ଓ୍ବାଶିଂଟନ: କରୋନା ଭାଇରସ୍ ଯୋଗୁ ଭାରତୀୟ ଅର୍ଥ ବ୍ୟବସ୍ଥାକୁ ଜୋର୍ଦାର ଝଟକା ଲାଗିଛି। ଫଳରେ ଚଳିତ ଆର୍ଥତ୍କ ବର୍ଷ ଭାରତର ମୋଟ୍ ଘରୋଇ ଉତ୍ପାଦ(ଜିଡିପି) ୧୦.୩% ଖସିବ ବୋଲି ଅନ୍ତର୍ଜାତୀୟ ମୁଦ୍ରାପାଣ୍ଠି(ଆଇଏମ୍ଏଫ୍) ମଙ୍ଗଳବାର ପୂର୍ବାନୁମାନ କରିଛି। ପରବର୍ତ୍ତୀ ଆର୍ଥତ୍କ ବର୍ଷରେ ଜିଡିପି ପୁଣି ଥରେ ଅଭିବୃଦ୍ଧି ପଥକୁ ଫେରିବ ବୋଲି ଏହି ଏଜେନ୍ସି ମତ ରଖିଛି। ୨୦୨୧ରେ ଭାରତ ଚାଇନାକୁ ଟପି ପୁଣି ଥରେ ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥା ହେବାକୁ ସକ୍ଷମ ହେବ। ଏହି ସମୟରେ ଘରୋଇ ବଜାରର ବିକାଶ ହାର ୮.୮% ରହିବ ବୋଲି ଆଇଏମ୍ଏଫ୍ ଏହାର ଓ୍ବାର୍ଲଡ ଇକୋନୋମିକ ଆଉଟ୍ଲୁକ୍ ରିପୋର୍ଟରେ ପ୍ରକାଶ କରିଛି। ଓ୍ବାର୍ଲଡ ବ୍ୟାଙ୍କ ଏବଂ ଆଇଏମ୍ଏଫ୍ର ବାର୍ଷିକ ବୈଠକ ଆଗରୁ ଏଭଳି ରିପୋର୍ଟ ପ୍ରକାଶ ପାଇଛି। ଚଳିତ ଆର୍ଥତ୍କ ବର୍ଷ ବିଶ୍ୱ ଅର୍ଥ ବ୍ୟବସ୍ଥା ୪.୪% ଖସିବ। ଏହା ଆଗାମୀ ଆର୍ଥତ୍କ ବର୍ଷରେ ପୁଣି ଥରେ ଅଭିବୃଦ୍ଧି ପଥକୁ ଫେରିବା ସହ ବିକାଶ ହାର ୫.୨% ରହିବ ବୋଲି ଆକଳନ କରାଯାଇଛି।
୨୦୨୦ରେ ଆମେରିକା ଅର୍ଥ ବ୍ୟବସ୍ଥା ୫.୮% ଖସିବା ନେଇ ଆକଳନ କରାଯାଇଛି। ଆସନ୍ତା ଆର୍ଥତ୍କ ବର୍ଷ ଏହି ଦେଶ ୩.୯% ହାରରେ ବିକାଶ ହାସଲ କରିବ। ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥା ମଧ୍ୟରେ ଚାଇନା କେବଳ ଏକମାତ୍ର ଦେଶ ଯାହା ଚଳିତ ଆର୍ଥତ୍କ ବର୍ଷରେ ୧.୯% ଅଭିବୃଦ୍ଧି ହାସଲ କରିବା ନେଇ ପୂର୍ବାନୁମାନରେ କୁହାଯାଇଛି। ଭାରତର ଜିଡିପି ହ୍ରାସ ନେଇ ପୂର୍ବରୁ ଯେଉଁ ଆକଳନ କରାଯାଇଥିଲା ସେହି ହାରକୁ ବର୍ତ୍ତମାନ ବିଭିନ୍ନ ରେଟିଂ ଏଜେନ୍ସି ପରିବର୍ତ୍ତନ କରୁଛନ୍ତି। କାରଣ କରୋନାର ପ୍ରଭାବ ଯୋଗୁ ଅର୍ଥ ବ୍ୟବସ୍ଥାକୁ ମାତ୍ରାଧିକ କ୍ଷତି ସହିବାକୁ ପଡିଛି। ୨୦୧୯ରେ ଭାରତୀୟ ଅର୍ଥ ବ୍ୟବସ୍ଥାର ଅଭିବୃଦ୍ଧି ୪.୨% ରହିଥିଲା। ଘରୋଇ ବଜାରର ଜିଡିପି ୯.୬% ଖସିବ ବୋଲି କିଛିଦିନ ଆଗରୁ ଓ୍ବାର୍ଲଡ ବ୍ୟାଙ୍କ ଏହାର ଆକଳନରେ କହିଥିଲା। ଭାରତ ବଜାର ପୂର୍ବ ତୁଳନାରେ ବେଶି ସଙ୍କଟ ସ୍ଥିତି ଦେଇ ଗତି କରୁଛି ବୋଲି ଓ୍ବାର୍ଲଡ ବ୍ୟାଙ୍କର ଦକ୍ଷିଣ ଏସିଆ ଅର୍ଥନୀତିଜ୍ଞ ହାନ୍ସ ଟିମର ନିକଟରେ କହିଛନ୍ତି। କରୋନା ଭାଇରସ୍କୁ ନିୟନ୍ତ୍ରଣ କରିବା ଲାଗି ସରକାର ଜାରି କରିଥିବା କଟକଣା ଯୋଗୁ ବଜାରର ଚାହିଦା ଏବଂ ଯୋଗାଣ ପ୍ରଭାବିତ ହୋଇ ରହିଥିବା ବିଶ୍ୱ ବ୍ୟାଙ୍କ ଏହାର ରିପୋର୍ଟରେ କହିଥିଲା।
