ବଲାଙ୍ଗୀର, ୯।୧(ସୁନିଲ କୁମାର ମହାନ୍ତି) : ବଲାଙ୍ଗୀର ଜିଲାରେ ଧାନକିଣାରେ ଅଚଳାବସ୍ଥା ଜାରି ରହିଛି। ଚାଷୀମାନେ ଧାନବିକ୍ରି କରି ନ ପାରି ଅଡୁଆ ସ୍ଥିତିରେ ରହିଛନ୍ତି। ମିଲରମାନଙ୍କ ଧର୍ମଘଟ ଯୋଗୁ ଚାଷୀଙ୍କ ଅଡୁଆ ଆହୁରି ବଢ଼ିଯାଇଛି। ଗତ ୪/୫ ଦିନ ହେଲା ଚାଷୀମାନେ ମଣ୍ଡିକୁ ଧାନ ଆଣି ରଖୁଥିଲେ। ହେଲେ ସେମାନଙ୍କ ଧାନ କିଣା ନ ଯିବାରୁ ଅନେକ ଚାଷୀ ମଣ୍ଡିରେ ଧାନ ଜଗି କଷ୍ଟ ପାଇଛନ୍ତି I ପ୍ରବଳ ଥଣ୍ଡାରେ ଧାନ ଜଗିବାକୁ ମଣ୍ଡିରେ ରହିଥିବା ଚାଷୀମାନେ ଚଳିତ ବର୍ଷର ଧାନକିଣା ଅବ୍ୟବସ୍ଥା ସବୁ ବର୍ଷରୁ ବଳିଯାଇଛି ବୋଲି କହିଛନ୍ତି । ବୁଧବାର ମିଲରମାନଙ୍କ ଧର୍ମଘଟ ପ୍ରତ୍ୟାହାର ହେଲା ବୋଲି କୁହାଯାଇଥିଲା। ବୁଧବାର ସନ୍ଧ୍ୟାରୁ ମଣ୍ଡିରେ ଅଟକି ରହିଥିବା ଟ୍ରକଗୁଡିକରେ ଧାନ ଉଠାଣ କରାଯିବ ବୋଲି ବଲାଙ୍ଗୀର ମିଲର୍ସ ସଂଘ ପକ୍ଷରୁ ସୂଚନା ଦିଆଯାଇଥିଲା। ତେବେ ଗୁରୁବାର ସନ୍ଧ୍ୟା ପର୍ଯ୍ୟନ୍ତ ଅନେକ ମଣ୍ଡିରେ ଧାନ ଉଠି ନ ଥିବା ଜଣାପଡିଛି। ଏପରି କି ଯେଉଁ କିଛି ପାକ୍ସରେ ଧାନ ଉଠିଛି ସେଠି ନାମକୁ ମାତ୍ର ଜଣେ କି ଦୁଇଜଣ ଚାଷୀଙ୍କ ଧାନ ଉଠାଣ କରାଯାଇଛି । ବଲାଙ୍ଗୀର ଜିଲା ପୁଇଁନ୍ତଳା ବ୍ଳକ ଅନ୍ତର୍ଗତ ପୁଇଁନ୍ତଳା ପାକ୍ସରେ ଗୁରୁବାର ଅପରାହ୍ନ ୪ଟାରେ ଗୋଟିଏ ଟ୍ରକ ଆସି କିଛି କୁଇଣ୍ଟାଲ ଧାନ ଉଠାଣ କରିଥିବା ଜଣାପଡିଛି।