ରାଜକନିକା,୧।୬(ଡି.ଏନ.ଏ.): ସବୁ ଛାତ୍ରୀଛାତ୍ର ନିଜ ଲକ୍ଷ୍ୟ ପୂରଣ କରିବା ପାଇଁ ଦିନରାତି ଏକାଠି କରି ଦିଅନ୍ତି। ସେମାନେ କଠିନ ପରିଶ୍ରମ କରି ଭବିଷ୍ୟତ ପାଇଁ ବହୁ ସ୍ବପ୍ନ ଦେଖନ୍ତି। ହେଲେ ଅଧିକାଂଶ ସମୟରେ ସେମାନଙ୍କ ଚଲାପଥରେ ବାଧକ ସାଜେ ଦାରିଦ୍ର୍ୟତା। ଫଳରେ ଉଜୁଡି ଯାଏ ସ୍ବପ୍ନର ଫସଲ, ଭାଙ୍ଗିଯାଏ ଅସୁମାରୀ ସ୍ବପ୍ନ ଓ ଅଭିଳାଷ। ହେଲେ ଦାରିଦ୍ର୍ୟତା ଭିତରେ ଡାକ୍ତର ହେବାର ଇଚ୍ଛାକୁ ଜାହିର କରି ଆସିଛନ୍ତି କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ ପାରିନୂଆପଡା ପଞ୍ଚାୟତ ଉଜାଙ୍ଗ ଗାଁର ଜାନୁ ଜେନାଙ୍କ ପୁଅ ପ୍ରଭାତ। ତାଙ୍କର ନିଆର ପ୍ରସାୟ ଅନ୍ୟମାନଙ୍କ ପାଇଁ ଉଦାହରଣ ସାଜିଛି।
୨୦୧୯ରେ ପ୍ରଭାତ ମାଟ୍ରିକ ପରୀକ୍ଷାରେ ୮୬% ନମ୍ବର ରଖି ପାସ୍ କରିଥିଲେ। ଏହାପରେ କଟକ ରେଭେନ୍ସା ବିଶ୍ୱବିଦ୍ୟାଳୟରୁ ଯୁକ୍ତ ୨ ବିଜ୍ଞାନରେ ୮୬% ରଖି ପାସ୍ କରିବା ପରେ ଡାକ୍ତରୀ ପଢ଼ିବା ନିମନ୍ତେ ମନ ବଳାଇଥିଲେ। ୨୦୨୨ରେ ମେଡିକାଲ ପ୍ରବେଶିକା ପରୀକ୍ଷା ଦେଇଥିଲେ। ହେଲେ ଖୁବ୍ କମ୍ ନମ୍ବର ବ୍ୟବଧାନରେ ଅକୃତ୍ୟକାର୍ଯ୍ୟ ହୋଇଥିଲେ ବି ସେ ଭାଙ୍ଗି ପଡି ନାହାନ୍ତି। ଆସନ୍ତା ପ୍ରବେଶିକା ପରୀକ୍ଷାରେ ସଫଳ ହେବେ ବୋଲି ଆଶା ରଖିଛନ୍ତି ପ୍ରଭାତ। ତାଙ୍କ ବାପା ଜାନୁ ଜଣେ ଦିନ ମଜୁରିଆ। ପର ଘରେ ମୂଲ ମଜୁରୀ ଲାଗି ସେ ପରିବାର ପ୍ରତିପୋଷଣ କରିନ୍ତି। ଏମିତି କି ନିଜର ଜମିବାଡ଼ି ନ ଥାଇ ଅନ୍ୟ ଜମିରେ ଭାଗଚାଷ କରି ଘରର ସମ୍ପୂର୍ଣ୍ଣ ଖର୍ଚ୍ଚ ଉଠାଇଥାନ୍ତି ସେ। ତେଲଲୁଣର ସଂସାର ଚଳାଇବା ଯାହାପାଇଁ କଷ୍ଟକର ବ୍ୟାପର ସେ ପୁଅକୁ କିପରି ଡାକ୍ତରୀ ପାଠ ପଢ଼ାଇବେ ତାହା ଜାଣିପାରୁନାହାନ୍ତି। ପୁଅର ଡାକ୍ତରୀ ପଢ଼ିବା ନିଶା ତାଙ୍କ ଚିନ୍ତା ବଢାଇ ଦେଇଛି। ବାମନ ହୋଇ ଚନ୍ଦ୍ରକୁ ହାତ ବଢେଇବା ପୁଅର ପ୍ରୟାସ ତାଙ୍କ ଗରିବୀ ପଣକୁ ଅଟ୍ଟହାସ୍ୟ କରୁଛି ବୋଲି ସେ ଅଭିମାନ ଛଳରେ କହିଛନ୍ତି। ହେଲେ ପୁଅର ଏକା ଜିଦ୍ ସେ ଡାକ୍ତରୀ ପାଠ ପଢ଼ିବ । ଏଥିପାଇଁ ପ୍ରଭାପ ବାପାଙ୍କ ଅସହାୟତାକୁ ଦେଖି ଭଲ କୋଚିଂ ସେଣ୍ଟରରେ ପାଠ ପଢ଼ିବାକୁ ଇଚ୍ଛା ପ୍ରକାଶ କରି ନାହାନ୍ତି ା ବରଂ ୟୁଟ୍ୟୁବ୍ରେ ବିଭିନ୍ନ ସାଇଟ୍ ଖୋଲି ସେ ପାଠ ପଢ଼ୁଛନ୍ତି। ଏଥିପାଇଁ ତାଙ୍କୁ ଏକ ପୁରୁଣା ମୋବାଇଲ ବି ଯୋଗାଡ଼ କରିବାକୁ ପଡିଛି। ହେଲେ ପ୍ରତିମାସର ନେଟ୍ ପ୍ୟାକ୍ ପକେଇବାକୁ ସେ ଅସମର୍ଥ। ଏହା ସହିତ ଏନ୍ସିଇଆରଟି ନିଟ୍ ପାଠପଢା ନିମନ୍ତେ ଆବଶ୍ୟକ ବହି ନ ଥିବାରୁ ସେ କେବଳ ୟୁଟ୍ୟୁବ୍ ଉପରେ ଭରସା ରଖି ପାଠ ପଢୁଥିବା ପ୍ରଭାତ କହିଛନ୍ତି। କଟକ, ଭୁବନେଶ୍ୱର ଭଳି ସହରରେ ପାଠପଢାର ଆବଶ୍ୟକ ବହି ଲାଇବ୍ରେରୀରୁ ମିଳୁଥିବା ବେଳେ, ଗ୍ରାମାଞ୍ଚଳରେ ଏସବୁ ସୁବିଧା ନ ଥିବାରୁ ସେ ଏବେ ଫ୍ଲିପ୍ କାର୍ଡ ଯୋଗେ କିଛି ବହି ୬୦୦ ଟଙ୍କାର ମଗେଇଥିବା କହିଛନ୍ତି। ତାଙ୍କର ପାଠପଢା ପାଇଁ ବହୁତ ବହିର ଆବଶ୍ୟକତା ରହିଛି। ସୁତରାଂ ଏଭଳି ଜଣେ ମେଧାବୀ ଛାତ୍ରଙ୍କ ଡାକ୍ତରୀ ପାଠପଢ଼ା ପାଇଁ ରହିଥିବା ସ୍ବପ୍ନ ପୂରଣ ନିମନ୍ତେ କୌଣସି ସହୃଦୟ ବ୍ୟକ୍ତିଙ୍କ ସହଯୋଗର ଆବଶ୍ୟକତା ରହିଛି। ସରକାରୀ ଓ ବେସରକାରୀ ସହାୟତା ମିଳିଳେ ପ୍ରଭାତଙ୍କ ପାଠପଢା ସହଜ ଆଉ ସୁଗମ ହୋଇପାରନ୍ତା ବୋଲି ଜାନୁ କହିଛନ୍ତି ା
