ଯାଜପୁର,୧୨ା୨(ହର୍ଷବର୍ଦ୍ଧନ ବେହେରା):ସର୍ବଧର୍ମ ସମନ୍ବୟର ପ୍ରତୀକ ବରାହ-ବିରଜା କ୍ଷେତ୍ରରେ ସାଧାରଣ ଲୋକଙ୍କ ଅର୍ଥନୈତିକ ବିକାଶ ଲାଗି କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ସମୟରେ ଏକାଧିକ ଯୋଜନା ପ୍ରଣୟନ କରୁଛନ୍ତି। ହେଲେ ରାଜନୈତିକ ଇଚ୍ଛାଶକ୍ତି ଓ ପ୍ରଶାସନିକ ଅବହେଳା କାରଣରୁ କେତେକ ଯୋଜନା ବାସ୍ତବ ରୂପ ନେଇ ପାରିନାହିଁ। ସେହି ଯୋଜନା ଶୀତଳ ଭଣ୍ଡାରରେ ପଡି ରହିଛି। ଏହାର ଏକ ଉଦାହରଣ ସାଜିଛି ଜିଲା ଦଶରଥପୁର ବ୍ଲକ ଅଧୀନ ଝୁମ୍ପୁରୀ ବଜାରରେ ନିର୍ମିତ ଏକ ମାର୍କେଟ କମ୍ପ୍ଲେକ୍ସ ଓ ମିଶନ ଶକ୍ତି ଭବନ। ଏହି ଦୁଇ କୋଠା ନିର୍ମାଣ ସରିବାର ୫ ବର୍ଷ ବିତିଯାଇଥିଲେ ସୁଦ୍ଧା ତାହା ଏଯାଏ କାମରେ ଲାଗି ପାରିନାହିଁ।
ରାଜ୍ୟ ସରକାର ମହିଳାଙ୍କ ବିକାଶ ନିମନ୍ତେ ମିଶନ ଶକ୍ତି ଗୋଷ୍ଠୀ ଗଠନ କରିବା ସହିତ ସେମାନଙ୍କୁ ସ୍ବାବଲମ୍ବୀ କରିବା ଲକ୍ଷ୍ୟ ରଖି ବିନା ସୁଧରେ ୫ ଲକ୍ଷ ପର୍ଯ୍ୟନ୍ତ ଋଣ ଯୋଗାଇ ଦେଉଛନ୍ତି। ଏହାର ପରିଚାଳନା ପାଇଁ ମହାସଂଘ ଗଠନ, ଏମ୍ବିକେ ନିଯୁକ୍ତି କରାଯାଉଛି। ଏହାବାଦ ମିଶନ ଶକ୍ତି ଭବନ ନିର୍ମାଣ ନିମନ୍ତେ ୮ ଲକ୍ଷ ଟଙ୍କା ଲେଖାଏ ଅନୁଦାନ ଦିଆଯାଉଛି। ସେହିପରି ଗ୍ରାମ ପଞ୍ଚାୟତର ଭିତ୍ତିଭୂମିକୁ ସୁଦୃଢ କରିବା ସହିତ ନିଜସ୍ବ ଆୟ ବୃଦ୍ଧି କରିବା ଏବଂ ସ୍ଥାନୀୟ ଯୁବକଙ୍କୁ ବ୍ୟବସାୟ ନିମନ୍ତେ ପ୍ରୋତ୍ସାହିତ କରିବା ଲକ୍ଷ୍ୟ ନେଇ ସରକାର ୨୦୧୩/୧୪ରେ ସ୍ବର୍ଣ୍ଣ ଜୟନ୍ତୀ ସ୍ବରୋଜଗାର ଯୋଜନା ପ୍ରଣୟନ କରିଛନ୍ତି। ଏହି ଯୋଜନାରେ ୨୦ ଲକ୍ଷ ଟଙ୍କା ବ୍ୟୟ ଅଟକଳରେ ଝୁମ୍ପୁରୀ ବଜାରଠାରେ ମାର୍କେଟ କମ୍ପ୍ଲେକ୍ସ ଗୃହ ନିର୍ମାଣ ହୋଇଛି। ଏହାକୁ ହସ୍ତାନ୍ତର କରିବାର ୫ ବର୍ଷ ବିତିଯାଇଥିଲେ ସୁଦ୍ଧା କମ୍ପ୍ଲେକ୍ସକୁ ଅଦ୍ୟାବଧି କାର୍ଯ୍ୟକାରୀ କରା ନ ଯିବା ଦୁଃଖ ଓ ପରିତାପର ବିଷୟ ବୋଲି ମତପ୍ରକାଶ ପାଇଛି। ସେହିପରି ମାର୍କେଟ କମ୍ପ୍ଲେକ୍ସ ଛାତ ଉପରେ ମିଶନ ଶକ୍ତି ଭବନ ନିର୍ମାଣ ସରିବାର ପ୍ରାୟ ୧ ବର୍ଷରୁ ଉର୍ଦ୍ଧ୍ୱ ସମୟ ଅତିକ୍ରାନ୍ତ ହୋଇସାରି ଥିଲେ ସୁଦ୍ଧା ତାହା ଅଦ୍ୟାବଧି କାର୍ଯ୍ୟକାରୀ ହୋଇପାରିନାହିଁ। ଫଳରେ ମିଶନ ଶକ୍ତି ମା’ମାନେ ବାରଦୁଆର ହେବା ସାର ହେଉଛି। ଏ ସମ୍ପର୍କରେ ବିଡିଓ ଆକାଶ ପଟ୍ଟନାୟକଙ୍କୁ ପଚାରିବାରୁ ଖୁବ୍ଶୀଘ୍ର ଉଭୟ କମ୍ପ୍ଲେକ୍ସ ଓ ମିଶନ ଶକ୍ତି ଭବନକୁ ପଞ୍ଚାୟତବାସୀଙ୍କ କାର୍ଯ୍ୟରେ ଲଗାଯିବ ବୋଲି କହିଛନ୍ତି। ସେହିପରି ଉକ୍ତ ପଞ୍ଚାୟତ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ନିର୍ମଳଚନ୍ଦ୍ର କ୍ୟାପଙ୍କୁ ପଚାରିବାରୁ ମାର୍କେଟ କମ୍ପ୍ଲେକ୍ସ ପଞ୍ଚାୟତକୁ ହସ୍ତାନ୍ତର ହୋଇଛି। ବାକି ମିଶନ ଶକ୍ତି ଭବନରେ ବିଦ୍ୟୁତ୍ ଓ ପାନୀୟ ଜଳ ସଂଯୋଗ କରାଯାଇ ହସ୍ତାନ୍ତର କରାଯିବ ବୋଲି କହିଛନ୍ତି।
