ନୂଆଦିଲ୍ଲୀ,୧୯।୧୦: ଲାପଟପ ଏବଂ କମ୍ପ୍ୟୁଟର ପରି ଆଇଟି ହାର୍ଡୱେର୍ ଉତ୍ପାଦ ଆମଦାନୀ ପାଇଁ କେନ୍ଦ୍ର ସରକାର ପୁରୁଣା ଲାଇସେନ୍ସ ନିୟମକୁ ପରିବର୍ତ୍ତନ କରିଛନ୍ତି। ବର୍ତ୍ତମାନ ଏହିପରି ଉତ୍ପାଦ ଆମଦାନୀ ପାଇଁ ଏକ ଅନଲାଇନ ଅନୁମୋଦନ ବ୍ୟବସ୍ଥା ପ୍ରତିଷ୍ଠା କରାଯାଇଛି । ସରକାର ଅଗଷ୍ଟରେ କହିଥିଲେ ଯେ ନଭେମ୍ବର ୧ରୁ ଲାପଟପ, ଟାବଲେଟ ଏବଂ କମ୍ପ୍ୟୁଟର ଆମଦାନୀ ଲାଇସେନ୍ସ ବ୍ୟବସ୍ଥା ଅଧୀନରେ ରଖାଯିବ। ତେବେ ବାଣିଜ୍ୟ ସଚିବ ସୁନୀଲ ବର୍ଥୱାଲ ଗତ ସପ୍ତାହରେ ଏକ ଖବରଦାତା ସମ୍ମିଳନୀରେ କହିଥିଲେ ଯେ ଭାରତରେ ଲାପଟପ ଏବଂ କମ୍ପ୍ୟୁଟର ଆମଦାନୀ ଉପରେ କୌଣସି ପ୍ରତିବନ୍ଧକ ରହିବ ନାହିଁ। ସେ ଆହୁରି ମଧ୍ୟ କହିଛନ୍ତି , ଆମଦାନୀକାରୀଙ୍କ ଆମଦାନୀ ସାମଗ୍ରୀ ଉପରେ ସରକାର ନଜର ରଖିବେ।
ବୈଦେଶିକ ବ୍ୟାପାର ମହାନିର୍ଦ୍ଦେଶକ(ଡିଜିଏଫଟି) ସନ୍ତୋଷ କୁମାର ସାରଙ୍ଗୀ କହିଛନ୍ତି, ନୂତନ ଲାଇସେନ୍ସ କିମ୍ବା ଅନୁମୋଦନ ବ୍ୟବସ୍ଥାର ଉଦ୍ଦେଶ୍ୟ ହେଉଛି ଏହି ଉତ୍ପାଦଗୁଡିକର ଆମଦାନୀ ଉପରେ ନଜର ରଖିବା ଯାହା ନିର୍ଭରଯୋଗ୍ୟ ଉତ୍ସରୁ ଆସୁଛି। ଏହି ବ୍ୟବସ୍ଥା ତୁରନ୍ତ କାର୍ଯ୍ୟକାରୀ ହେବ।
