ନୂଆଦିଲ୍ଲୀ,୫ା୪: ଦିଲ୍ଲୀ ଅବକାରୀ ଦୁର୍ନୀତି ସହ ଜଡ଼ିତ ମନିଲଣ୍ଡରିଂ ମାମଲାରେ ଗିରଫ ହୋଇଥିବା ଅରବିନ୍ଦ କେଜ୍ରିଓ୍ବାଲଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇବା ପାଇଁ ହୋଇଥିବା ଆବେଦନକୁ ଦିଲ୍ଲୀ ହାଇକୋର୍ଟ ଗୁରୁବାର ତୃତୀୟ ଥର ପାଇଁ ଖାରଜ କରିଦେଇଛନ୍ତି। ଗଣତନ୍ତ୍ରକୁ ତା’ ବାଟରେ ଯିବାକୁ ଦିଆଯାଉ ବୋଲି କାର୍ଯ୍ୟକାରୀ ମୁଖ୍ୟ ବିଚାରପତି ମନମୋହନଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଉଲ୍ଲେଖନୀୟ ଟିପ୍ପଣୀ ଦେଇଛନ୍ତି। ଜାତୀୟ ସ୍ବାର୍ଥ ଆଗରେ ବ୍ୟକ୍ତିଗତ ସ୍ବାର୍ଥ ଗୌଣ ବୋଲି ହାଇକୋର୍ଟ କହିଛନ୍ତି। ଆମେ ଆଇନର ଅଦାଲତ ହୋଇଥିବାରୁ ଆମକୁ ଆଇନ ଅନୁଯାୟୀ ଯିବାକୁ ହେବ। ଆପଣଙ୍କର ଉପଚାର ଏଠାରେ ନାହିଁ, ଅନ୍ୟ କେଉଁଠି ରହିଛି। ଆପଣ ଉପଯୁକ୍ତ ଫୋରମକୁ ଯାଆନ୍ତୁ ବୋଲି ଖଣ୍ଡପୀଠ ଆବେଦନକାରୀଙ୍କୁ କହିଥିଲେ।
କେଜ୍ରିଓ୍ବାଲଙ୍କୁ ମୁଖ୍ୟମନ୍ତ୍ରୀ ପଦରୁ ବାଦ୍ ଦେବାକୁ ଅନୁରୂପ ଏକ ପିଟିଶନକୁ ନିକଟରେ ଉକ୍ତ ଖଣ୍ଡପୀଠ ଖାରଜ କରିଥିଲେ। ଏହା ଉପରେ କୌଣସି ଭିନ୍ନ ମତାମତ ନିଆଯାଇପାରିବ ନାହିଁ। ଏହି ପ୍ରସଙ୍ଗରେ ହାଇକୋର୍ଟ ହସ୍ତକ୍ଷେପ କରିବାକୁ ମନା କରିବା ପରେ ଆବେଦନକାରୀ ହିନ୍ଦୁ ସେନାର ବିଷ୍ଣୁ ଗୁପ୍ତାଙ୍କ ଓକିଲ କହିଥିଲେ, ଆବେଦନ ପ୍ରତ୍ୟାହାର କରିନେବା ଲାଗି ତାଙ୍କୁ ନିର୍ଦ୍ଦେଶ ମିଳିଛି। ଉକ୍ତ ଆବେଦନ ନେଇ ସେ ଉପରାଜ୍ୟପାଳଙ୍କ ଦ୍ୱାରସ୍ଥ ହେବେ ବୋଲି କହିଛନ୍ତି। ସୂଚନାଯୋଗ୍ୟ, ମୁଖ୍ୟମନ୍ତ୍ରୀ କେଜ୍ରିଓ୍ବାଲ୍ ଗିରଫ ହେବା ସତ୍ତ୍ୱେ ନିଜ ପଦରୁ ଇସ୍ତଫା ନ ଦେଇ ଜେଲରୁ ସରକାର ଚଳାଉଛନ୍ତି। ଜେଲରୁ ସରକାର ଚଳାଇବା ସହଜ ନ ହେଲେ ମଧ୍ୟ ଜଣେ ଗିରଫ ମୁଖ୍ୟମନ୍ତ୍ରୀଙ୍କୁ ପଦରୁ ହଟାଇବା ପାଇଁ ସମ୍ବିଧାନରେ କୌଣସି ବ୍ୟବସ୍ଥା ନାହିଁ।
