ଭୁବନେଶ୍ୱର,୨୨ା୭(ବ୍ୟୁରୋ)-କୋଭିଡ୍-୧୯ ମହାମାରୀ ଚକ୍ରବୂ୍ୟହରେ ଫସି ଯାଇଛି ରାଜକୋଷ। ନୂତନ ଯୋଜନା କାର୍ଯ୍ୟକାରୀ କରିବା ଦୂରର କଥା ଚାଲୁ ରହିଥିବା ଯୋଜନା ପାଇଁ ମଧ୍ୟ ପାଣ୍ଠି ଅଭାବ ପରିସ୍ଥିତି ସୃଷ୍ଟି ହେବାକୁ ଯାଉଛି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ୨୦୨୦-୨୧ ଆର୍ଥିକ ବର୍ଷରେ କରିଥିବା ବଜେଟକୁ କାଣ୍ଟଛାଣ୍ଟ କରିବେ। ଏଥିସହିତ କୋଭିଡ୍ ମୁକାବିଲା ଓ ଅନ୍ୟାନ୍ୟ ଖର୍ଚ୍ଚ ତୁଲାଇବା ପାଇଁ ଖୋଲା ବଜାରରୁ ଋଣ କରିବେ। ରାଜ୍ୟ ସରକାର ୩ ପ୍ରତିଶତ ସୁଧ ହାରରେ କାମ୍ପା ଫଣ୍ଡ, ଓଡ଼ିଶା ଖଣିଜ ସମ୍ପଦ ଅଞ୍ଚଳ ଉନ୍ନୟନ ନିଗମ(ଓଏମ୍ବିଡିଏସି) ମଧ୍ୟ ଋଣ କରିବେ। ବୁଧବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଭିଡିଓ କନଫରେନ୍ସ ଜରିଆରେ ଅନୁଷ୍ଠିତ ରାଜ୍ୟ ମନ୍ତ୍ରୀ ପରିଷଦ ବୈଠକରେ ଏହି ନିଷ୍ପତ୍ତି ନିଆଯାଇଛି।
ରାଜ୍ୟରେ ସ୍ବାସ୍ଥ୍ୟ ସେବା ଅବ୍ୟାହତ ରଖିବାକୁ ଆବଶ୍ୟକ ଅର୍ଥ ବରାଦ କରାଯିବ। ସମସ୍ତ ସାମାଜିକ ସୁରକ୍ଷା କାର୍ଯ୍ୟକ୍ରମ ଚାଲୁରହିବ। ଶିକ୍ଷା କ୍ଷେତ୍ରରେ ସମସ୍ତ ଯୋଜନା ଜାରିରହିବ। ଗ୍ରାମାଞ୍ଚଳରେ ଜୀବିକା ନିର୍ବାହ ଉପାୟ ବୃଦ୍ଧି ପାଇଁ ଉଦ୍ଦିଷ୍ଟ କାର୍ଯ୍ୟକ୍ରମ ଉପରେ ଗୁରତ୍ୱ ଦିଆଯିବ। ଚାଲୁ ରହିଥିବା କାର୍ଯ୍ୟ ଓ ପ୍ରକଳ୍ପ ବନ୍ଦ ହେବ ନାହିଁ। ଅଣ ଅଗ୍ରାଧିକାର କ୍ଷେତ୍ର ଖର୍ଚ୍ଚ ଉପରେ କଟକଣା ଜାରି ରହିବ। କମ୍ ସୁଧହାରରେ ମିଳୁଥିବା ପାଣ୍ଠିରୁ ଋଣ କରାଯିବ। ଅନ୍ଲାଇନ ସେବା ପ୍ରଦାନ ଓ ଡିଜିଟାଲ ମୋଡରେ କାର୍ଯ୍ୟ ସମ୍ପାଦନକୁ ତ୍ୱରାନ୍ବିତ କରାଯିବା ନେଇ ବୈଠକରେ ନିଷ୍ପତ୍ତି ହୋଇଛି।
ବୈଠକ ପରେ ଗଣମାଧ୍ୟମକୁ ସୂଚନା ଦେଇ ମୁଖ୍ୟ ଶାସନ ସଚିବ କହିଛନ୍ତି ଯେ, କୋଭିଡ୍ କେନ୍ଦ୍ର ସରକାରଙ୍କୁ ମଧ୍ୟ ପ୍ରଭାବିତ କରିଛି। କେନ୍ଦ୍ର ପ୍ରବର୍ତ୍ତିତ ଯୋଜନାଗୁଡିକ ପାଇଁ ଆସୁଥିବା ଅନୁଦାନ ହ୍ରାସ ପାଇବ। ଏଥିପାଇଁ ରାଜ୍ୟ ସରକାର ଖୋଲା ବଜାରରୁ ଋଣ କରିବେ। ଗତ ଦୁଇ ଦଶନ୍ଧି ଧରି ରାଜ୍ୟ ସରକାର ଫାଇନାନ୍ସିଆଲ ରେସ୍ପନ୍ସିବିଲିଟି ଆଣ୍ଡ ବଜେଟ ମ୍ୟାନେଜମେଣ୍ଟ ଆକ୍ଟ(ଏଫ୍ଆର୍ବିଏମ) ଆଇନ ଧାର୍ଯ୍ୟ ଲକ୍ଷ୍ୟରେ କାର୍ଯ୍ୟକରି ଚାଲିଥିଲେ । ବାର୍ଷିକ ୩ ପ୍ରତିଶତରୁ ଅଧିକ ଅର୍ଥ ଋଣ କରିବାକୁ ପଡୁ ନ ଥିଲା। ବର୍ତ୍ତମାନ ପରିସ୍ଥିତିକୁ ଦେଖି କେନ୍ଦ୍ର ସରକାର .୫ ପ୍ରତିଶତ ଅଧିକ ଋଣ କରିବାକୁ ଅନୁମତି ଦେଇଛନ୍ତି। ରାଜ୍ୟ ସରକାର ୩.୫ ପ୍ରତିଶତ ପର୍ଯ୍ୟନ୍ତ ଋଣ କରିପାରିବେ। ବର୍ତ୍ତମାନ ପରିସ୍ଥିତିରେ ଲୋକମାନଙ୍କ ଜୀବନ ବଞ୍ଚାଇବା ସବୁଠାରୁ ଗୁରୁତ୍ୱପୂର୍ଣ୍ଣ। ସେଥିପାଇଁ ମେଡିକାଲ ଉପକରଣ ଏବଂ ଆବଶ୍ୟକତା ପାଇଁ ଅର୍ଥ ବ୍ୟୟ କରାଯିବ। ରାଜ୍ୟର ବିଭିନ୍ନ ଜିଲାରେ ପ୍ରବାସୀ ଶ୍ରମିକମାନେ ଅଛନ୍ତି । ସେମାନଙ୍କୁ କାମଧନ୍ଦା ଯୋଗାଇ ଦେବା ପାଇଁ ଆବଶ୍ୟକ ଅର୍ଥ ବ୍ୟୟ କରାଯିବ। କୃଷି, ଉଦ୍ୟାନ କୃଷି, ମତ୍ସ୍ୟଚାଷ ଆଦି କ୍ଷେତ୍ରରେ କୌଣସି ସାଲିସ କରାଯିବ ନାହିଁ। ଜରୁରୀ ନ ଥିବା ଯୋଜନାଗୁଡିକ ପାଇଁ ହୋଇଥିବା ବ୍ୟୟ ବରାଦ ଉପରେ ଅଙ୍କୁଶ ଲାଗିବ।
