ନୂଆଦିଲ୍ଲୀ: ନିଯୁକ୍ତି ସୃଷ୍ଟିକୁ ଉତ୍ସାହିତ କରିବା ଲାଗି କେନ୍ଦ୍ର ସରକାର ଇପିଏଫ୍ ସବ୍ସିଡି ସ୍କିମ୍ ସମ୍ପର୍କରେ ଘୋଷଣା କରିଛନ୍ତି। କେନ୍ଦ୍ର କ୍ୟାବିନେଟ ବୁଧବାର ଏହି ଯୋଜନାକୁ ମଞ୍ଜୁରୀ ପ୍ରଦାନ କରିଛି। ଯେଉଁ ସଂସ୍ଥାଗୁଡ଼ିକ ଆଗାମୀ ୨ ବର୍ଷରେ ଅତିରିକ୍ତ ଶ୍ରମଶକ୍ତି ନିଯୁକ୍ତି ଦେବେ ଉକ୍ତ କ୍ଷେତ୍ରରେ ସରକାର ପ୍ରୋତ୍ସାହନ ସ୍ବରୂପ କର୍ମଚାରୀ ଭବିଷ୍ୟନିଧି ପାଣ୍ଠି (ଇପିଏଫ୍) ଯୋଗଦାନ ଦେବାର ପ୍ରସ୍ତାବ ରହିଛି। ଚଳିତ ଆର୍ଥତ୍କ ବର୍ଷ ଲାଗି ଏହି ଯୋଜନାରେ ୧୫୮୪ କୋଟି ଟଙ୍କା ଯୋଗାଇ ଦିଆଯିବ। ସେହିଭଳି ୨୦୨୩ ଯାଏ ସରକାର ଏହି ବାବଦରେ ୨୨,୮୧୦ କୋଟି ଟଙ୍କା ପ୍ରଦାନ କରିବେ।
ପୂର୍ବରୁ ଅର୍ଥମନ୍ତ୍ରୀ ନିର୍ମଳା ସୀତାରାମନ ଆତ୍ମନିର୍ଭର ଭାରତ ରୋଜଗାର ଯୋଜନା(ଏବିଆର୍ଓ୍ବାଇ) ଘୋଷଣା କରିଛନ୍ତି। କେନ୍ଦ୍ର ସରକାରଙ୍କ ପ୍ରୋତ୍ସାହନ ପ୍ୟାକେଜ ଅଧୀନରେ ଏହି ଯୋଜନା ଘୋଷଣା କରାଯାଇଥିଲା। ଉକ୍ତ ଯୋଜନାରେ ଆସନ୍ତା ବର୍ଷ ଜୁନ ସୁଦ୍ଧା ପ୍ରାୟ ୬୦ ଲକ୍ଷ ନିଯୁକ୍ତି ସୃଷ୍ଟି କରିବା ଲାଗି ଲକ୍ଷ୍ୟ ରଖାଯାଇଥିବା ପ୍ରକ୍ରିୟା ସହ ଜଡିତ ଜଣେ ଅଧିକାରୀ କହିଛନ୍ତି। ଏହି ପରିପ୍ରେକ୍ଷୀରେ କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି, ସରକାର ୨ ବର୍ଷ ଲାଗି ସବ୍ସିଡି ଯୋଗାଇଦେବା ଲାଗି ଯୋଜନା ରଖିଛନ୍ତି। ସଂସ୍ଥାଗୁଡିକ ଚଳିତ ବର୍ଷ ଅକ୍ଟୋବର କିମ୍ବା ଅକ୍ଟୋବର ପରେ ନୂଆ ନିଯୁକ୍ତି ଦେଇଥିଲେ ଏହାର ଲାଭ ଉଠାଇପାରିବେ। ୨୦୨୧ ଜୁନ ୩୦ ପର୍ଯ୍ୟନ୍ତ ଅବଧି ଯାଏ ଏହି ସୁବିଧା ନେଇହେବ। ଉଭୟ କର୍ମଚାରୀ ଏବଂ ନିଯୁକ୍ତିଦାତାଙ୍କ ଲାଗି ୧୨% ଲେଖାଏ ଇପିଏଫ୍ ଯୋଗଦାନ ସରକାର ଦେବେ। କମ୍ପାନୀ ୧୦୦୦ ପର୍ଯ୍ୟନ୍ତ କର୍ମଚାରୀ ନିଯୁକ୍ତି ଦେଇଥିଲେ ଯୋଜନାର ଲାଭ ନେଇପାରିବେ।
ସେହିଭଳି କୌଣସି କମ୍ପାନୀରେ ୧୦୦୦ରୁ ଅଧିକ ଲୋକ କାମ କରୁଥିଲେ ସରକାର କେବଳ ୧୨% ଇପିଏଫ୍ ଯୋଗଦାନ କର୍ମଚାରୀଙ୍କ ଲାଗି ପ୍ରଦାନ କରିବେ। ୨ବର୍ଷ ସରକାର ଯୋଗଦାନ ରଖିବେ। କର୍ମଚାରୀଙ୍କ ମାସିକ ବେତନ ୧୫ ହଜାର ଟଙ୍କାରୁ କମ୍ ହୋଇଥିଲେ ମଧ୍ୟ ସେ ଯୋଜନାର ଲାଭ ନେଇପାରିବେ। କର୍ମଚାରୀ ଯଦି କରୋନା ମହାମାରୀ କାଳରେ ଅର୍ଥାତ୍ ୨୦୨୦ ମାର୍ଚ୍ଚ୧ରୁ ୩୦ ସେପ୍ଟେମ୍ବର ମଧ୍ୟରେ ଚାକିରି ହରାଇଥିବେ ଏବଂ ୨୦୨୦ ସେପ୍ଟେମ୍ବର ୩୦ ପର୍ଯ୍ୟନ୍ତ ଅନ୍ୟ କୌଣସି ଇପିଏଫ୍ ପଞ୍ଜୀକୃତ ସଂସ୍ଥାରେ କାର୍ଯ୍ୟ କରୁ ନ ଥିବେ ସେମାନେ ମଧ୍ୟ ଏହି ସୁବିଧା ପାଇବେ। ଇପିଏଫ୍ ପକ୍ଷରୁ ଏହି ସରକାରୀ ସହାୟତା ରାଶିକୁ ସମ୍ପୃକ୍ତ ସଦସ୍ୟଙ୍କ ଆଧାର ସଂଯୋଗ ହୋଇଥିବା ଆକାଉଣ୍ଟ ନମ୍ବରରେ ଇଲେକ୍ଟ୍ରୋନିକ୍ସ ବ୍ୟବସ୍ଥାରେ ଜମା କରାଯିବ। ଏହି ସ୍କିମ୍ ପାଇଁ ଇପିଏଫ୍ଓ ଏକ ସଫ୍ଟଓ୍ବେର ପ୍ରସ୍ତୁତ କରିବ। ସମ୍ପୃକ୍ତ କର୍ମଚାରୀ ଯେପରି ଉପକୃତ ହୋଇପାରିବେ ସେଥିପାଇଁ ଏକ ପଦ୍ଧତି ବିକଶିତକରି ସ୍ବଚ୍ଛ ଭାବେ ସେମାନଙ୍କ ଆକାଉଣ୍ଟକୁ ଅର୍ଥ ପ୍ରେରଣ କରିବା ସୁବିଧା କରାଯିବ।
