କୋଦାଡ଼, ୨୧।୭: କରୋନା ମହାମାରୀ ସଂକ୍ରମଣ ଯୋଗୁ ଦେଶରେ ଲୋକଙ୍କ ମଧ୍ୟରେ ଆତଙ୍କ ଦେଖାଦେଇଛି। କେତେକ ଅଞ୍ଚଳରେ କରୋନା ଆକ୍ରାନ୍ତଙ୍କ ମୃତଦେହକୁ ଅନ୍ତିମ ସଂସ୍କାର ପାଇଁ ନେବାକୁ ଲୋକେ ଆସୁ ନ ଥିବା ଘଟଣାମାନ ଘଟୁଛି। ସମ୍ପ୍ରତି ତେଲଙ୍ଗାନାରେ ଜଣେ ନାତି ବୁଢ଼ୀମାଙ୍କୁ ପିପିଇ କିଟ୍ ପିନ୍ଧି ମୁଖାଗ୍ନି ଦେଇଛନ୍ତି। କୋଦାଡ଼ ଅଞ୍ଚଳର ମୁନଗାଲା ଗାଁରେ ଏଭଳି ଘଟିଛି। ବୁଢ଼ୀମାଙ୍କର ମୃତ୍ୟୁ ଘଟିଥିଲା। ଭୟରେ ଗାଁ ଲୋକେ ଶ୍ମଶାନ ପର୍ଯ୍ୟନ୍ତ କୋକେଇକୁ ବୋହି ନେବାକୁ ଆସି ନ ଥିଲେ। ନାତିଙ୍କଠାରେ କରୋନା ଲକ୍ଷଣ ଦେଖାଦେଇଥିବାରୁ ସେ କ୍ୱାରାଣ୍ଟାଇନ୍ରେ ଥିଲେ। ଗାଁ ଲୋକେ ତାଙ୍କୁ ଫୋନ୍ କରି ଏସମ୍ପର୍କରେ ସୂଚନା ଦେଇଥିଲେ। ସେ ସନ୍ଧ୍ୟା ୭ଟାରେ ଗାଁରେ ପହଞ୍ଚି ମୃତଦେହ ନେବାକୁ କାକୁତି ମିନତି କରିଥିଲେ। ତେବେ ଗାଁ ଲୋକେ ନ ଆସିବାରୁ ସେ ପିପିଇ କିଟ୍ ପିନ୍ଧି ବୁଢ଼ୀମାଙ୍କୁ ନିଜ କାରରେ ଶ୍ମଶାନକୁ ନେଇ ସେଠାରେ ଅନ୍ତିମ ସଂସ୍କାର କରିଥିଲେ। ଏବେ ଏହି ଘଟଣା ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି।
