ତାଳଚେର,୧୧।୧୦ (ମନୋଜ ନନ୍ଦ): ତାଳଚେରରେ କୋଇଲା ପରିବହନ ଓ ଟ୍ରକ୍ର ଉଚିତ ଭଡ଼ାକୁ ନେଇ ସ୍ଥାନୀୟ ଉପଜିଲାପାଳ ମନୋଜ କୁମାର ତ୍ରିପାଠୀଙ୍କ ଅଧ୍ୟକ୍ଷତାରେ ଉପଜିଲାପାଳଙ୍କ କାର୍ଯ୍ୟାଳୟରେ ମଙ୍ଗଳବାର ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ତାଳଚେର ବିଧାୟକ ବ୍ରଜକିଶୋର ପ୍ରଧାନ, ଏସ୍ଡିପିଓ ମାନସ ରଞ୍ଜନ ବାରିକ, ଟ୍ରକ ମାଲିକ ସଂଘ ସଭାପତି ଅରବିନ୍ଦ ଭୂତିଆ, ପରିବହନ ସଂଘ ସଭାପତି ନୟନ ରଞ୍ଜନ ସାହୁ ଓ ସମସ୍ତ ପ୍ଲାଣ୍ଟର ଅଧିକାରୀ ଯୋଗଦେଇ ଉପୁଜିଥିବା ସମସ୍ୟା ସମ୍ପର୍କରେ ଆଲୋଚନା କରିଥିଲେ।
ପ୍ରକାଶ ଯେ, କୋଇଲା ପରିବହନ କରି ଏଠିକାର ଟ୍ରକ୍ ମାଲିକମାନେ ଗୁଜରାଣ ମେଣ୍ଟାଉ ଥିବାବେଳେ ପ୍ରର୍ଯ୍ୟାପ୍ତ ଲୋଡିଂ ମିଳୁ ନ ଥିବା ଓ ଧାର୍ଯ୍ୟ ଭଡା ପାଉ ନ ଥିବା ଟ୍ରକ୍ ମାଲିକ ସଂଘ ପକ୍ଷରୁ ଅଭିଯୋଗ କରାଯାଇଥିଲା। ୨୦୧୮ ମସିହାରେ ଲାଗୁ ହୋଇଥିବା ଭଡା ଆଜି ପର୍ଯ୍ୟନ୍ତ ଚାଲି ଆସୁଛି। ଏହା ଗାଡିମାଲିକଙ୍କ ପାଇଁ ଅସହ୍ୟ ହୋଇପଡ଼ିଲାଣି। ଏହାକୁ ବିରୋଧ କରି ଟ୍ରକ୍ ମାଲିକମାନେ ୯ ତାରିଖ ମଧ୍ୟରାତ୍ରିରୁ ଆନ୍ଦୋଳନ ଡାକରା ଦେଇଥିଲେ। ତେବେ ଜିଲା ପ୍ରଶାସନ ପକ୍ଷରୁ ଆନ୍ଦୋଳନ ନ କରିବା ପାଇଁ ଅନୁରୋଧ କରାଯିବା ସହ ଏ ନେଇ ବୈଠକ ଡକାଯାଇଥିଲା। ବୈଠକରେ ନିଷ୍ପତ୍ତି ଅନୁଯାୟୀ, ତାଳଚେର ଆଞ୍ଚଳିକ ପରିବହନ ଅଧିକାରୀଙ୍କ ଅଧ୍ୟକ୍ଷତାରେ ଟ୍ରକ୍ ମାଲିକ ସଂଘର ସଭାପତି ଓ ଅନ୍ୟ ୪ଜଣ, ପରିବହନ ସଂଘର ୨ଜଣ, ବିଭିନ୍ନ ପ୍ଲାଣ୍ଟ ପକ୍ଷରୁ ୩ଜଣ ଅଧିକାରୀଙ୍କୁ ନେଇ ୧୧ଜଣିଆ କମିଟି ଗଠନ କରାଯାଇଥିଲା। ଏହି କମିଟି ଆସନ୍ତା ୧୭/୧୮ତରିଖ ମଧ୍ୟରେ ଆଲୋଚନା କରି ଆଗାମୀ ୨୦ ତାରିଖରେ ଟ୍ରକ୍ର ନୂତନ ଭଡ଼ା ଓ ଲୋଡିଂ କ୍ଷେତ୍ରରେ ଥିବା ସମସ୍ୟା ସମ୍ପର୍କରେ ଚୂଡାନ୍ତ ନିଷ୍ପତ୍ତି ପ୍ରଶାସନକୁ ଜଣାଇବେ। ବୈଠକରେ ଏହି ନିଷ୍ପତ୍ତି ପରେ ଟ୍ରକ୍ ମାଲିକ ସଂଘ ଆନ୍ଦୋଳନକୁ ସାମୟିକ ଭାବେ ସ୍ଥଗିତ ରଖାଯାଇଛି ବୋଲି ସଭାପତି ଅରବିନ୍ଦ ଭୂତିଆ ପ୍ରକାଶ କରିଛନ୍ତି। ବୈଠକରେ ଅନ୍ୟମାନଙ୍କ ମଧ୍ୟରେ କାର୍ଯ୍ୟକାରୀ ସଭାପତି ଟୁକୁନା ସ୍ବାଇଁ, ସାଧାରଣ ସମ୍ପାଦକ ରତନ ଶତପଥୀ, ପରିବହନକାରୀ ସଂଘ ସାଧାରଣ ସମ୍ପାଦକ ସୁଧୀର ନାଥ, ମହେଶ ଅଗ୍ରୱାଲ, ସଞ୍ଜୟ ଭଞ୍ଜ, ରାଜେଶ ଘୋଷ, ପ୍ରଭାକର ସାହୁ, ବିଜୟ କୁମାର ସାହୁ ପ୍ରମୁଖ ଉପସ୍ଥିତ ଥିଲେ।
