ଭୁବନେଶ୍ୱର,୨୩ା୮: ତରୁଣ ଲେଖକ ଭୌମିକ ମହାନ୍ତିଙ୍କ ଦ୍ବିତୀୟ ଇଂରାଜୀ ଉପନ୍ୟାସ ‘ଦ ଗର୍ଲ ଓ୍ବିଥ୍ ଦ ବ୍ରାଉନ ଆଇଜ୍’ ଭୁବନେଶ୍ବରର ସିଆରପି ଛକସ୍ଥିତ ବିଇବି ଇଣ୍ଟେଲେକ୍ଟ ସେଣ୍ଟରରେ ଉନ୍ମୋଚିତ ହୋଇଯାଇଛି।
ବ୍ଲାକ ଇଗଲ ବୁକ୍ସ ଦ୍ୱାରା ପ୍ରକାଶିତ ଏହି ପୁସ୍ତକକୁ ମୁଖ୍ୟ ଅତିଥି ତଥା ବିଶିଷ୍ଟ ସାହିତି୍ୟକ ଭାସ୍କର ପରିଚ୍ଛା ଉନ୍ମୋଚନ କରି ଏତେ କମ୍ ବୟସରେ ଇଂରାଜୀ ଭାଷାରେ ଦୁଇ ଦୁଇଟି ଉପନ୍ୟାସ ରଚନା କରିଥିବାରୁ ଶ୍ରୀ ମହାନ୍ତିଙ୍କୁ ଅଭିନନ୍ଦନ ଜଣାଇଥିଲେ। ବିଶିଷ୍ଟ ଲେଖିକା ଚିରଶ୍ରୀ ଇନ୍ଦ୍ରସିଂ ମୁଖ୍ୟବକ୍ତା ଭାବେ ଯୋଗଦେଇ ଭୌମିକଙ୍କୁ ଆଶୀର୍ବାଦ କରିବା ସହିତ ନୂତନ ପିଢ଼ି ସାହିତ୍ୟ ସାଧନା ପ୍ରତି ଆକର୍ଷିତ ହେବା ଶୁଭ ଲକ୍ଷଣ ବୋଲି ମତ ଦେଇଥିଲେ। ଦିଲ୍ଲୀ ବିଶ୍ୱବିଦ୍ୟାଳୟର ସ୍ନାତକ ଛାତ୍ରୀ ତନିଶା ପରିଡ଼ା ପୁସ୍ତକର ସମୀକ୍ଷା କରି ଏହାର ବିଷୟବସ୍ତୁ ତାଙ୍କ ପିଢ଼ିର ଅଭିବ୍ୟକ୍ତି ବୋଲି ଦର୍ଶାଇଥିଲେ।
ତପସ୍ୟା ଫାଉଣ୍ଡେଶନ ଦ୍ବାରା ଆୟୋଜିତ ଏହି କାର୍ଯ୍ୟକ୍ରମରେ ଫାଉଣ୍ଡେଶନର ଅଧ୍ୟକ୍ଷ ଡକ୍ଟର ତପନ ପଣ୍ଡା ସଭାପତିତ୍ୱ କରିଥିଲା ବେଳେ ଶତ୍ରୁଜିତ୍ ଧନ୍ୟବାଦ ଅର୍ପଣ କରିଥିଲେ। ବ୍ଲାକ ଇଗଲ ବୁକ୍ସର ଭାରତ ମୁଖ୍ୟ ଅଶୋକ ପରିଡ଼ା କାର୍ଯ୍ୟକ୍ରମ ପରିଚାଳନା କରିଥିଲେ। ତପସ୍ୟା ଫାଉଣ୍ଡେଶନର ଟ୍ରଷ୍ଟି ଡକ୍ଟର ଜୁଲି ମିଶ୍ରଙ୍କ ସମେତ ବହୁ ଲେଖକ ଓ ଶୁଭେଚ୍ଛୁ ସମାରୋହରେ ଯୋଗ ଦେଇଥିଲେ।
