ଓ୍ବାଶିଂଟନ୍,୭।୨: ୨୦୦୮ରେ ମୁମ୍ବାଇରେ ଆତଙ୍କବାଦୀଙ୍କ ଦ୍ୱାରା ହୋଇଥିବା ନିର୍ଦ୍ଦୟ ଆକ୍ରମଣର ସ୍ମୃତି ଉଭୟ ଭାରତ ଏବଂ ଆମେରିକାର ମନରେ ଏବେ ବି ସତେଜ ରହିଛି ବୋଲି ବାଇଡେନ ପ୍ରଶାସନ ପକ୍ଷରୁ କୁହାଯାଇଛି।
ଆମେରିକା ସ୍ବରାଷ୍ଟ୍ର ବିଭାଗର ମୁଖପାତ୍ର ନେଡ ପ୍ରାଇସ କହିଛନ୍ତି, ମୁମ୍ବାଇରେ ୨୦୦୮ ଆତଙ୍କବାଦୀ ଆକ୍ରମଣର ସ୍ମୃତି ଏବେ ବି ସତେଜ ରହିଛି। ଆମେ ସମସ୍ତେ ସେହି ଦିନର ଭୟଙ୍କର ଚିତ୍ର, ହୋଟେଲ ଉପରେ ଆକ୍ରମଣ, ରକ୍ତପାତକୁ ମନେ ରଖିଛୁ ଏବଂ ସେଥିପାଇଁ ଆମେ ଏହାର ଅପରାଧୀଙ୍କ ପାଇଁ କାର୍ଯ୍ୟାନୁଷ୍ଠାନ ପାଇଁ ସର୍ବଦା ଅପିଲ୍ କରିଆସିଛୁ। କେବଳ ବ୍ୟକ୍ତିଗତ ଆତଙ୍କବାଦୀଙ୍କୁ ନୁହେଁ, ଯେଉଁମାନେ ସେହି ଦିନ ଏତେ ସଂଖ୍ୟକ ନିରୀହ ଲୋକଙ୍କୁ ହତ୍ୟା କରିଥିଲେ, ବରଂ ଏହା ପଛରେ ଥିବା ଆତଙ୍କବାଦୀ ଗୋଷ୍ଠୀକୁ ମଧ୍ୟ ଖେଶଜି ବାହାର କରିବାକୁ ଆମେ ସମର୍ଥନ କରୁ।
ଦେଶର ଇତିହାସରେ ସବୁଠାରୁ ଭୟଙ୍କର ଆତଙ୍କବାଦୀ ଆକ୍ରମଣ ମଧ୍ୟରୁ ଅନ୍ୟତମ ମୁମ୍ବାଇ ଆକ୍ରମଣରେ ୧୬୬ ଜଣଙ୍କର ମୃତ୍ୟୁ ଘଟିଥିବା ବେଳେ ୩୦୦ରୁ ଅଧିକ ଆହତ ହୋଇଥିଲେ। ନଭେମ୍ବର ୨୬, ୨୦୦୮ରେ ପାକିସ୍ତାନର ୧୦ ଜଣ ସଶସ୍ତ୍ର ଆତଙ୍କବାଦୀ ମୁମ୍ବାଇରେ ଏହି ଆକ୍ରମଣ କରିଥିଲେ। ଭାରତୀୟ ସୁରକ୍ଷା ବାହିନୀ ଦ୍ୱାରା ନଅ ପାକିସ୍ତାନୀ ଆତଙ୍କବାଦୀ ନିହତ ହୋଇଥିଲେ। ଅଜମଲ କସବ ହିଁ ଏକମାତ୍ର ଆତଙ୍କବାଦୀ ଯିଏ ଜୀବନ୍ତ ଧରାପଡିଥିଲେ। ଚାରି ବର୍ଷ ପରେ ତାଙ୍କୁ ୨୧ନଭେମ୍ବର ୨୦୧୨ରେ ଫାଶୀ ଦିଆଯାଇଥିଲା।
