ବାଙ୍ଗାଲୋର,୨୫।୭: ଇନ୍ଫୋସିସ ସହ ପ୍ରତିଷ୍ଠାତା ଏସ୍.ଡି ଶିବୁଲାଲଙ୍କ ପରିବାର ସଦସ୍ୟ କମ୍ପାନୀରେ ଥିବା ସେମାନଙ୍କ ମୋଟ ଶେୟାର ମଧ୍ୟରୁ ୮୫ ଲକ୍ଷ ଶେୟାର ବିକ୍ରି କରିଦେଇଛନ୍ତି। ଚଳିତ ମାସ ୨୨ରୁ ୨୪ ତାରିଖ ମଧ୍ୟରେ ଏହି ପ୍ରକ୍ରିୟା ଶେଷ ହୋଇଥିବା ରେଗୋଲେଟୋରୀ ଫାଇଲିଂରୁ ସାମ୍ନାକୁ ଆସିଛି। ଶିବୁ ଲାଲଙ୍କର ପୁଅ ଶ୍ରେୟସ ୪୦ ଲକ୍ଷ ଶେୟାର ବିକ୍ରି କରିଥିବା ବେଳେ ଜ୍ୱାଇଁ ଗୌରବ ମନଚନ୍ଦା ୧୮ ଲକ୍ଷ ଶେୟାର, ନାତି ମିଲନ ୧୫ ଲକ୍ଷ ଶେୟାର ଖସାଇ ଦେଇଥିବା ଜଣାପଡିଛି। ଶିବୁଲାଲଙ୍କ ପୁଅ ଶ୍ରେୟସ ପୂର୍ବରୁ ଇନ୍ଫୋସିସରେ ୦.୬୬% ଶେୟାର ହାସଲ କରିଥିବା ବେଳେ ଏହା ବର୍ତ୍ତମାନ ୦.୫୬%କୁ ହ୍ରାସ ଘଟିଛି। ଏହାବାଦ ଗୌରବଙ୍କ ନିକଟରେ ୦.୩୨% ଏବଂ ମିଲନଙ୍କ ନିକଟରେ ୦.୩୩% ଶେୟାର ରହିଛି। ଶିବୁଲାଲଙ୍କ ସ୍ତ୍ରୀ କୁମାରୀ ୧୨ ଲକ୍ଷ ଶେୟାର ବିକ୍ରି କରିବା ଫଳରେ କମ୍ପାନୀରେ ତାଙ୍କର ଶେୟାର ୦.୨୨%କୁ ଖସିଆସିଛି। ୧୯୮୧ରେ ଏସ୍.ଡି. ଶିବୁଲାଲ, ଏନ୍.ଆର୍. ନାରାୟଣ ମୂର୍ତ୍ତୀ ଏବଂ ଅନ୍ୟ ୫ ଜଣ ମିଶି ଇନ୍ଫୋସିସ ସ୍ଥାପନା କରିଥିଲେ। ୨୦୧୧-୧୪ ଯାଏ ଶିବୁଲାଲ ଇନ୍ଫୋସିସର ଏମ୍ଡି ତଥା ସିଇଓ ଭାବେ କାର୍ଯ୍ୟଭାର ସମ୍ଭାଳିଥିଲେ। ଏହା ପୂର୍ବରୁ ସେ ୨୦୦୭-୧୧ ଯାଏ କମ୍ପାନୀର ଚିଫ୍ ଅପରେଟିଂ ଅଫିସର ଭାବେ କାର୍ଯ୍ୟ କରିଥିଲେ। ନିକଟରେ ସେ ଟେକ୍ନୋଲୋଜି ଷ୍ଟାର୍ଟଅପ୍ ଏକ୍ସିଲର ଭେଞ୍ଚର୍ସରେ ନିବେଶ କରିଛନ୍ତି।
