ନୂଆଦିଲ୍ଲୀ: ସାମଗ୍ରୀ ଓ ସେବା ଟିକସ(ଜିଏସ୍ଟି) ବ୍ୟବସ୍ଥାରେ ରାଜ୍ୟଗୁଡିକୁ କ୍ଷତିପୂରଣ ପ୍ରଦାନ କରିବା ନେଇ କେନ୍ଦ୍ର ଏବଂ ରାଜ୍ୟ ମଧ୍ୟରେ ରହିଥିବା ମତଭେଦ ଏବେ ସମାଧାନ ହୋଇଛି। ପ୍ରଥମ ବିକଳ୍ପ ସପକ୍ଷରେ ଦେଶର ସବୁ ରାଜ୍ୟ ବର୍ତ୍ତମାନ ସମ୍ମତି ଜଣାଇଛନ୍ତି। ଫଳରେ ଦୀର୍ଘଦିନ ଧରି ଲାଗି ରହିଥିବା ସମସ୍ୟା ଏବେ ସମାଧାନ ହୋଇଯାଇଛି। ରିଜର୍ଭ ବ୍ୟାଙ୍କ ଓ୍ବିଣ୍ଡୋରୁ ୯୭ ହଜାର କୋଟି କିମ୍ବା ଖୋଲା ବଜାରରୁ ୨.୩୫ ଲକ୍ଷ କୋଟି ଟଙ୍କା ଋଣ କରିବାର ବିକଳ୍ପ ରାଜ୍ୟଗୁଡିକ ସାମ୍ନାରେ ରହିଥିଲା। ଏବେ ପ୍ରଥମ ବିକଳ୍ପକୁ ରାଜ୍ୟ ସମ୍ମତି ଜଣାଇ ସ୍ବତନ୍ତ୍ର ଓ୍ବିଣ୍ଡୋରୁ ୧.୧ ଲକ୍ଷ କୋଟି ଟଙ୍କାର ଋଣ ଉଠାଇବେ। ପ୍ରଥମ ବିକଳ୍ପ ସପକ୍ଷରେ ପ୍ରାୟ ରାଜ୍ୟ ମତ ରଖିଥିବା ବେଳେ କେବଳ ଝାଡ଼ଖଣ୍ଡ ସମ୍ମତି ଜଣାଇ ନ ଥିଲା। ବର୍ତ୍ତମାନ ଝାଡ଼ଖଣ୍ଡ ମଧ୍ୟ ଏହି ବିକଳ୍ପକୁ ଆପଣାଇ ନେଇଛି।
ସ୍ବତନ୍ତ୍ର ଓ୍ବିଣ୍ଡୋ ଋଣ ଦ୍ୱାରା ଝାଡ଼ଖଣ୍ଡକୁ ୧୬୮୯ କୋଟି ଟଙ୍କା ମିଳିବ। ଏହା ସହ ରାଜ୍ୟ ଜିଡିପିର ୦.୫% ଋଣ ଉଠାଇବାକୁ ମଧ୍ୟ ଅନୁମତି ମିଳିବ। ଏହି ଭଳି ଭାବେ ମୋଟ ୧୭୬୫ କୋଟି ଟଙ୍କା ସଂଗ୍ରହ କରିବାକୁ ଏହି ରାଜ୍ୟ ସକ୍ଷମ ହେବ। ରାଜ୍ୟଗୁଡିକ ଲାଗି କେନ୍ଦ୍ର ସରକାର ପୂର୍ବରୁ ୩୦ ହଜାର କୋଟି ଟଙ୍କାର ଋଣ ଉଠାଣ କରିଛନ୍ତି। ଏହି ରାଶି ରାଜ୍ୟଗୁଡିକୁ ପ୍ରଦାନ କରାଯାଇଛି। ଝାଡ଼ଖଣ୍ଡକୁ ଆଗାମୀ କିସ୍ତିରେ ୬ ହଜାର କୋଟି ଟଙ୍କା ମିଳିବ। ୭ ଡିସେମ୍ବରରେ ଏହି କିସ୍ତି ପ୍ରଦାନ କରାଯିବ।
କେନ୍ଦ୍ର ସରକାର କ୍ଷତିପୂରଣ ଲାଗି ପୂର୍ବରୁ ୨ଟି ପ୍ରସ୍ତାବ ଦେଇଥିଲେ। ପ୍ରଥମ ପ୍ରସ୍ତାବର ୯୭ ହଜାର କୋଟି ଟଙ୍କାକୁ ବଢ଼ାଯାଇ ୧.୧ ଲକ୍ଷ କୋଟି ଟଙ୍କା କରାଯାଇଛି।
ଏହି ରାଶିକୁ ଋଣ କରି ରାଜ୍ୟଗୁଡିକୁ ପ୍ରଦାନ କରିବା ଉପରେ କେନ୍ଦ୍ର ପ୍ରଥମେ ସହମତି ପ୍ରକାଶ କରିଛି। ଦ୍ୱିତୀୟ ବିକଳ୍ପକୁ ପରେ ହଟାଇ ଦିଆଯାଇଛି। ପ୍ରଥମେ ଝାଡ଼ଖଣ୍ଡ, ଛତିଶଗଡ଼, ପଞ୍ଜାବ, ପଶ୍ଚିମବଙ୍ଗ ଏବଂ କେରଳ କୌଣସି ବିକଳ୍ପ ସପକ୍ଷରେ ନ ଥିଲେ। ବର୍ତ୍ତମାନ ଏହି ପ୍ରସଙ୍ଗ ଉପରେ କେନ୍ଦ୍ର ଏବଂ ରାଜ୍ୟ ମଧ୍ୟରେ ସହମତି ପ୍ରକାଶ ପାଇଛି। ସ୍ପେଶାଲ ଓ୍ବିଣ୍ଡୋ ସୁବିଧା ଅନ୍ତର୍ଗତ ରାଜ୍ୟଗୁଡିକୁ କିସ୍ତିରେ ପାଣ୍ଠି ଯୋଗାଣ ଜାରି ରହିବ। ସେହିଭଳି ରାଜ୍ୟଗୁଡିକୁ ଅତିରିକ୍ତ ୧.୦୬ ଲକ୍ଷ କୋଟି ଟଙ୍କାର ଅତିରିକ୍ତ ରାଶି ଋଣ କରିବା ଲାଗି ଅନୁମତି ଦିଆଯାଇଛି।
