ଡେରାବିଶ, ୧୧ା୧୨(ବେବର୍ତ୍ତା ଅଜୟ ଦାସ): କେନ୍ଦ୍ରାପଡ଼ା ଜିଲା ଡେରାବିଶ ବ୍ଲକ ଅଧୀନ ମଙ୍ଗଳପୁର ପଞ୍ଚାୟତ ବିରୂପା ନଦୀର ତ୍ରିପୁରାରିପୁର (ଘଣ୍ଟପଦା)ଠାରେ ଥିବା ଶାଗୁଣା ଘାଇ ନିକଟରେ ଗତ ୩ ତାରିଖରେ ନଦୀପଠାରେ ୧୦୦ ଫୁଟ ଲମ୍ବ, ୧୫ ଫୁଟ ଗଭୀରର ଏକ ଫାଟ ସୃଷ୍ଟି ହୋଇଥିଲା। ଖବରପାଇ କେନ୍ଦ୍ରାପଡ଼ା ଜଳସମ୍ପଦ ବିଭାଗର କର୍ତ୍ତୃପକ୍ଷ ଘଟଣାସ୍ଥଳକୁ ଯାଇ ତଦାରଖ କରିଥିଲେ। ଗତ ୪ ତାରିଖଠାରୁ ଏହି ଫାଟ କ୍ରମଶଃ ବୃଦ୍ଧି ପାଇବାରେ ଲାଗିଥିଲା। ୫ ତାରିଖରେ ଘଟଣାସ୍ଥଳକୁ ଜଳସମ୍ପଦ ବିଭାଗ ମୁଖ୍ୟଯନ୍ତ୍ରୀ ରୋହିତ କୁମାର ସେଠୀ, ଅଧୀକ୍ଷଣ ଯନ୍ତ୍ରୀ ଉମେଶ ଚନ୍ଦ୍ର ସେଠୀ, ସହକାରୀ ନିର୍ବାହୀ ଯନ୍ତ୍ରୀ ପ୍ରମୋଦ କୁମାର ରାୟ ଘଟଣାସ୍ଥଳକୁ ଯାଇ ତଦାରଖ କରିବା ସହ ନଦୀପଠାର ଫାଟ ବନ୍ଦ କରିବା ପାଇଁ ତୁରନ୍ତ ଏଷ୍ଟିମେଟ୍ କରି ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀଙ୍କୁ ମୁଖ୍ୟଯନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏବେ ମଧ୍ୟ ନଦୀପଠାରେ ଫାଟ ବୃଦ୍ଧି ପାଇବାରେ ଲାଗିଛି। ରବିବାର ଅପରାହ୍ନରେ ଏହି ଫାଟର ଲମ୍ବ ୨୦୦ ଫୁଟରୁ ଊର୍ଦ୍ଧ୍ୱ ହୋଇଥିବା ବେଳେ ୩୦ ଫୁଟ ଓସାର ଓ ୨୫ ଫୁଟର ଗଭୀର ହୋଇ ପଠାରୁ ଅତଡ଼ା ଖସିବାରେ ଲାଗିଥିବା ଘଣ୍ଟପଦା ଗ୍ରାମର ପ୍ରଫୁଲ୍ଲ କୁମାର ସିଂ କହିଛନ୍ତି। ଏହି ଫାଟ ନଦୀବନ୍ଧଠାରୁ ୫୦ ଫୁଟ ଦୂରରେ ରହିଛି। ଫାଟଟି କ୍ରମଶଃ ବନ୍ଧର ନିକଟତର ହେଉଥିବା ବେଳେ ସାଧାରଣରେ ଆତଙ୍କ ଖେଳିଯାଇଛି। ରବିବାର ଡେରାବିଶ ବ୍ଲକ ଉପାଧ୍ୟକ୍ଷ ଦେବାଶିଷ ଆଚାର୍ଯ୍ୟଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଏହି ଫାଟସ୍ଥଳ ପରିଦର୍ଶନ କରି ଜିଲା ପ୍ରଶାସନ ସହ ଆଲୋଚନା କରିଛନ୍ତି। ଫାଟ ବୃଦ୍ଧି ସମ୍ପର୍କରେ ସହକାରୀ ନିର୍ବାହୀ ଯନ୍ତ୍ରୀ ରାୟଙ୍କୁ ପଚାରିବାରେ ନଦୀରେ ଫାଟ ସୃଷ୍ଟି ହେଉଥିବା ସ୍ଥାନରେ ୧୧ଟି ସ୍ପର୍ ନିର୍ମାଣ କରାଯାଇଛି। ଅଧିକ ସ୍ପର୍ ନିର୍ମାଣ ପାଇଁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଏଷ୍ଟିମେଟ୍ ପଠାଯାଇଛି।
