ଚଣ୍ଡିଖୋଲ/ ଛତିଆ,୧୫।୫ (ଡି.ଏନ.ଏ.): ଅର୍ଥ ଅଭାବରୁ ମହିଳାଙ୍କ ମୃତଦେହ ଦାହ କରିପାରିଲେନି ପରିବାର। ରାସ୍ତାକଡ଼ରେ ଛାଡ଼ି ପଳାଇଲେ। ପ୍ରାୟ ୧୨ ଘଣ୍ଟା ମୃତଦେହ ପଡ଼ି ରହିବା ପରେ ଶନିବାର ସକାଳେ ସ୍ଥାନୀୟ ସରପଞ୍ଚଙ୍କ ନେତୃତ୍ୱରେ କେତେଜେଣ ଯୁବକ ମୃତଦେହ ସତ୍କାର କରିଛନ୍ତି। ଯାଜପୁର ଜିଲା ବଡ଼ଚଣା ବ୍ଲକ ଅନ୍ତର୍ଗତ ଛତିଆଠାରେ ଏଭଳି ଘଟଣା ଦେଖିବାକୁ ମିଳିଛି। ମୃତା ମହିଳା ହେଉଛନ୍ତି ଢେଙ୍କାନାଳ ଜିଲାର ଛବି ମିଶ୍ର (୨୭)। ଢେଙ୍କାନାଳ ଜିଲାର ମାୟାଧର ମହାନ୍ତିଙ୍କ ପରିବାର ଛତିଆ ପଞ୍ଚାୟତ ଅମରାବତୀ ପାଟଣା ଗ୍ରାମରେ ଘର ଭଡ଼ା ନେଇ ରହିଆସୁଛନ୍ତି। ସେ ତାଙ୍କ ସାନଝିଅ ଛବିଙ୍କୁ ଭୁବନ ଅଞ୍ଚଳରେ ବିବାହ କରାଇଥିଲେ। ତେବେ କିଛି ମାସ ହେବ ଛବି ଆସି ବାପଙ୍କ ଭଡ଼ା ଘର ଛତିଆରେ ରହୁଥିଲେ। ସେଠାରେ ପୁତ୍ରସନ୍ତାନ ଜନ୍ମ ହୋଇଥିଲା। ତେବେ ବୃଦ୍ଧ ମା’ବାପା ନିଜେ ରୋଜଗାର କରି ଚଳିବା ଅକ୍ଷମ ହୋଇଥିବା ବେଳେ ଝିଅ ଆସି ପହଞ୍ଚିବା ପରେ ବୋଝ ଉପରେ ନଳିତା ବିଡ଼ା ସଦୃଶ ହୋଇଥିଲା। ଏହାପରେ ଛବିଙ୍କ ସ୍ବାସ୍ଥ୍ୟ ଖରାପ ହେବାକୁ ଲାଗିଥିଲା। ତେବେ ଅର୍ଥ ଅଭାବ ଯୋଗୁ ତାଙ୍କର ଉତ୍ତମ ଚିକିତ୍ସା ହୋଇ ପାରି ନ ଥିଲା। ଶୁକ୍ରବାର ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ ସ୍ବାମୀ ହେମନ୍ତ ମିଶ୍ର ପହଞ୍ଚି ତାଙ୍କୁ ବଡ଼ଚଣା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ତେବେ ସ୍ବାସ୍ଥ୍ୟ ଅବସ୍ଥାରେ ସୁଧାର ନ ଆସିବାରୁ ପରେ ତାଙ୍କୁ କଟକ ବଡ଼ ମେଡିକାଲକୁ ନେଇଥିଲେ। ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହାପରେ ଆମ୍ବୁଲାନ୍ସ ଯୋଗେ ମୃତଦେହ ଛତିଆକୁ ଆଣିଥିଲେ। ତେବେ ମୃତଦେହ ସତ୍କାର ପାଇଁ ଆବଶ୍ୟକ ଅର୍ଥ ନ ଥିବାରୁ ଛବିଙ୍କ ମା’ବାପା ଚିନ୍ତିତ ହୋଇ ପଡ଼ିଥିଲେ। ଶେଷରେ ଆମ୍ବୁଲାନ୍ସରୁ ଛବିଙ୍କ ମୃତଦେହ କାଢ଼ି ରାସ୍ତା କଡ଼ରେ ଥୋଇ ଘରକୁ ଫେରି ଆସିଥିଲେ। ଶନିବାର ସକାଳେ ଏହି ଘଟଣା ଦେଖି ଲୋକେ ଆତଙ୍କିତ ହୋଇପଡ଼ିଥିଲେ। ଘଟଣା କ’ଣ ଜାଣି ନ ପାରି ଛତିଆ ବିଟ୍ ହାଉସ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ଘଟଣାର ତଦନ୍ତ କରିଥିଲା। ଛବିଙ୍କ ପରିବାରକୁ ପଚରାଉଚରା ବେଳେ ତାଙ୍କ ବାପା ଉପରୋକ୍ତ ଘଟଣା ପୋଲିସ ଆଗରେ ପ୍ରକାଶ କରିଥିଲେ। ଏହାପରେ ପୋଲିସ ଛବିଙ୍କ ମୃତଦେହକୁ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରିଥିଲା। ପରେ ଛତିଆ ସରପଞ୍ଚ ରମେଶ ପୃଷ୍ଟି, ସ୍ଥାନୀୟ କେତେଜଣ ଯୁବକ ଓ ପୋଲିସ ସହାୟତାରେ ମୃତଦେହ ସତ୍କାର କରାଯାଇଥିଲା। ଅନ୍ୟପକ୍ଷରେ ଆମ୍ବୁଲାନ୍ସ ଚାଳକଙ୍କୁ ଅର୍ଥ ଦେଇ ନ ପାରିବାରୁ ସେ ରାସ୍ତାରେ ଛବିଙ୍କ ମୃତଦେହ ଛାଡ଼ି ଚାଲି ଯାଇଥିବା ଶୁଣିବାକୁ ମିଳିଛି।