ନୂଆଦିଲ୍ଲୀ,୨୨ ।୩ କୋଭିଡ୍ ମହାମାରୀ ସାଙ୍ଗକୁ ଅଶୋଧିତ ତୈଳ ଦର ବୃଦ୍ଧି ଭାରତ ପାଇଁ ଅନେକ ସମସ୍ୟା ସୃଷ୍ଟି କରିଛି। ସେହିଭଳି ପରିବା ହାଟରୁ ପରିବହନ ଏପରିକି ଅତ୍ୟାବଶ୍ୟକ ସାମଗ୍ରୀ ଓ ଉତ୍ପାଦଗୁଡ଼ିକର ଦର ବୃଦ୍ଧି ଯୋଗୁ ଭାରତୀୟ ଅର୍ଥ ବ୍ୟବସ୍ଥା ବର୍ତ୍ତମାନ ସମୟରେ ବିଭିନ୍ନ ଚ୍ୟାଲେଞ୍ଜ ମଧ୍ୟ ଦେଇ ଗତି କରୁଛି। ଏଭଳି ସ୍ଥିତିରେ ଦେଶର ଅର୍ଥ ବ୍ୟବସ୍ଥାକୁ ସମ୍ଭାଳିବା ପାଇଁ ଆମେ ଯଥା ସମ୍ଭବ ପ୍ରୟାସ ଓ ସାହାଯ୍ୟ ଯୋଗାଇ ଦେଉଛୁ ବୋଲି ସୋମବାର ଭାରତୀୟ ରିଜର୍ଭ ବ୍ୟାଙ୍କ୍ (ଆର୍ବିଆଇ)ଗଭର୍ନର ଶକ୍ତିକାନ୍ତ ଦାସ ମତବ୍ୟକ୍ତ କରିଛନ୍ତି। ଭାରତୀୟ ଶିଳ୍ପ ମହାସଂଘ (ସିଆଇଆଇ)ର ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଯୋଗ ଦେଇ ଶଶିକାନ୍ତ କହିଛନ୍ତି, ୨୦୨୦ ମାର୍ଚ୍ଚରୁ କୋଭିଡ୍ ପ୍ରବେଶ ଯୋଗୁ ଦେଶର ଅର୍ଥ ବ୍ୟବସ୍ଥା ବହୁସମସ୍ୟା ଦେଇ ଗତି କରୁଛି। ଏପରିକି ବର୍ତ୍ତମାନ ସୁଦ୍ଧା ୧୭ ଲକ୍ଷ କୋଟି ଟଙ୍କାର ପୁଞ୍ଜି ମଧ୍ୟ ସରକାରଙ୍କୁ ପ୍ରଦାନ କରାଯାଇଛି। ଦେଶର ଅର୍ଥବ୍ୟବସ୍ଥାରେ ପର୍ଯ୍ୟାପ୍ତ ଅର୍ଥ ଥିବା ସମ୍ପର୍କରେ ସୁନିଶ୍ଚିତ କରିବାକୁ ସର୍ବଦା ଚେଷ୍ଟା କରିଆସିଥିବା କଥା ମଧ୍ୟ ସେ କହିଛନ୍ତି। ପୁଞ୍ଜି ପର୍ଯ୍ୟାପ୍ତ ଅନୁପାତ ୧୬% ତଥା ଅଦରକାରୀ ସମ୍ପତ୍ତି (ଏନ୍ପିଏ) ୬.୫%ରୁ ତଳସ୍ତରରେ ଥିବା କାରଣରୁ ବର୍ତ୍ତମାନ ବ୍ୟାଙ୍କ୍ଗୁଡ଼ିକର ସ୍ଥିତି ଭଲ ରହିଛି। ରୁଷିଆ-ୟୁକ୍ରେନ୍ ଯୁଦ୍ଧ ସତ୍ତ୍ୱେ ବିଦେଶୀ ମୁଦ୍ରା ଭଣ୍ଡାର ଏବଂ ଚାଲୁରହିଥିବା ଆକାଉଣ୍ଟରେ କମ୍ କ୍ଷତି ଘଟିଛି। ତେଣୁ ଦେଶର ଅର୍ଥବ୍ୟବସ୍ଥା ଭଲ ସ୍ଥିତିରେ ରହିଛି। କୌଣସି ପ୍ରକାର ଆର୍ଥିକ ଆହ୍ବାନକୁ ଅତିକ୍ରମ କରିବାକୁ ଆମେ ପ୍ରସ୍ତୁତ ବୋଲି ଆର୍ବିଆଇ ଗଭର୍ନର ଦାସ କହିଛନ୍ତି। ସେହିପରି କେନ୍ଦ୍ରୀୟ ବ୍ୟାଙ୍କ ଦେଶର ଅର୍ଥନୀତିକୁ ମଜଭୁତ କରିବା ପାଇଁ ପର୍ଯ୍ୟାପ୍ତ ନଗଦକୁ ସୁନିଶ୍ଚିତ କରିବା ସହ ଦେଶର ଅର୍ଥବ୍ୟବସ୍ଥା ବର୍ତ୍ତମାନ ସମୟରେ ତୈଳ ଦର ବୃଦ୍ଧି ଏବଂ ପ୍ରମୁଖ ଅତ୍ୟାବ୍ୟଶକ ସାମଗ୍ରୀ ଓ ବସ୍ତୁଗୁଡିକର ମୂଲ୍ୟ ବୃଦ୍ଧି ସହ ଅନ୍ୟ ସମସ୍ୟାର ମୁକାବିଲା କରୁଛି।
