ସୌରଭ ଗାଙ୍ଗୁଲିଙ୍କ ପରି ଖେଳାଳିଙ୍କ ସାମ୍ନାରେ ତାଙ୍କ ବୋଲିଂର ଶକ୍ତି ଦେଖାଇବା ପରେ ଯେକୌଣସି ବୋଲର ଆଗକୁ ଯିବାକୁ ସ୍ବପ୍ନ ଦେଖନ୍ତି। କିନ୍ତୁ ଏମିତି ଜଣେ ଭାରତୀୟ ବୋଲର ମଧ୍ୟ ଅଛନ୍ତି ଯିଏ ଏବେ ନିଜ ପରିବାର ଚଳାଇବା ପାଇଁ ଚା’ ବିକ୍ରି କରୁଛନ୍ତି। ଆସାମ ପାଇଁ ରଣଜୀ ଟ୍ରଫି ଖେଳିଥିବା ପ୍ରକାଶ ଭାଗବତ ଏବେ ଏହି କଷ୍ଟଦାୟକ ପର୍ଯ୍ୟାୟ ଦେଇ ଗତି କରୁଛନ୍ତି। ୨୦୦୯-୨୦୧୦ ରେ ଆସାମ ପାଇଁ ରଣଜୀ ଟ୍ରଫି ଖେଳିଥିବା ପ୍ରକାଶ ୨୦୦୩ ରେ ଜାତୀୟ କ୍ରିକେଟ ଏକାଡେମୀରେ ତାଲିମ ନେଇଥିଲେ। ସେହି ସମୟ ମଧ୍ୟରେ ସେ ସୌରଭ ଗାଙ୍ଗୁଲିଙ୍କୁ ବୋଲିଂ କରିଥିଲେ। ଏହି ସମୟରେ ସେ ସଚିନ ତେନ୍ଦୁଲକର, ଜହିର ଖାନ, ହରଭଜନ ସିଂ, ବୀରେନ୍ଦ୍ର ସେହ୍ବାଗଙ୍କୁ ଭେଟିବାର ସୁଯୋଗ ମଧ୍ୟ ପାଇଥିଲେ।
ପ୍ରକାଶ କହିଛନ୍ତି ଯେ ୨୦୧୧ରେ ପିତାଙ୍କ ମୃତ୍ୟୁ ପରେ ତାଙ୍କୁ କ୍ରିକେଟ ଛାଡିବାକୁ ପଡିଥିଲା। ବାପା ଏବଂ ବଡ ଭାଇ ଚାଟ ବିକ୍ରି କରୁଥିଲେ ଏବଂ ବାପାଙ୍କ ମୃତ୍ୟୁ ପରେ ବଡ ଭାଇର ସ୍ବାସ୍ଥ୍ୟ ମଧ୍ୟ ଖରାପ ହୋଇଯାଇଥିଲା। ବାଧ୍ୟ ହୋଇ ତାଙ୍କୁ ଚା’ ବିକିବାକୁ ପଡିଥିଲା ବୋଲି ସେ କହିଛନ୍ତି। ଚା’ ଦୋକାନରୁ ଆସୁଥିବା ଅର୍ଥରେ ତାଙ୍କ ପରିବାର ଚଳୁଛି। ଏବେ ସେ ସରକାରୀ ସାହାଯ୍ୟ ପାଇବାକୁ ଦାବି କରିଛନ୍ତି।
