ଝାରସୁଗୁଡ଼ା,୨୮।୩(ଆଶିଷ ରଞ୍ଜନ ଦାଶ): ପ୍ରତ୍ୟେକ ପରିବାର ନିକଟରେ ୨୦୨୪ ଶେଷ ସୁଦ୍ଧା ଟ୍ୟାପ ଯୋଗେ ବିଶୁଦ୍ଧ ପିଇବା ପାଣି ପହଞ୍ଚାଇବା ପାଇଁ ସରକାର ଘୋଷଣା କରିଥିଲେ। ଏଥିପାଇଁ ସରକାର ଝାରସୁଗୁଡ଼ା ସହରର ସମସ୍ତ ୱାର୍ଡ ତଥା ବିଭିନ୍ନ ଗ୍ରାମାଞ୍ଚଳରେ ଜଳ ଯୋଗାଣ ପ୍ରକଳ୍ପ ପ୍ରତିଷ୍ଠା ପାଇଁ ପଦକ୍ଷେପ ନେଇଥିଲେ। ୨୦୨୪ ଶେଷ ହୋଇ ବର୍ତ୍ତମାନ ୨୦୨୫ ମାର୍ଚ୍ଚ ମାସ ଶେଷ ହେବାକୁ ଗଲାଣି। ହେଲେ ଗୋଟିଏ ବି ଜଳ ଯୋଗାଣ ପ୍ରକଳ୍ପ ସହରରେ ସମ୍ପୂର୍ଣ୍ଣ କାର୍ଯ୍ୟକ୍ଷମ ହୋଇନାହିଁ। ଝାରସୁଗୁଡ଼ା ସହରବାସୀ ଗ୍ରୀଷ୍ମ ଋତୁରେ ପିଇବା ପାଣି ପାଇଁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସହରର ଜନସାଧାରଣ ସରକାରଙ୍କ ଘୋଷଣା ପରେ ଘରେ ଘରେ ଟ୍ୟାପ ପାଣି ପହଞ୍ଚତ୍ବ ଏବଂ ସବୁଦିନ ପାଇଁ ପିଇବା ପାଣିର ଅସୁବିଧାରୁ ମୁକ୍ତି ପାଇବୁ ବୋଲି ସ୍ବପ୍ନ ଦେଖିଥିଲେ। ସ୍ବପ୍ନ କେବେ ସତ ହେବ ତାହା ସମୟ କହିବ। ଅନ୍ୟପକ୍ଷେ ବିଳମ୍ବିତ ହେଲେ ମଧ୍ୟ ଶହ ଶହ କୋଟି ଟଙ୍କା ବ୍ୟୟରେ ନିର୍ମାଣ କରାଯାଉଥିବା ଜଳ ଯୋଗାଣ ପ୍ରକଳ୍ପଗୁଡିକ ଆଜି ନ ହେଲେ କାଲି କାର୍ଯ୍ୟକ୍ଷମ ହେବ। ବର୍ତ୍ତମାନ ସରକାର ପ୍ରକଳ୍ପଗୁଡିକ ଶୀଘ୍ର ସାରିବା ପାଇଁ ଗୁରୁତ୍ୱ ଦେଉଛନ୍ତି। କିନ୍ତୁ ସବୁଠାରୁ ବଡ଼ କଥା ଖରାଦିନେ ଏହି ପ୍ରକଳ୍ପଗୁଡିକ କାର୍ଯ୍ୟକ୍ଷମ ହେଲେ, ପାଣି ଆସିବ କେଉଁଠୁ। ଇବ ଓ ଭେଡେନ ନଦୀ ଫେବୃଆରୀରୁ ଶୁଖିଲା ପଡିଛି। ଯେଉଁ ଟିକେ ପାଣି ଧାରା ବୋହୁଛି ତାହା କମ୍ପାନୀ ନେଇଯାଉଛି। ଭୁପୃଷ୍ଟ ଜଳସ୍ତର ଦିନକୁ ଦିନ ନିମ୍ନଗାମୀ ହେଉଛି। ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି ଯେ ଜଳ ଯୋଗାଣ ବିଭାଗ ତାର ମେଗା ପ୍ରକଳ୍ପ ପାଇଁ ପାଣି କେଉଁଠୁ ଆଣିବ। ଝାରସୁଗୁଡ଼ା ଜିଲାର ବିଭିନ୍ନ ଗ୍ରାମରେ ନିର୍ମାଣ କରାଯାଇଥିବା ଜଳ ଯୋଗାଣ ପ୍ରକଳ୍ପ ଗୁଡିକ କେଉଁଠି ବନ୍ଦ ପଡିଛି ତ କେଉଁଠି ଅଧା ଚଳୁଛି। ଜିଲାରେ ଜଳ ଯୋଗାଣ ବିଭାଗ ଏବଂ ୱାଟକୋ ବିଭାଗରେ ଖର୍ଚ୍ଚ ହେଉଥିବା ଶହ ଶହ କୋଟି ଟଙ୍କା ପ୍ରକୃତରେ ଲୋକଙ୍କ କାମକୁ ଆସିବ ନା ନାହିଁ ଏବଂ ଝାରସୁଗୁଡ଼ା ଜନସାଧାରଣ କେତେ ଦିନ ଆଉ ଏପରି ଜଳକଷ୍ଟ ଭୋଗ କରିବେ ତାହା ଝାରସୁଗୁଡ଼ାବାସୀଙ୍କ ମନରେ ସନ୍ଦେହ ପ୍ରକାଶ କରିଛି। ଏ ସମ୍ପର୍କରେ ଝାରସୁଗୁଡ଼ା ଗ୍ରାମ୍ୟ ଜଳ ଯୋଗାଣ ବିଭାଗ ଅଧିକ୍ଷଣ ଯନ୍ତ୍ରୀ ଶିବାଶିଷ ଦାଶଙ୍କୁ ପଚରାଯିବାରୁ ସେ କହିଥିଲେ ଯେ ଝାରସୁଗୁଡ଼ା ଜିଲାର ବିଭିନ୍ନ ଗ୍ରାମଗୁଡିକରେ ବିଭିନ୍ନ ଠିକା ସଂସ୍ଥା ରାସ୍ତାଗୁଡିକ କଂକ୍ରିଟ ଫଟାଇ ଦେଇଥିବାରୁ ଜଳ ଯୋଗାଣରେ ଅସୁବିଧା ହେଉଛି। ଯେଉଁ ପ୍ରକଳ୍ପଗୁଡିକ ଅଧା ଚାଲୁଛି ତାହା ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ କରିବା ପାଇଁ ପ୍ରୟାସ କରାଯାଉଛି। ୱାଟକୋର ଜିଏମ୍ ସୁବ୍ରତ କୁମାର ନାୟକଙ୍କୁ ଯୋଗାଯୋଗ କରିବାରୁ ସେ ଫୋନ ରିସିଭ କରି ନ ଥିବାରୁ ତାଙ୍କ ମତାମତ ମିଳି ପାରିନାହିଁ।
