ବେଙ୍ଗାଲୁରୁ,୧୭।୧:ଆଗକୁ କର୍ନାଟକ ବିଧାନସଭା ନିର୍ବାଚନ ଥିବାବେଳେ କଂଗ୍ରେସ କ୍ଷମତାକୁ ଆସିଲେ ପ୍ରତି ପରିବାରର ମହିଳା ମୁଖ୍ୟଙ୍କୁ ମାସିକ ୨ ହଜାର ଟଙ୍କା ଲେଖାଏ ସହାୟତା ଯୋଗାଇଦେବ ବୋଲି ସୋମବାର ପ୍ରତିଶ୍ରୁତି ଦେଇଛି। ଦଳର ଏକ ସମ୍ମିଳନୀରେ କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ଏହା ଘୋଷଣା କରିଛନ୍ତି। ଏକ ନିଃସର୍ତ୍ତ ସାର୍ବଜନୀନ ମୂଳ ଆୟ ଭାବେ ଗୃହଲକ୍ଷ୍ମୀ ଯୋଜନାରେ ଘରର ମହିଳା ମୁଖ୍ୟଙ୍କ ବ୍ୟାଙ୍କ ଖାତାକୁ ବର୍ଷକୁ ୨୪ ହଜାର ଟଙ୍କା ପଠାଯିବ ବୋଲି ସେ କହିଛନ୍ତି। କର୍ନାଟକରେ ଆସନ୍ତା ମେ’ ମାସରେ ବିଧାନସଭା ନିର୍ବାଚନ ହୋଇପାରେ। ରାଜ୍ୟର ପ୍ରତି ପରିବାରକୁ ୨୦୦ ୟୁନିଟ ବିଜୁଳି ମାଗଣାରେ ଯୋଗାଇ ଦିଆଯିବା ବୋଲି କଂଗ୍ରେସ ପୂର୍ବରୁ ଘୋଷଣା କରିଥିଲା। ମହଙ୍ଗା ଏଲ୍ପିଜି ସାଙ୍ଗକୁ ଦୈନନ୍ଦିନ ଖର୍ଚ୍ଚ ବଢ଼ୁଥିବାରୁ ଗୃହିଣୀଙ୍କ ବୋଝ ଲାଘବ କରିବା ଗୃହଲକ୍ଷ୍ମୀ ଯୋଜନାର ଉଦ୍ଦେଶ୍ୟ ବୋଲି କଂଗ୍ରେସ କହିଛି। ରାଜ୍ୟର ସମସ୍ତ ମହିଳା ସଶକ୍ତ ହୁଅନ୍ତୁ ଓ ନିଜ ଗୋଡ଼ରେ ଛିଡ଼ା ହେବାକୁ ସମର୍ଥ ହୁଅନ୍ତୁ। ସେମାନେ ନିଜ ପିଲାଙ୍କ ଯତ୍ନ ନିଅନ୍ତୁ। ଏଥିପାଇଁ କର୍ନାଟକର ପ୍ରତ୍ୟେକ ମହିଳାଙ୍କୁ ଆର୍ଥତ୍କ ସ୍ବାବଲମ୍ବୀ କରିବାକୁ କଂଗ୍ରେସ ଚାହେଁ ବୋଲି କହିଛି। ଏହି ଯୋଜନା କାର୍ଯ୍ୟକାରୀ ହେଲେ ରାଜ୍ୟର ୧.୫ କୋଟିରୁ ଊର୍ଦ୍ଧ୍ୱ ମହିଳା ଉପକୃତ ହେବେ। କର୍ନାଟକରେ ଭାଜପା ସରକାର ଦୁର୍ନୀତିରେ ଲିପ୍ତ ରହିଛନ୍ତି। ନିଯୁକ୍ତିରେ ମନ୍ତ୍ରୀମାନେ ୪୦ ପ୍ରତିଶତ କମିଶନି ନେଉଛନ୍ତି। ଦରଦାମ୍ ବୃଦ୍ଧିକୁ ନେଇ ମହିଳାମାନେ ଅତିଷ୍ଠ ହୋଇପଡ଼ିଲେଣି। ରାଜ୍ୟର ମହିଳାମାନଙ୍କ ଲାଗି କଂଗ୍ରେସ ସ୍ବତନ୍ତ୍ର ଇସ୍ତାହାର ଆଣିବ ବୋଲି ପ୍ରିୟଙ୍କା କହିଛନ୍ତି।
