ଭୁବନେଶ୍ୱର,୨୧।୩(ବ୍ୟୁରୋ): ନିର୍ବାଚନ ପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ପ୍ରସ୍ତୁତି ପ୍ରାୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଗୁରୁବାରଠାରୁ ଇଭିଏମ୍ରେ କମିଶନିଂ ଆରମ୍ଭ ହୋଇଥିବାବେଳେ ଶୁକ୍ରବାର ସନ୍ଧ୍ୟା ସୁଦ୍ଧା ସାରିବାକୁ ଧାର୍ଯ୍ୟ ହୋଇଥିଲା। ତେବେ ଦୁଇଦିନ ମଧ୍ୟରେ ସମସ୍ତ ଇଭିଏମ୍ରେ କମିଶନିଂ ହୋଇ ପାରି ନ ଥିଲା। ଶନିବାର ହୋଲି ଥିବାରୁ ରବିବାର ଏହି କାର୍ଯ୍ୟ ସମ୍ପୂର୍ଣ୍ଣ ହୋଇଛି। ୨୩ ତାରିଖରେ ଇଭିଏମ୍ଗୁଡିକ ମହାନଗରର ବିଭିନ୍ନ ବୁଥ୍କୁ ସ୍ଥାନାନ୍ତର କରାଯିବ ବୋଲି ବିଏମ୍ସି ପକ୍ଷରୁ ସୂଚନା ମିଳିଛି। ମେୟର ପଦବୀରେ ୧୨ଜଣ ପ୍ରତିଦ୍ୱନ୍ଦ୍ୱିତା କରୁଥିବାବେଳେ କର୍ପୋରେଟର ପାଇଁ ୨୯୦ଜଣ ପ୍ରାର୍ଥୀ ଅଛନ୍ତି। ସମୁଦାୟ ୭୦୫ଟି ବୁଥ୍ରେ ଏ ନେଇ ମତଦାନ ହେବାକୁ ଯାଉଛି। ପ୍ରତି ବୁଥ୍ରେ ଦୁଇଟି ଲେଖାଏ ଇଭିଏମ୍ ଆବଶ୍ୟକ ହେବ। ତେଣୁ ୧୪୧୦ ଇଭିଏମ୍ ଆବଶ୍ୟକ ହେବାକୁ ଥିବାବେଳେ ଅତିରିକ୍ତ ଭାବେ ୧୦ ପ୍ରତିଶତ ଅର୍ଥାତ୍ ୧୪୦ଟି ଇଭିଏମ୍ ଆସିଥିବା ଅତିରିକ୍ତ ଜିଲାପାଳ ପ୍ରଫୁଲ୍ଲ କୁମାର ସ୍ବାଇଁ ସୂଚନା ଦେଇଛନ୍ତି। ଖୋର୍ଦ୍ଧାରୁ ଇଭିଏମ୍ ଆସିବା ପରେ ବିଜେବି ସ୍ବୟଂଶାସିତ ମହାବିଦ୍ୟାଳୟର ଷ୍ଟ୍ରଙ୍ଗ୍ରୁମ୍ରେ କଡ଼ା ସୁରକ୍ଷାରେ ଏହାକୁ ରଖାଯାଇଥିଲା। ପ୍ରଥମ ଦିନରେ ମେୟର ପଦବୀ ପାଇଁ ଆସିଥିବା ଇଭିଏମ୍ଗୁଡିକରେ କମିଶନିଂ ହୋଇଥିଲା। ତେଣୁ ୨ଦିନ ମଧ୍ୟରେ ଏତେ ସଂଖ୍ୟକ ପ୍ରାର୍ଥୀଙ୍କ ନାମ, ଦଳ ଏବଂ ଚିହ୍ନକୁ ନିର୍ଭୁଲ ଭାବେ ମେଶିନ୍ରେ ସ୍ଥାନିତ କରାଯିବା ସହ ବାଲାଟ୍ ୟୁନିଟକୁ ସେଟିଂ କରାଯାଇ ପାରି ନ ଥିଲା। ଏଥିପାଇଁ ଅଧିକ ସମୟ ଲାଗିଥିଲ। ଏହି କାର୍ଯ୍ୟରେ ପ୍ରାୟ ୧୪୦ଜଣ ଅଧିକାରୀ ନିୟୋଜିତ ଥିଲେ। ସିସିଟିଭି ନଜରରେ ସମସ୍ତ କାର୍ଯ୍ୟ କରାଯାଇଥିବା ସୂଚନା ଦିଆଯାଇଛି।