ବରଗଡ଼ ଅଫିସ୍,୨୫।୩: କରୋନା ସଂକ୍ରମଣ ଯୋଗୁ ଗତବର୍ଷରୁ ପ୍ରାଥମିକ ସ୍କୁଲଗୁଡ଼ିକ ବନ୍ଦ ରହିଛି । କେବଳ ସେତିକି ନୁହେଁ, ଏଥର ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କ ପରୀକ୍ଷା ହେବ ନାହିଁ ଏବଂ ବିନା ପରୀକ୍ଷାରେ ସମ୍ପୃକ୍ତ ଶ୍ରେଣୀର ଛାତ୍ରୀଛାତ୍ର ପରବର୍ତ୍ତୀ ଶ୍ରେଣୀକୁ ଉତ୍ତୀର୍ଣ୍ଣ ହେବେ ବୋଲି ରାଜ୍ୟ ସରକାରଙ୍କ ଗଣଶିକ୍ଷା ବିଭାଗର ପତ୍ରସଂଖ୍ୟା-୬୨୯୦ ତରିଖ,୧୬।୩।୨୧ରେ ଏହା ଉଲ୍ଲେଖ ରହିଛି । ବର୍ତ୍ତମାନ ପୁଣି କରୋନା କାୟା ବିସ୍ତାର କରିଚାଲି ଥିବା ବେଳେ ବରଗଡ଼ ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରୁ ପ୍ରକାଶିତ ଚିଠି(ନଂ-୨୯୮୫, ତା,୪।୩।୨୧)କୁ ଆଧାର କରି ଚଳିତମାସ ପ୍ରଥମ ସପ୍ତାହରୁ ଜିଲାର କେତେକ ସରକାରୀ ପ୍ରାଥମିକ ସ୍କୁଲଗୁଡ଼ିକ ଖୋଲା ରହୁଥିଲା। ଛାତ୍ରୀଛାତ୍ର ସମ୍ପୃକ୍ତ ସ୍କୁଲକୁ ଆସି ବାରଣ୍ଡାରେ ସକାଳ ୭ଟାରୁ ପୂର୍ବାହ୍ନ ୧୧ଟା ପର୍ଯ୍ୟନ୍ତ ପାଠ ପଢୁଥିଲେ । ଏହି ସମ୍ପର୍କରେ ବୁଧବାର ଧରିତ୍ରୀରେ କରୋନା କାଳରେ ଚାଲିଛି ପାଠପଢ଼ା ଶୀର୍ଷକ ଏକ ଖବର ପ୍ରକାଶ ପାଇଥିଲା । ଖବର ପ୍ରକାଶ ପାଇବା ପରେ ଗୁରୁବାର ଜିଲା ଶିକ୍ଷା ଅଧିକାରୀ ମିତ୍ରଭାନୁ କଚ୍ଛପ ସ୍କୁଲରେ ସେଭଳି ପାଠପଢ଼ା ଉପରେ ଅଙ୍କୁଶ ଲଗାଇଛନ୍ତି।
ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରୁ ପ୍ରକାଶିତ ବିଜ୍ଞପ୍ତି(ନଂ-୩୫୬୦,ତା-୨୫।୩।୨୧)ରେ ଉଲ୍ଲେଖ ରହିଛି। ପୁର୍ବରୁ ପ୍ରକାଶିତ ବିଜ୍ଞପ୍ତି ଅନୁସାରେ ଛାତ୍ରୀଛାତ୍ରଙ୍କୁ ଅନ୍ଲାଇନ ଶିକ୍ଷାଦାନ ଏବଂ ଆବଶ୍ୟକସ୍ଥଳେ ଛାତ୍ରୀଛାତ୍ରଙ୍କ ସନ୍ଦେହ ପାଇଁ ଅଫ୍ଲାଇନ ଶିକ୍ଷାଦାନ ପାଇଁ ନିର୍ଦ୍ଦେଶ ରହିଥିଲା । ଅନ୍ୟପକ୍ଷେ କେତେକ ସ୍କୁଲରେ ଛାତ୍ରୀଛାତ୍ରଙ୍କୁ ଡକାଯାଇ ନିୟମିତ ପାଠପଢ଼ା ଯାଉଥିବା ନଜରକୁ ଆସିଥିଲା । ତେବେ ଏଭଳି ସ୍ଥିତିରେ ଛାତ୍ରୀଛାତ୍ର ସ୍କୁଲକୁ ଆସିବାର କିଛି ଆବଶ୍ୟକତା ନାହିଁ ବୋଲି ଜିଲା ଶିକ୍ଷା ଅଧିକାରୀଙ୍କ ଏହି ବିଜ୍ଞପ୍ତିରେ ଉଲ୍ଲେଖ ରହିଛି। ସେହିପରି କୋଭିଡ୍ ଗାଇଡ୍ଲାଇନ୍ ପାଳନ କରି ନିର୍ଦ୍ଧାରୀତ ସମୟରେ ସ୍କୁଲରେ ଉପସ୍ଥିତ ରହି ଛାତ୍ରୀଛାତ୍ରଙ୍କୁ ଅନ୍ଲାଇନ ଏବଂ ଦରକାର ପଡ଼ିଲେ କେବଳ ସନ୍ଦେହ ପାଇଁ ଅଫଲାଇନରେ ସାହାଯ୍ୟ କରିବାକୁ ଜିଲା ଶିକ୍ଷା ଅଧିକାରୀଙ୍କ ନିର୍ଦ୍ଦେଶ ରହିଛି।
