ଫୁଲବାଣୀ ଅଫିସ, ୧୯।: କିଛି ଦିନର ନୀରବତା ପରେ କନ୍ଧମାଳ ଜିଲାରେ ପୁଣି ମାଓବାଦୀ ସକ୍ରିୟ ହୋଇଛନ୍ତି। କୋମ୍ବିଂ ଅପରେଶନ୍ ବେଳେ ବାଲିଗୁଡ଼ା ଥାନା ସୁଡ୍ରା ପଞ୍ଚାୟତ ଅଞ୍ଚଳ ଜଙ୍ଗଲରେ ଏକ ମାଓବାଦୀ କ୍ୟାମ୍ପକୁ ଯବାନମାନେ ଠାବ କରିଛନ୍ତି। ହେଲେ ଯବାନ ସେଠାରେ ପହଞ୍ଚିଲା ବେଳେ ମାଓବାଦୀ ଛତ୍ରଭଙ୍ଗ ଦେଇଥିଲେ। କ୍ୟାମ୍ପରେ ୧୦ରୁ ୧୨ଜଣ ମାଓବାଦୀ ଥିବା ଅନୁମାନ କରାଯାଉଛି ବୋଲି କନ୍ଧମାଳ ଏସ୍ପି ବିନୀତ ଅଗ୍ରୱାଲ ମଙ୍ଗଳବାର ଜିଲା ପୋଲିସ କାର୍ଯ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ କହିଛନ୍ତି। ୧୪ ତାରିଖରେ ମାଓବାଦୀ କ୍ୟାମ୍ପ ନେଇ ଖବର ମିଳିଥିଲା। ଯବାନମାନେ ୧୭ ତାରିଖରେ ସେଠାରେ ପହଞ୍ଚି କ୍ୟାମ୍ପ ଠାବ କରିଥିଲେ। ସେଠାରୁ ବହୁତ ପରିମାଣରେ ମାଓବାଦୀ ସାମଗ୍ରୀ ଜବତ କରାଯାଇଛି। ଜବତ ସାମଗ୍ରୀ ମଧ୍ୟରେ ମେଡିସିନ, ପୋଷାକ, ଛୁରି, ଟାଙ୍ଗିଆ, ଟିଫିନ, ଆଲୁମିନିଅମ ହାଣ୍ଡି, ପାଲ ଆଦି ରହିଛି । ବର୍ତ୍ତମାନ ସୁଦ୍ଧା ସେଠାରେ କୋମ୍ବିଂ ଅପରେଶନ ଜାରି ରହିଛି।
