ନୂଆଦିଲ୍ଲୀ,୬।୧୦ – ଭାରତରେ ଚାଇନା ଭଳି ବିଦ୍ୟୁତ୍ ଶକ୍ତି ସଙ୍କଟ ଉପୁଜିବା ନେଇ ଆଶଙ୍କା କରାଯାଉଛି। ଏହା ଶକ୍ତି କ୍ଷେତ୍ରର କାର୍ଯ୍ୟକଳାପକୁ ଠପ୍ କରିପାରେ। ବିଜୁଳି ଉତ୍ପାଦନ ଲାଗି ପାଓ୍ବାର ପ୍ଲାଣ୍ଟଗୁଡ଼ିକରେ ବହୁତ କମ୍ କୋଇଲା ଗଚ୍ଛିତ ରହିଛି। ଭାରତ ଉତ୍ପାଦନ କରୁଥିବା ପ୍ରାୟ ୭୦% ବିଜୁଳି କୋଇଲା ବ୍ୟବହାର ଦ୍ୱାରା ପ୍ରସ୍ତୁତ ହେଉଛି। କୋଇଲା ଅଭାବ ଯୋଗୁ ଏହାର ପ୍ରଭାବ କମ୍ପାନୀଗୁଡିକ ଉପରେ ପଡ଼ିଛି। ଫଳରେ ଗତ ଏକ ବର୍ଷ ମଧ୍ୟରେ ବିଜୁଳି ଦର ପ୍ରାୟ ୬୩% ବଢ଼ିଥିବା ଜଣାପଡ଼ିଛି। ତେବେ ବିଜୁଳି ଦର ଆଗକୁ ବଢ଼ିବ କି ନାହିଁ ତାହା କମ୍ପାନୀଗୁଡିକର ଆଗାମୀ କାର୍ଯ୍ୟପନ୍ଥା ଉପରେ ନିର୍ଭର କରିବ। କାରଣ ଦର ବଢ଼ାଇବା ଲାଗି ସେମାନେ ନିୟାମକଙ୍କ ମଞ୍ଜୁରୀ ନେବାର ଆବଶ୍ୟକତା ରହିଛି।
ବଜାର ବିଶେଷଜ୍ଞଙ୍କ କହିବା ମୁତାବକ, କୋଇଲାର ଅଭାବ ଯୋଗୁ ଯଦି କୋଇଲା ଅଭାବ ଯୋଗୁ ବିଜୁଳି ଶକ୍ତିର ଅଭାବ ଦେଖାଯାଏ ତେବେ ବିଶ୍ୱର ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥାର ଚକା ଜାମ୍ ହୋଇପାରେ। ଅର୍ଦ୍ଧାଧିକ ପ୍ଲାଣ୍ଟରେ ଉତ୍ପାଦନ ଠପ୍ ହେବା ନେଇ ମଧ୍ୟ ଆଶଙ୍କା କରାଯାଉଛି। ସରକାରୀ ତଥ୍ୟ ମୁତାବକ, ସେପ୍ଟେମ୍ବର ଶେଷ ସୁଦ୍ଧା ଦେଶର ପାଓ୍ବାର ପ୍ଲାଣ୍ଟଗୁଡିକ ନିକଟରେ ହାରାହାରି ୪ ଦିନର କୋଇଲା ଗଚ୍ଛିତ ଥିଲା। ଏହା ବର୍ଷର ସବୁଠୁ ସର୍ବନିମ୍ନ ସ୍ତର। ଚଳିତ ବର୍ଷ ଅଗଷ୍ଟ ଆରମ୍ଭ ବେଳକୁ ପାଓ୍ବାର ପ୍ଲାଣ୍ଟଗୁଡିକରେ ପ୍ରାୟ ୧୩ ଦିନର କୋଇଲା ଗଚ୍ଛିତ ଥିଲା। କୋଇଲା ଅଭାବ ଯୋଗୁ ଆଲୁମିନିୟମ, ଷ୍ଟିଲ୍ ଶିଳ୍ପ ସମେତ ଅନ୍ୟ ଶିଳ୍ପକ୍ଷେତ୍ରରେ ଗ୍ରାହକଙ୍କୁ ମିଳୁଥିବା ସପ୍ଲାଇରେ ଏବେ ହ୍ରାସ କରାଯାଉଛି। କୋଭିଡ୍ କଟକଣା ହଟୁଥିବାରୁ ବର୍ତ୍ତମାନ ଆର୍ଥତ୍କ କାର୍ଯ୍ୟକଳାପ ବଢ଼ିଛି। ଫଳରେ ବିଜୁଳି ଚାହିଦାରେ ମଧ୍ୟ ପରିବର୍ତ୍ତନ ଆସିଛି। ଅପରପକ୍ଷରେ କୋଇଲା ଉତ୍ପାଦନ ହ୍ରାସ ହୋଇଥିବାରୁ ଏହା ସମସ୍ୟାକୁ ବଢ଼ାଇଛି।
ଦେଶରେ ଆବଶ୍ୟକ ହେଉଥିବା କୋଇଲାର ପ୍ରାୟ ତିନି ଚତୁର୍ଥାଂଶ ଘରୋଇ ବଜାରର ଖଣିଗୁଡିକ ଭରଣା କରିଥାନ୍ତି। ମାତ୍ର ବର୍ଷା ଯୋଗୁ ବର୍ତ୍ତମାନ ପରିବହନ ରୁଟ୍ ଗୁଡିକରେ ପାଣି ଭର୍ତ୍ତି ହୋଇଯାଇଛି। ନିଲାମ ପ୍ରକ୍ରିୟାରେ ଭାଗ ନେଇ ଅଧିକ ପ୍ରିମିୟମ ଦେବା କିମ୍ବା ବିଦେଶରୁ କୋଇଲା ଆମଦାନୀ କରିବା ଭଳି ଦ୍ୱିଧା କମ୍ପାନୀଗୁଡିକ ସାମ୍ନାରେ ରହିଛି। ବିଦେଶରୁ କୋଇଲା ଆମଦାନୀ ପାଇଁ କମ୍ପାନୀଗୁଡିକ ଅଧିକ ଅର୍ଥ ମଧ୍ୟ ପ୍ରଦାନ କରିବାକୁ ପଡୁଛି। ପାଓ୍ବାର ପ୍ଲାଣ୍ଟଗୁଡିକ ନିକଟରେ ଗଚ୍ଛିତ ଥିବା କୋଇଲା ପରିମାଣ ବର୍ତ୍ତମାନ ୮୧ ଲକ୍ଷ ଟନ୍ ରହିଛି। ଏହା ଗତ ବର୍ଷ ସେପ୍ଟେମ୍ବର ତୁଳନାରେ ପ୍ରାୟ ୭୬% କମ୍। ସେହିଭଳି ଇଣ୍ଡିଆନ ଏନର୍ଜି ଏକ୍ସଚେଞ୍ଜରେ କୋଇଲାର ବିଜୁଳି ଦର ହାରାହାରି ପ୍ରତି ୟୁନିଟ ବଢି ୪.୪ ଟଙ୍କା ଛୁଇଁଛି। ଏହା ଗତ ବର୍ଷ ତୁଳନାରେ ପ୍ରାୟ ୬୩% ଅଧିକ। କୋଲ ଇଣ୍ଡିଆ ପାଓ୍ବାର ପ୍ଲାଣ୍ଟଗୁଡିକୁ କୋଇଲା ଯୋଗାଣ କମାଇ ଦେଇଥିବା ଆଲୁମିନିୟମ ଉତ୍ପାଦନକାରୀ କମ୍ପାନୀଗୁଡିକ ଦାବି କରିଛନ୍ତି। କୋଇଲା ଖଣିଗୁଡିକରେ ପାଣି ଭରିଯିବା ଯୋଗୁ ପାଓ୍ବାର ପ୍ଲାଣ୍ଟଗୁଡିକୁ ଦୈନିକ କୋଇଲା ଯୋଗାଣ ୬୦ରୁ ୮୦ ଟନ୍ ରହିଥିବା କୋଇଲା ସଚିବ ଅନୀଲ କୁମାର ଜୈନ କହିଛନ୍ତି। ଝାଡ଼ଖଣ୍ଡ ଏବଂ ଧାନବାଦରେ ଗତ ମାସରେ ପ୍ରବଳ ବର୍ଷ ଯୋଗୁ ଉତ୍ପାଦନ ବିଗିଡ଼ିଯାଇଛି। ଅକ୍ଟୋବର ଦ୍ୱିତୀୟ ସପ୍ତାହ କୋଇଲା ଯୋଗାଣ ବଢ଼ିପାରେ। ମାତ୍ର ଷ୍ଟକର ପୁରୁଣା ସ୍ତରକୁ ଫେରିବା ଲାଗି ପାଓ୍ବାର ପ୍ଲାଣ୍ଟଗୁଡିକୁ କିଛି ସମୟ ଲାଗିପାରେ।
