ଭଞ୍ଜନଗର,୧ା୪(ବାବୁଲା ପ୍ରଧାନ): ସ୍ବତନ୍ତ୍ର ଉତ୍କଳ ପ୍ରଦେଶ ଗଠନ ଉପରେ ବୁଧବାର ଭଞ୍ଜନଗର ଉପଖଣ୍ଡ ପ୍ରଶାସନ ପକ୍ଷରୁ ସହରରେ ଅନେକ କାର୍ଯ୍ୟକ୍ରମ ହୋଇଥିଲା। ସକାଳେ ଉପଜିଲାପାଳ ଉମାଶଙ୍କର ବେହେରା, ମ୍ୟୁନିସିପାଲିଟି ଅଧ୍ୟକ୍ଷ ଗୋପବନ୍ଧୁ ମହାପାତ୍ର, ବିଡିଓ ଭାରତୀ ଦେବୀ, ତହସିଲଦାର ଅଭୀପ୍ସା ପଟ୍ଟନାୟକ ପ୍ରମୁଖ ସହରର ବିଭିନ୍ନ ସ୍ଥାନରେ ଥିବା ବରପୁତ୍ରଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ। ଏହାପରେ ଭଞ୍ଜନଗର ନିୟନ୍ତ୍ରିତ ବଜାର କମିଟି ସଭା ଗୃହରେ ଉତ୍କଳ ଦିବସ ପାଳନ ଅବସରରେ ଏକ ସଭା ହୋଇଥିଲା। ଏଥିରେ ଉପଜିଲାପାଳ ଉମାଶଙ୍କର ବେହେରା ଅଧ୍ୟକ୍ଷତା କରି ସତନ୍ତ୍ର ଉତ୍କଳ ପ୍ରଦେଶ ଗଠନରେ ଗଞ୍ଜାମର ଅବଦାନ ଅତୁଳନୀୟ ବୋଲି କହିଥିଲେ। ବକ୍ତା ଭାବେ ଅବସରପ୍ରାପ୍ତ କଲେଜ ଅଧ୍ୟକ୍ଷ ଡ. ସନ୍ତୋଷ କୁମାର ଆପଟ ଯୋଗଦେଇ ଓଡ଼ିଆ ଭାଷାର ସୁରକ୍ଷା ପାଇଁ ୧୮୭୦ରେ ପ୍ରଥମେ ତତ୍କାଳୀନ ରସଲକୋଣ୍ଡା ବର୍ତ୍ତମାନର ଭଞ୍ଜନଗର ସହରରୁ ଆନ୍ଦୋଳନ ହୋଇଥିଲା ବୋଲି କହିଥିଲେ। ତତ୍କାଳୀନ କଟିଙ୍ଗିଆ ରାଜା ଭେଙ୍କଟେଶ୍ବର ଦେଓଙ୍କ ସଭାପତିତ୍ୱରେ ହିଁ ପ୍ରଥମ ବୈଠକ ଭଞ୍ଜନଗରରେ ହୋଇଥିଲା। ଏହାପରେ ତତ୍କାଳୀନ ବ୍ରିଟିଶ ସରକାର ଓଡ଼ିଆ ଭାଷାର ସୁରକ୍ଷା ପାଇଁ ସରକାରୀ କାର୍ଯ୍ୟାଳୟରେ ଓଡ଼ିଆ ଭାଷା ପ୍ରଚଳନ କରିଥିଲେ। ଏଥିସହ ସେ କହିଥିଲେ ଯେ ଭାଷା ଭିତ୍ତିକ ଆନ୍ଦୋଳନ ପରେ ୧୯୦୨ ମସିହାରେ ରମ୍ଭା ପ୍ୟାଲେସରେ ଖଲ୍ଲିକୋଟ ରାଜା ହରିହର ମର୍ଦ୍ଦରାଜ ଏକ ଭୋଜିର ଆୟୋଜନ କରି ବିଭିନ୍ନ ନେତୃବର୍ଗଙ୍କୁ ନିମନ୍ତ୍ରଣ କରି ଗଞ୍ଜାମ ଜାତୀୟ ସମିତି ନାମକ ଏକ ଅନୁଷ୍ଠାନ ଗଠନ କରିଥିଲେ। ୧୯୦୩ ଏପ୍ରିଲ ମାସରେ ବରହମପୁର ଠାରେ ତାହାର ପ୍ରଥମ ବୈଠକ ହେଲା । ଉକ୍ତ ବୈଠକରେ ମଧୁସୂଦନ ଦାସ ପ୍ରସ୍ତାବ ଦେଇଥିଲେ ଯେ ଗଞ୍ଜାମ ଜାତୀୟ ସମିତିର ନାମ ଏଣିକି ଉତ୍କଳ ସମ୍ମିଳନୀ ନାମ କରାଯାଉ। ଏହାପରେ ୧୯୦୩ ଡିସେମ୍ବର ମାସରେ ଉତ୍କଳ ସମ୍ମିଳନୀ ବୈଠକ ବସିଥିଲା। ଦୀର୍ଘ ବର୍ଷର ଆନ୍ଦୋଳନ ପରେ ୧୯୩୫ରେ ବ୍ରିଟିଶ ସରକାର ଭାରତ ଶାସନ ଆଇନ ପ୍ରଣୟନ କରିଥିଲେ। ଉକ୍ତ ଆଇନ ବଳରେ ଓଡ଼ିଶା ଓ ସିଦ୍ଧୁ ଦୁଇଟି ନୂତନ ପ୍ରଦେଶକୁ ସ୍ବୀକୃତି ମିଳିଲା। ଏହାପରେ ୧୯୩୬ ମସିହା ଆଜିର ଦିନରେ ଉତ୍କଳ ପ୍ରଦେଶ ଗଠନ ହୋଇଥିଲା । ସ୍ବତନ୍ତ୍ର ଉତ୍କଳ ପ୍ରଦେଶ ଗଠନରେ ଗଞ୍ଜାମର ଅବଦାନ ପ୍ରମୁଖ ଥିଲା ବୋଲି ଆପଟ କହିଥିଲେ।
ସଭାରେ ଅନ୍ୟମାନଙ୍କ ମଧ୍ୟରେ ଏମ୍ପି ପ୍ରତିନିଧି ସନ୍ତୋଷ କୁମାର ତିଆଡ଼ି, କାର୍ଯ୍ୟନିର୍ବାହୀ ଅଧିକାରୀ ମୁରଲୀକୃଷ୍ଣ ପଣ୍ଡା, ଅବସରପ୍ରାପ୍ତ କଲେଜ ଅଧ୍ୟକ୍ଷ ଡ଼. ବିଚିତ୍ରା ନନ୍ଦ ଦାସ ଯୋଗଦେଇ ନିଜର ବକ୍ତବ୍ୟ ରଖିଥିଲେ। ଉପଖଣ୍ଡ ସୂଚନା ଓ ଲୋକସମ୍ପର୍କ ଅଧିକାରୀ ସନ୍ତୋଷ କୁମାର ନାୟକ ସଭାକୁ ପରିଚାଳନା କରିଥିଲେ। ଶେଷରେ ବିଭିନ୍ନ ପ୍ରତିଯୋଗିତାରେ କୃତିତ୍ୱ ଅର୍ଜନ କରିଥିବା କୃତୀ ଛାତ୍ରୀଛାତ୍ରଙ୍କୁ ପୁରସ୍କୃତ କରାଯାଇଥିଲା। ଏଥିସହ ସହରର ବିଭିନ୍ନ ସ୍ଥାନରେ ଅନୁଷ୍ଟିତ କାର୍ଯ୍ୟକ୍ରମରେ ଏସ୍ଡିପିମ୍ଓ ଡ. ଦୀପକ କୁମାର ମିଶ୍ର, ଏବିଇଓ ଚରଣ ସେଠୀ, କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ଅଧ୍ୟକ୍ଷ ବିଭାସ କୁମାର ଦାସ, କବି ପ୍ରଶାନ୍ତ ମହାନ୍ତି, ଅରକ୍ଷିତ ପରିଚ୍ଛା ସମେତ ମ୍ୟୁନିସିପାଲିଟିର ଅଧିକାଂଶ କାଉନସିଲର ଯୋଗ ଦେଇଥିଲେ।