ଅନ୍ତରୀଣ ବଜେଟ ଉତ୍ପାଦନ କ୍ଷେତ୍ରକୁ ଆଗକୁ ବଢ଼ାଇବ
8:38 amFebruary 3, 2024February 3, 2024 / 02

ଭୁବନେଶ୍ୱର,୩।୨: ଜିନ୍ଦଲ ଷ୍ଟେନ୍‌ଲେସ୍‌ ଲିମିଟେଡ୍‌ (ଜେଏସ୍‌ଏଲ୍‌) ପକ୍ଷରୁ ୨୦୨୪-୨୦୨୫ ଆର୍ଥିକ ବର୍ଷ ଅନ୍ତରୀଣ ବଜେଟକୁ ଅଭିବୃଦ୍ଧିଭିତ୍ତିକ ବଜେଟ ଭାବେ ସ୍ବାଗତ କରାଯାଇଛି। ବିଶେଷକରି ଉକ୍ତ ବଜେଟରେ ପୁଞ୍ଜି ବିନିଯୋଗ, ଭିତ୍ତିଭୂମି ବିକାଶ, ରେଳ, ପ୍ରତିରକ୍ଷା ଏବଂ ବିମାନ ଚଳାଚଳ ଉପରେ ବିଶେଷ ଧ୍ୟାନ ଦିଆଯାଇଛି। ଏ ନେଇ ଜିନ୍ଦଲ ଷ୍ଟେନ୍‌ଲେସ୍‌ର ପରିଚାଳନା ନିର୍ଦ୍ଦେଶକ ଅଭ୍ୟୁଦୟ ଜିନ୍ଦଲ କହିଛନ୍ତି, ମଧ୍ୟବର୍ତ୍ତୀ ବଜେଟର ଏକ ଗୁରୁତ୍ୱପୂର୍ଣ୍ଣ ବିନ୍ଦୁ ହେଉଛି, ପୁଞ୍ଜି ଖର୍ଚ୍ଚରେ ୧୧.୧% ବୃଦ୍ଧି, ଯାହା ୧୧.୧୧ଲକ୍ଷ କୋଟି ଭାରତୀୟ ମୁଦ୍ରାର ଖର୍ଚ୍ଚ ବୃଦ୍ଧି ଏବଂ ଜିଡିପିର ୩.୪% ବୋଲି ଆକଳନ କରାଯାଇଥାଏ। ଏପରିକି ଭିତ୍ତିଭୂମି ବିକାଶ ଉପରେ କେନ୍ଦ୍ର ସରକାରଙ୍କର ଏହି ଅଦମ୍ୟ ଗୁରୁତ୍ୱ ଏକ ବିକଶିତ ଓ ଆତ୍ମନିର୍ଭର ଭାରତର ଦୃଷ୍ଟିକୋଣ ସହ ସମାନ୍ତରାଳ ଭାବେ ଉତ୍ପାଦନ କ୍ଷେତ୍ରକୁ ଆଗକୁ ବଢାଇବ ବୋଲି ଆଶା କରାଯାଉଛି। ସେହିଭଳି ପ୍ରଧାନମନ୍ତ୍ରୀ ଗତିଶକ୍ତି ଯୋଜନା ଅନ୍ତର୍ଗତ ରେଳ କରିଡର କାର୍ଯ୍ୟକ୍ରମ ଏବଂ ରେଳ ବଗିଗୁଡ଼ିକୁ ବନ୍ଦେ ଭାରତ କୋଚରେ ପରିଣତ କରିବା ଭଳି ପ୍ରମୁଖ ଘୋଷଣା ଗମନାଗମନ ଏବଂ ଯାତ୍ରୀ ସୁରକ୍ଷା ଉପରେ ସକାରାତ୍ମକ ପ୍ରଭାବ ପକାଇବ ବୋଲି ସେ ବିସ୍ତୃତ ଭାବେ ମତପ୍ରକାଶ କରିଛନ୍ତି। ଅପରପକ୍ଷରେ ଭାରତ-ୟୁରୋପ-ମଧ୍ୟ-ପୂର୍ବ କରିଡରର ପ୍ରସ୍ତାବ ହେଉଛି, ବାଣିଜ୍ୟ ବିସ୍ତାର ଏବଂ ଅର୍ଥନୈତିକ ସମ୍ପର୍କକୁ ସୁଦୃଢ କରିବା ନିମନ୍ତେ ଏକ ଉଚିତ ରଣନୀତିକ ପଦକ୍ଷେପ। ଏପରିକି ସ୍ଥିରତା ଉପରେ ଏହି ବଜେଟର ଧ୍ୟାନ, ବିଶେଷତଃ ଛାତ ଉପର ସୌରଶକ୍ତି ଉତ୍ପାଦନ, ଷ୍ଟେନ୍‌ଲେସ୍‌ ଷ୍ଟିଲ୍‌ ଶିଳ୍ପର ପରିବେଶ ଦାୟିତ୍ୱ ସହିତ ପ୍ରତିବଦ୍ଧତା ସହ ସମାନ୍ତରାଳ ଏବଂ ଦକ୍ଷତା ବୃଦ୍ଧି, ଉଦ୍ୟୋଗ ତଥା ଉଦ୍ୟୋଗୀମାନଙ୍କୁ ସମର୍ଥନ ଏବଂ ଶିକ୍ଷାଗତ ଭିତ୍ତିଭୂମିକୁ ମଜଭୁତ କରି ଯୁବ ସଶକ୍ତୀକରଣ, ସମୃଦ୍ଧ ଏବଂ ସ୍ଥାୟୀ ଭବିଷ୍ୟତ ନିର୍ମାଣରେ ସହାୟକ ହେବ।