତୁ ବୋଲି କହିଥିଲେ । ମଞ୍ଚରେ ବିରକ୍ତ ଭାବ ପ୍ରକାଶ କରି ମନୋହର ରନ୍ଧାରି କହିଥିଲେ ମୁଁ ଜଣେ ବାଘ, ମଣ୍ଡେଇକୁ ମୋତେ କାହିଁକି ଡକାଗଲା ନାହିଁ ବୋଲି ଭାଜପା ନେତାଙ୍କୁ କଟାକ୍ଷ କରିଥିଲେ । ନବରଙ୍ଗପୁର ବିଧାୟକ ଗୌରୀ ଶଙ୍କର ମାଝୀ କହିଥିଲେ, ମଣ୍ଡେଇ ହେଉଛି ଏକ କୃଷିଭିତ୍ତିକ ପର୍ବ। ପରବର୍ତ୍ତୀ ସମୟରେ ଲୋକ ମହୋତ୍ସବ ପ୍ରଶାସନିକସ୍ତରରେ ମଣ୍ଡେଇ ସାଂସ୍କୃତିକ ଗଣ ପର୍ବ ଭାବେ ପରିଚୟ ନେଇଛି । ନବରଙ୍ଗପୁରର ବିକାଶ ପାଇଁ ସରକାର ଭାରତ ମାଳା ରାସ୍ତା ମାଧ୍ୟମରେ ନବରଙ୍ଗପୁର ଜିଲାର ଅର୍ଥନୈତିକ ବିକାଶ ହୋଇପାରିବ। ଶହୀଦ ମୀନାର ପାଇଁ ୬ କୋଟି ଟଙ୍କା ଆସିଛି । ୨୩ କୋଟି ଟଙ୍କାରେ କ୍ରୀଡା ହବ୍, ଆଦିବାସୀ ମ୍ୟୁଜିୟମ ପାଇଁ ୬ କୋଟି ଟଙ୍କା ଅନୁଦାନ ଆସିଛି ବୋଲି କହିଥିଲେ । ଝରିଗାଁ ବିଧାୟକ ନରସିଂହ ଭତରା କହିଥିଲେ, ଐତିହ୍ୟ କିମ୍ବଦନ୍ତୀକୁ ବହନ କରି ଆସୁଛି ନବରଙ୍ଗପୁର ଜିଲା। ସେହିପରି କୋଟପାଡ଼ ବିଧାୟକ ରୁପୁ ଭତରା ମଣ୍ଡେଇ କାର୍ଯ୍ୟକ୍ରମ ପାଇଁ ପ୍ରଶାସନକୁ ସାଧୁବାଦ ଜଣାଇଥିଲେ । କଳାକୁ ବଞ୍ଚାଇ ରଖିବା ପାଇଁ ମଣ୍ଡେଇ ଏକ ମାଧ୍ୟମ ବୋଲି କହିଥିଲେ। ଜିଲାପାଳ ତଥା ଜିଲା ସଂସ୍କୃତି ପରିଷଦ ଅଧ୍ୟକ୍ଷ ମହେଶ୍ୱର ସ୍ବାଇଁ ସ୍ବାଗତ ଭାଷଣ ପ୍ରଦାନ କରି ସମସ୍ତଙ୍କୁ କୃତଜ୍ଞତା ଜଣାଇଥିଲେ । ପଲ୍ଲୀଶ୍ରୀ ମେଳାରେ ଆଜି ପର୍ଯ୍ୟନ୍ତ ସାଢ଼େ ୭ କୋଟି ଟଙ୍କାର ବ୍ୟବସାୟ ହୋଇଛି। ମଣ୍ଡେଇ ମାଧ୍ୟମରେ ସ୍ବୟଂ ସହାୟକ ଗୋଷ୍ଠୀ, କୁଟୀର ଶିଳ୍ପକୁ ବ୍ୟବସାୟ କରିବାକୁ ସୁଯୋଗ ଦିଆଯାଇଛି ବୋଲି ଜିଲାପାଳ କହିଥିଲେ ।
ଜିଲାପରିଷଦ ଅଧ୍ୟକ୍ଷ ମୋତିରାମ ନାୟକ, ପୂର୍ବତନ ଏମ୍ପି ପର୍ଶୁରାମ ମାଝୀ, ଜିଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ବିରଞ୍ଚି ନାରାୟଣ ଦରୱାନ, ଅତିରିକ୍ତ ଜିଲାପାଳ ( ସାଧାରଣ) ତପନ କୁମାର ଖୁଣ୍ଟିଆ, ଅତିରିକ୍ତ ଜିଲ୍ଲାପାଳ (ରାଜସ୍ବ) ବିଶ୍ୱଜିତ୍ ଚନ୍ଦ୍ର ବର୍ମନ ମଞ୍ଚାସୀନ ଥିଲେ । ଉଦଯାପନୀ ଦିବସରେ ଜିଲା ସଂସ୍କୃତି ପରିଷଦ ଓଡ଼ିଶୀ କଳା ଦେନ୍ଦ୍ରର ଓଡ଼ିଶୀ, ଝାଡ଼ଖଣ୍ଡର ସାନ୍ତାଳୀ ନୃତ୍ୟ, କୋଷାଗୁମୁଡ଼ା ବ୍ଲକର ମାଢିଆ ନୃତ୍ୟ, ମାଲକାନଗିରି ଜିଲାର ବଣ୍ଡା ନୃତ୍ୟ, ଆସାମର ବିହୁ, ନବରଙ୍ଗପୁର, ଝରିଗାଁ, ତେନ୍ତୁଳିଖୁଣ୍ଟି ଓ ନନ୍ଦାହାଣ୍ଡି ବ୍ଲକର ସାଂସ୍କୃତିକ କର୍ଯ୍ୟକ୍ରମ ପରିବେଷଣ ହୋଇଥିଲା । ପରେ ପ୍ରଜ୍ଞା ରଞ୍ଜନ ଖଟୁଆଙ୍କ କମେଡି, ଶଶାଙ୍କ ଶେଖର ଓ ଦଳ ପକ୍ଷରୁ ମେଲୋଡି ନାଇଟ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଉପଜିଲାପାଳ ପ୍ରକାଶ କୁମାର ମିଶ୍ର, ପିଏଆଇଟିଡି ରାଜୀବ କୁମାର ସାହୁ, ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ମନୋଜ କୁମାର ବେହେରା, ଜିଲା ଭାଜପା ସଭାପତି କୁଞ୍ଜ ବିହାରୀ ଦାସ, ପ୍ରହଲ୍ଲାଦ ତ୍ରିପାଠୀ, କାହ୍ନୁ ଦାଶ, ଜିଲା ସଂସ୍କୃତି ଅଧିକାରୀ ଘାସିଆ ହରିଜନ, ଜିଲାର ବିଡିଓ, ତହସିଲଦାର ଓ ଜିଲାସ୍ତରୀୟ ଅଧିକାରୀ ପ୍ରମୁଖ ଉପସ୍ଥିତ ଥିଲେ । ଚାନ୍ଦନା ମଲ୍ଲିକ ମଞ୍ଚ ସଞ୍ଚାଳନ କରିଥିଲେ। ପରେ ୧୦ଜଣ ଦିବ୍ୟାଙ୍ଗ ଛାତ୍ରୀଛାତ୍ରଙ୍କୁ ଅତିଥିଙ୍କ ଦ୍ୱାରା ଲାପଟପ ପ୍ରଦାନ କରାଯାଇଛି ।