ଥୁଆମୂଳରାମପୁର,୩।୨ (ଦୁର୍ଗା କୀର୍ତ୍ତି):: ରାଜ୍ୟ ସରକାରଙ୍କ ‘ହର ଘର ଜଳ’ ସ୍ଲୋଗାନ ଏବେ ଦୁର୍ଗମ ଅଞ୍ଚଳରେ ପ୍ରହସନ ପାଲଟିଛି। କଳାହାଣ୍ଡି ଜଲା ଥୁଆମୂଳ ରାମପୁର ବ୍ଲକ ତଳଆମପଦର ପଞ୍ଚାୟତସ୍ଥିତ ଚୂଳବାଡ଼ି ଗ୍ରାମରେ କୋଟି କୋଟି ଟଙ୍କାର ଖଣି ସମ୍ପଦ ଥାଇ ମଧ୍ୟ ସ୍ଥାନୀୟ ଲୋକେ ମୁନ୍ଦାଏ ବିଶୁଦ୍ଧ ପାନୀୟ ଜଳ ପାଇଁ ହନ୍ତସନ୍ତ ହେଉଛନ୍ତି। ‘ବସୁଧା’ ଯୋଜନାରେ ନିର୍ମାଣ ହେଉଥିବା ପାନୀୟ ଜଳ ପ୍ରକଳ୍ପ ଠିକାଦାରଙ୍କ ମନ୍ଥର ଗତି ଓ ପ୍ରଶାସନିକ ଉଦାସୀନତା ଯୋଗୁ ବର୍ଷ ବର୍ଷ ଧରି ଅସମ୍ପୂର୍ଣ୍ଣ ହୋଇ ପଡ଼ିରହିଛି। ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ (RWSS) ଅଧୀନରେ ଥିବା ଏହି ପ୍ରକଳ୍ପର କାର୍ଯ୍ୟ ଶେଷ କରିବା ପାଇଁ ୧୬.୦୪.୨୦୨୪ ରିଖ ଧାର୍ଯ୍ୟ କରାଯାଇଥିଲା। ସନ୍ଦୀପ କୁମାର ବେହେରା ନାମକ ଠିକା ସଂସ୍ଥାକୁ ଏହାର ଦାୟିତ୍ୱ ମିଳିଥିବା ବେଳେ, ଆଜି ପର୍ଯ୍ୟନ୍ତ ନା ଓଭରହେଡ ଟାଙ୍କି ସମ୍ପୂର୍ଣ୍ଣ ହୋଇଛି, ନା ହିତାଧିକାରୀଙ୍କ ଘରେ ପାଇପ ସଂଯୋଗ ହୋଇଛି। ପ୍ରାୟ ୩ ରୁ ୪ ବର୍ଷ ହେବ ଏହି କାମ ଅଧାପନ୍ତରିଆ ଭାବେ ଝୁଲି ରହିଥିବା ବେଳେ ଗ୍ରୀଷ୍ମ ଋତୁ ପାଖେଇ ଆସୁଥିବାରୁ ଚୂଳବାଡ଼ି, ସ୍କୁଲ ପଡ଼ା, ବସ୍ତି ପଡ଼ା, ସିଗ୍ନି କୋନ ପଡ଼ା, ଟାଣ୍ଡକାମୁଇ ପଡ଼ା, ଉପର ପଡ଼ା ଏବଂ ଗେଦେଲ ଗୁଡ଼ା ପଡ଼ାର ଜନସାଧାରଣ ଜଳକଷ୍ଟକୁ ନେଇ ଆତଙ୍କିତ ହୋଇପଡ଼ିଲେଣି। ଏନେଇ ସ୍ଥାନୀୟ ସରପଞ୍ଚ ପ୍ରକାଶ ମାଝୀ ବିଭାଗୀୟ ଅଧିକାରୀ ଓ ବ୍ଲକ ପ୍ରଶାସନକୁ ବାରମ୍ବାର ଅବଗତ କରାଇଥିଲେ ମଧ୍ୟ କେହି ଶୁଣୁ ନ ଥିବା ଅଭିଯୋଗ କରିଛନ୍ତି। ଶ୍ରୀ ମାଝୀ କହିଛନ୍ତି ଯେ, “ସରକାର ଏହି ଅଞ୍ଚଳର ଖଣି ସମ୍ପଦ ଲୁଟିବା ପାଇଁ ଯେତିକି ତତ୍ପର, ଗରିବଙ୍କୁ ପାଣି ମୁନ୍ଦାଏ ଦେବାରେ ସେତିକି ଅବହେଳା କରୁଛନ୍ତି। ସିଯିମାଳି ଖଣି ଚାଲିଲେ ପ୍ରକୃତ ବିକାଶ ହେବ ନା ଏହି ପାଣି ଟାଙ୍କି ଭଳି ନିମ୍ନମାନର କାର୍ଯ୍ୟ ଆଗେଇବ, ସେ ନେଇ ଜନସାଧାରଣ ଏବେ ପ୍ରଶ୍ନ କରୁଛନ୍ତି।”
ପ୍ରକଳ୍ପରେ ବିଳମ୍ବ ସମ୍ପର୍କରେ ବିଭାଗୀୟ ଯନ୍ତ୍ରୀ ମନ୍ମଥ ମୁର୍ମୁଙ୍କୁ ପଚାରିବାରୁ ସେ କହିଛନ୍ତି, “ଆମେ ବିଭିନ୍ନ ସମୟରେ ରିଭ୍ୟୁ ମିଟିଂରେ ଠିକା ସଂସ୍ଥାକୁ ତାଗିଦ କରୁଛୁ। ଜିଲାପାଳ ମଧ୍ୟ କାର୍ଯ୍ୟ ଶୀଘ୍ର ସାରିବାକୁ ନିର୍ଦ୍ଦେଶ ଦେଇଛନ୍ତି। କିନ୍ତୁ କିଛି ମାସ ତଳେ ପାଣ୍ଠି (Fund) ନଥିବାରୁ ଠିକା ସଂସ୍ଥାକୁ ପେମେଣ୍ଟ ହୋଇପାରି ନଥିଲା, ଯେଉଁଥିପାଇଁ ସେ UT File (Under Time) କରିଛନ୍ତି। ଫଳରେ କାର୍ଯ୍ୟ ମନ୍ଥର ହୋଇଥିଲା। ଆମେ ଯତ୍ନବାନ ଅଛୁ ଏବଂ ଆସନ୍ତା ଏପ୍ରିଲ ସୁଦ୍ଧା କାମ ସମ୍ପୂର୍ଣ୍ଣ କରିବାକୁ ଚେଷ୍ଟା କରୁଛୁ।” ଅଧାପନ୍ତରିଆ ପ୍ରକଳ୍ପକୁ ତୁରନ୍ତ ଶେଷ କରି ଘରେ ଘରେ ପାଇପ ସଂଯୋଗ ଦେବାକୁ ଅଞ୍ଚଳବାସୀ ଦାବି କରିଛନ୍ତି। ଲାଭଖୋର ଠିକାଦାରଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରା ନଗଲେ ଆଗାମୀ ଦିନରେ ଅଞ୍ଚଳବାସୀ ବଡ଼ ଧରଣର ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି।
